ਲੁਧਿਆਣਾ ( 18 ਫਰਵਰੀ, 2015): ਪੰਜਾਬੀ ਗਾਇਕ/ ਐਕਟਰ ਗਿੱਪੀ ਗਰੇਵਾਲ ਦੇ ਨਵੇ ਵੀਡੀਓੁ ਗੀਤ “ਜ਼ਾਲਮ” ਨੂੰ ਜਿੱਥੇ ਇੱਕ ਪਾਸੇ ਸ਼ੋਸ਼ਲ ਮੀਡੀਆ ‘ਤੇ ਸਰੋਤਿਆਂ ਖਾਸ ਕਰਕੇ ਸਿੱਖਾਂ ਵੱਲੋਂ ਭਰਵਾਂ ਹੁੰਗਾਰਾ ਮਿਲ ਰਿਹਾ ਹੈ, ਉੱਥੇ ਦੂਜੇ ਪਾਸੇ ਗਾਇਕ ਗਿੱਪੀ ਗਰੇਵਲ ‘ਤੇ ਖਾੜਕੂਵਾਦ ਨੂੰ ਵਡਿਆਉਣ ਦਾ ਦੋਸ਼ ਲਾਉਦਿਆਂ ਕਾਂਗਰਸ ਲੀਡਰਾਂ ਨੇ ਪਰਚਾ ਦਰਜ਼ ਕਰਨ ਦੀ ਮੰਗ ਕੀਤੀ ਹੈ।
ਗਿੱਪੀ ਗਰੇਵਾਲ ਦਾ ਨਵਾ ਵੀਡੀਓੁ ਗੀਤ “ਜ਼ਾਲਮ” ਇੱਕ ਸਿੱਖ ਨੌਜਵਾਨ ਦੀ ਕਹਾਣੀ ਬਿਆਨ ਕਰਦਾ ਹੈ, ਜੋ ਫੌਜੀ ਬਨਣਾ ਚਾਹੁੰਦਾ ਹੈ, ਪਰ ਪੁਲਿਸ ਦਾ ਤਸ਼ੱਦਦ ਉਸਨੂੰ ਹਥਿਆਰਬੰਦ ਸੰਘਰਸ਼ ਦੇ ਰਾਹ ‘ਤੇ ਲੈ ਆਉਂਦਾ ਹੈ।ਇਹ ਵੀਡੀਓੁ ਵੱਖ-ਵੱਖ ਚੈਨਲਾਂ ਅਤੇ ਸ਼ੋਸ਼ਲ ਮੀਡੀਆ ‘ਤੇ ਵਿਖਾਇਆ ਜਾ ਰਿਹਾ ਹੈ।
ਇਸ ਗੀਤ ਦੇ ਅੰਤ ਵਿੱਚ ਪੰਜਾਬੀ ਵਿੱਚ ਲਿਖੀਆਂ ਲਾਈਨਾਂ ਇਉਂ ਹਨ:
“ਕਦੋਂ ਦਿੱਤਾ ਇਨਸਾਫ ਅਦਾਲਤਾਂ ਨੇ, ਝੋਲੀ ਅੱਡਿਆਂ ਅਸਾਂ ਨੂੰ ਅੱਜ ਤੱਕ ਲੋਕੋ
ਲੰਮੀ ਉਮਰ ਤੋਂ ਉਡੀਕ ਇੱਥੇ ਫੈਸਲੇ ਦੀ, ਮੰਗੀ ਭੀਖ ਨਹੀਂ! ਮੰਗੇ ਸੀ ਹੱਕ ਲੋਕੋ
ਨੱਕ ਰਗੜਿਆਂ ਮਿਲਣ ਨਾ ਹੱਕ ਦਿੰਦੇ, ਪੈਂਦਾ ਭੰਨਣਾ ਹੱਕਾਂ ਲਈ ਨੱਕ ਲੋਕੋ”
ਪੰਜਾਬ ਕਾਂਗਰਸ ਦੇ ਆਰਥਿਕ ਅਤੇ ਰਾਜਸੀ ਯੋਜਨਾ ਸੈੱਲ ਦੇ ਚੇਅਰਮੈਨ ਇਸ਼ਵਰਜੋਤ ਸਿੰਘ ਚੀਮਾਂ ਨੇ ਗਿੱਪੀ ਗਰੇਵਾਲ ਖਿਲਾਫ ਖਾੜਕੂਵਾਦ ( ਕਾਂਗਰਸੀ ਆਗੂ ਅਨੁਸਾਰ ਅੱਤਵਾਦ) ਨੂੰ ਵਡਿਆਉਣ ਲਈ ਕੇਸ ਦਰਜ਼ ਕਰਨ ਦੀ ਮੰਗ ਕੀਤੀ ਹੈ।
ਚੇਅਰਮੈਨ ਨੇ ਕਿਹਾ ਕਿ ਮੈ ਕਾਂਗਰਸ ਦੇ ਉਪਰਲੇ ਲੀਡਰਾਂ ਦੇ ਧਿਆਨ ਵਿੱਚ ਇਹ ਮਾਮਲਾ ਲਿਆਦਾ ਹੈ ਅਤੇ ਅਸੀਂ ਇਸਨੂੰ ਪੁਰੀ ਗੰਭੀਰਤਾ ਨਾਲ ਲੈ ਰਹੇ ਹਾਂ। ਜੇਕਰ ਪੁਲਿਸ ਨੇ ਇਸ ਸਬੰਧੀ ਕੋਈ ਕਾਰਵਾਈ ਨਾ ਕੀਤੀ ਤਾਂ ਇਸ ਖਿਲਾਫ ਪੁਰੇ ਪੰਜਾਬ ਵਿੱਚ ਰੋਸ ਮੁਜ਼ਾਹਰੇ ਕੀਤੇ ਜਾਣਗੇ।
