ਸ੍ਰੀ ਮੁਕਤਸਰ ਸਾਹਿਬ / ਸਮਾਲਸਰ / ਚੰਡੀਗੜ੍ਹ: ਮੁਕਤਸਰ ਜ਼ਿਲ੍ਹੇ ਨਾਲ ਸਬੰਧਿਤ ਕਿਸਾਨ ਤੇ ਸਮਾਲਸਰ ਨੇੜਲੇ ਪਿੰਡ ਦੇ ਇਕ ਬਜ਼ੁਰਗ ਕਿਸਾਨ ਦੇ ਪੁੱਤ ਨੇ ਕਰਜ਼ੇ ਦੀ ਵਧਦੀ ਪੰਡ ਤੋਂ ਤੰਗ ਆ ਕੇ ਖੁ਼ਦਕੁਸ਼ੀ ਕਰ ਲਈ। ਇਕ ਕਿਸਾਨ ਨੇ ਜਿੱਥੇ ਰੇਲ ਗੱਡੀ ਹੇਠ ਆ ਕੇ ਜਾਨ ਦੇ ਦਿੱਤੀ ਉਥੇ ਦੂਜੇ ਕਿਸਾਨ ਨੇ ਫ਼ਾਹਾ ਲੈ ਲਿਆ।
ਇਥੋਂ ਨੇੜਲੇ ਪਿੰਡ ਵੜਿੰਗ ਦੇ ਕਿਸਾਨ ਬਲਰਾਜ ਸਿੰਘ (50) ਨੇ ਰੇਲ ਗੱਡੀ ਥੱਲੇ ਆ ਕੇ ਖ਼ੁਦਕੁਸ਼ੀ ਕਰ ਲਈ। ਨੌਂ ਕਿੱਲਿਆਂ ਦੇ ਮਾਲਕ ਇਸ ਕਿਸਾਨ ਸਿਰ 5-7 ਲੱਖ ਰੁਪਏ ਦਾ ਬੈਂਕ ਅਤੇ ਰਿਸ਼ਤੇਦਾਰਾਂ ਦਾ ਕਰਜ਼ਾ ਸੀ। ਉਸ ਦੇ ਦੋ ਪੁੱਤਰ ਹਨ। ਬੀਤੀ ਰਾਤ ਉਹ ਘਰੋਂ ਗਾਇਬ ਹੋ ਗਿਆ ਤੇ ਅੱਜ ਉਸ ਦੀ ਰੇਲਵੇ ਲਾਈਨ ਤੋਂ ਵੱਢੀ ਟੁੱਕੀ ਲਾਸ਼ ਮਿਲੀ। ਰੇਲਵੇ ਪੁਲੀਸ ਨੇ ਬਣਦੀ ਕਾਰਵਾਈ ਕਰਕੇ ਅਤੇ ਪੋਸਟ ਮਾਰਟਮ ਤੋਂ ਬਾਅਦ ਲਾਸ਼ ਵਾਰਸਾਂ ਹਵਾਲੇ ਕਰ ਦਿੱਤੀ ਹੈ।
ਠੱਠੀ ਭਾਈ, ਸਮਾਲਸਰ ਨੇੜੇ ਪੈਂਦੇ ਪਿੰਡ ਮਾੜੀ ਮੁਸਤਫਾ ਦੇ ਆਰਥਿਕ ਤੰਗੀ ਨਾਲ ਜੂਝ ਰਹੇ ਗ਼ਰੀਬ ਕਿਸਾਨ ਦੇ ਨੌਜਵਾਨ ਪੁੱਤ ਨੇ ਫਾਹਾ ਲੈ ਲਿਆ। ਖੁਦਕੁਸ਼ੀ ਕਰਨ ਵਾਲੇ ਨੌਜਵਾਨ ਸਤਨਾਮ ਸਿੰਘ (24) ਦੇ 70 ਸਾਲਾ ਬਜ਼ੁਰਗ ਪਿਤਾ ਜ਼ੋਰਾ ਸਿੰਘ ’ਤੇ ਪੰਜ ਲੱਖ ਰੁਪਏ ਦਾ ਕਰਜ਼ਾ ਹੈ, ਜੋ ਦਿਨੋ ਦਿਨ ਵਧਦਾ ਜਾ ਰਿਹਾ ਸੀ। ਕੰਮਕਾਰ ਤੋਂ ਅਸਮਰੱਥ ਜ਼ੋਰਾ ਸਿੰਘ 3 ਕਨਾਲ ਦਾ ਮਾਲਕ ਸੀ, ਪਰ ਆਮਦਨ ਨਾ ਹੋਣ ਕਰਕੇ ਅਤੇ ਭੈਣ ਦੇ ਵਿਆਹ ਨੂੰ ਲੈ ਕੇ ਸਤਨਾਮ ਸਿੰਘ ਅਕਸਰ ਪ੍ਰੇਸ਼ਾਨ ਰਹਿੰਦਾ ਸੀ।
