ਨਵੀਂ ਦਿੱਲੀ (11 ਜਨਵਰੀ, 2016): ਭਾਈ ਜਗਤਾਰ ਸਿੰਘ ਹਵਾਰਾ ਨੂੰ ਸਿਮਰਨਜੀਤ ਸਿੰਘ ਦੀ ਅਗਵਾਈ ਵਿੱਚ ਆਏ ਆਗੂ ਪੇਸ਼ੀ ਰੱਦ ਹੋਣ ਕਰਕੇ ਸਨਮਾਨਿਤ ਨਹੀਂ ਕਰਕ ਸਕੇ। ਸਰਬੱਤ ਖਾਲਸਾ (2015) ਵਿੱਚ ਅਕਾਲ ਤਖਤ ਸਾਹਿਬਾਨ ਦੇ ਜੱਥੇਦਾਰ ਥਾਪੇ ਜਾਣ ਤੋਂ ਬਾਅਦ ਇਹ ਸਿੱਖ ਆਗੂ ਭਾਈ ਹਵਾਰਾ ਨੂੰ ਸਨਮਾਨਿਤ ਕਰਨਾ ਚਾਹੁੰਦੇ ਸਨ।
9 ਜਨਵਰੀ ਨੂੰ ਸਿੱਖ ਆਗੂਆਂ ਦਾ ਜੱਥਾ ਅਕਾਲ ਤਖਤ ਸਾਹਿਬ ਤੋਂ ਅਰਦਾਸ ਕਰਕੇ ਦਿੱਲੀ ਨੂੰ ਚੱਲਿਆ ਸੀ ਅਤੇ 10 ਜਨਵਰੀ ਨੂੰ ਫਤਿਹਗੜ੍ਹ ਸਾਹਿਬ ਤੋਂ ਰਵਾਨਾ ਹੋਇਆ ਸੀ।
ਭਾਈ ਹਵਾਰਾ ਦੀ ਅਗਲੀ ਪੇਸ਼ੀ 22 ਜਨਵਰੀ ਤੈਅ ਕੀਤੀ ਗਈ ਹੈ ਤੇ ਜਾਣਕਾਰੀ ਮੁਤਾਬਿਕ ਅਦਾਲਤ ਦੇ ਨਿਰਦੇਸ਼ਾਂ ‘ਤੇ ਹੁਣ 22 ਜਨਵਰੀ ਦੀ ਸੁਣਵਾਈ ਵੀਡੀਓ ਕਾਨਫਰਸਿੰਗ ਰਾਹੀਂ ਤਿਹਾੜ ਜੇਲ੍ਹ ਤੋਂ ਹੀ ਹੋਵੇਗੀ । ਇਸ ਤਰ੍ਹਾਂ ਸਿਮਰਨਜੀਤ ਸਿੰਘ ਮਾਨ, ਜੋ ਕਿ ਇਹ ਦਾਅਵਾ ਕਰ ਰਹੇ ਸਨ ਕਿ ਉਹ ਅਗਲੀ ਪੇਸ਼ੀ ‘ਤੇ ਆ ਕੇ ਭਾਈ ਹਵਾਰਾ ਨੂੰ ਸਨਮਾਨਿਤ ਕਰਨਗੇ, ਹੁਣ ਇਹ ਕਾਰਵਾਈ ਵੀ ਨੇਪਰੇ ਨਹੀਂ ਚੜ ਸਕੇਗੀ ।
ਪਟਿਆਲਾ ਹਾਊਸ ਕੋਰਟ ਤੋਂ ਆਪਣੇ ਸਹਿਯੋਗੀਆਂ ਸਮੇਤ ਪਰਤੇ ਸ. ਮਾਨ ਨੇ ਗੁਰਦੁਆਰਾ ਰਕਾਬਗੰਜ ਸਾਹਿਬ ਵਿਖੇ ਪੱਤਰਕਾਰਾਂ ਨਾਲ ਗੱਲ ਕਰਦੇ ਹੋਏ ਕਿਹਾ ਕਿ ਭਾਈ ਹਵਾਰਾ ਨੂੰ ਸਨਮਾਨਿਤ ਕਰਨ ਲਈ ਉਹ ਅਕਾਲ ਤਖਤ ਤੋਂ ਵੱਡੀ ਗਿਣਤੀ ‘ਚ ਸਿੱਖ ਸੰਗਤਾਂ ਦੇ ਕਾਫਲੇ ਨਾਲ ਤੁਰੇ ਸੀ, ਪ੍ਰੰਤੂ ਕਈ ਸਿੱਖਾਂ ਨੂੰ ਹਰਿਆਣਾ ਦੇ ਕੁੰਡਲੀ ਬਾਰਡਰ ‘ਤੇ ਹੀ ਹਿਰਾਸਤ ‘ਚ ਲੈ ਲਿਆ ਗਿਆ ।
ਇਸ ਮੌਕੇ ਸ. ਮਾਨ ਦੇ ਨਾਲ ਬਾਬਾ ਪਰਦੀਪ ਸਿੰਘ ਚਾਂਦ ਪੁਰਾ(ਪੰਥਕ ਸੇਵਾ ਲਹਿਰ), ਬਹਾਦਰ ਸਿੰਘ(ਐਕਟਿੰਗ ਪ੍ਰਧਾਨ ਯੂਨਾਈਟਿੱਡ ਅਕਾਲੀ ਦਲ), ਮਹਿੰਦਰਪਾਲ ਸਿੰਘ, ਬੀਬੀ ਪ੍ਰੀਤਮ ਕੌਰ, ਸੰਸਾਰ ਸਿੰਘ, ਕਰਨੈਲ ਸਿੰਘ ਨਾਰੀਕੇ, ਹਰਭਜਨ ਸਿੰਘ ਕਸ਼ਮੀਰੀ, ਸੁਰਜੀਤ ਸਿੰਘ ਕਾਲਾਬੁਲਾ, ਸਰਬਜੀਤ ਸਿੰਘ ਭੁਟਾਨੀ, ਰਵਨੀਤ ਸਿੰਘ ਸੰਘੇੜਾ, ਗੁਰਨੈਬ ਸਿੰਘ ਸਰਪੰਚ, ਗੁਰਜੰਟ ਸਿੰਘ ਕੱਟੂ, ਜਸੀਜਤ ਸਿੰਘ ਤੇ ਗੁਰਪ੍ਰੀਤ ਸਿੰਘ ਦਿੱਲੀ ਸਮੇਤ ਹੋਰਨਾ ਆਗੂ ਵੀ ਮੌਜੂਦ ਸਨ ।
