ਸਿੱਖ ਇਤਿਹਾਸ ਅਤੇ ਸ਼ਹੀਦਾਂ ਦੀ ਨਕਲ ਲਾਹ ਕੇ ਪਰਦੇ ’ਤੇ ਫ਼ਿਲਮਾਂ ਰਾਹੀਂ ਵਿਖਾਉਣ ਦਾ ਸਿਲਸਿਲਾ ਪਿਛਲੇ ਕੁਝ ਸਮੇਂ ਤੋਂ ਕਾਫ਼ੀ ਰਫ਼ਤਾਰ ਫੜ ਰਿਹਾ ਹੈ। ਸਿੱਖਾਂ ਦੇ ਵੱਡੇ ਹਿੱਸੇ ਦੀ ਤਰਜ਼-ਏ-ਜ਼ਿੰਦਗੀ ਆਪਣੇ ਰਵਾਇਤੀ ਤਰੀਕਾਕਾਰ ਨਾਲੋਂ ਵੱਡੀ ਵਿੱਥ ’ਤੇ ਹੋਣ ਕਰਕੇ ਇਸ ਦੀ ਗੰਭੀਰਤਾ ਅਤੇ ਗੁੰਝਲਤਾ ਨੂੰ ਸਮਝਣ ਅਤੇ ਮਹਿਸੂਸ ਕਰਨ ਵਿੱਚ ਦਿੱਕਤ ਆ ਰਹੀ ਹੈ। ਜਿਸ ਦੇ ਸਿੱਟੇ ਵਜੋਂ ਸਿੱਖਾਂ ਵਿੱਚ ਹੀ ਇੱਕ ਹਿੱਸਾ ਸ਼ਹੀਦਾਂ ਦੀ ਨਕਲ ਲਾਹੁਣ ਨੂੰ ਪ੍ਰਚਾਰ ਮੰਨ ਰਿਹਾ ਹੈ ਅਤੇ ਇੱਕ ਹਿੱਸਾ ਆਪਣੇ ਰਵਾਇਤੀ ਤਰੀਕਾਕਾਰ ਤੋਂ ਸੇਧ ਲੈਂਦਿਆਂ ਇਸ ਨੂੰ ਸ਼ਹੀਦਾਂ ਦੇ ਅਦਬ ਨੂੰ ਢਾਹ ਲਾਉਣ ਦਾ ਬੱਜਰ ਕੁਰਾਹਾ ਮੰਨ ਰਿਹਾ ਹੈ।