ਨਵੀਂ ਦਿੱਲੀ (6 ਅਕਤੂਬਰ,2014): ਕੈਨੇਡਾ ਦੇ ਦੌਰੇ ਤੇ ਆਪਣੇ ਪਰਿਵਾਰਕ ਮੈਂਬਰਾਂ ਨਾਲ ਗਏ ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਮਨਜੀਤ ਸਿੰਘ ਜੀ.ਕੇ. ਨੇ “ਸਤਨਾਮ ਐਜੂਕੇਸ਼ਨ ਸੋਸਾਇਟੀ” ਵੱਲੋਂ ਉਸਾਰੇ ਗਏ “ਖਾਲਸਾ ਸੈਕੇਂਡਰੀ ਸਕੂਲ, ਸਰੇ”, ਬ੍ਰਿਟੀਸ਼ ਕੋਲੰਬੀਆ ਦਾ ਉਦਘਾਟਨ ਕੀਤਾ।
ਸੋਸਾਇਟੀ ਦੇ ਡਾਇਰੈਕਟਰ ਰਿਪੂਦਮਨ ਸਿੰਘ ਮਲਿਕ ਦੇ ਵਿਸ਼ੇਸ਼ ਸੱਦੇ ਤੇ ਉਧਘਾਟਨ ਦੌਰਾਨ ਪੁੱਜੇ ਜੀ.ਕੇ. ਨੇ ਸਕੂਲ ਵਿਚ ਵਧੀਆ ਤਰੀਕੇ ਨਾਲ ਬਣਾਏ ਗਏ ਆਡੀਟੋਰੀਅਮ, ਜਿਮ, ਫੁਟਬਾਲ ਦਾ ਮੈਦਾਨ, 400 ਮੀਟਰ ਦਾ ਅਥਲੈਟਿਕ ਟ੍ਰੈਕ ਅਤੇ ਕਲਾਸ ਰੂਮ ਦਾ ਜਾਇਜ਼ਾ ਲੈਣ ਉਪਰੰਤ ਮਿਆਰੀ ਪੰਥਕ ਸਿੱਖਿਆ ਦੇਣ ਲਈ ਸੋਸਾਇਟੀ ਵੱਲੋਂ ਕੀਤੇ ਜਾ ਰਹੇ ਉਪਰਾਲਿਆਂ ਦੀ ਸ਼ਲਾਘਾ ਕੀਤੀ।
ਜੀ. ਕੇ. ਬਾਦਲ ਦਲ ਦੇ ਹਿਮਾਇਤੀਆਂ ਵਲੋਂ ਮਿਲੇ ਪਿਆਰ ਲਈ ਉਨ੍ਹਾਂ ਦਾ ਧੰਨਵਾਦ ਕੀਤਾ। ਇਸ ਮੌਕੇ ਅਜ਼ਾਦੀ-ਪਸੰਦ ਸਿੱਖਾਂ ਵਲੋਂ ਜੀ. ਕੇ. ਤੋਂ ਬਾਦਲ ਦਲ ਦੀ ਕਾਰਗੁਜ਼ਾਰੀ ਬਾਰੇ ਜਵਾਬਤਲਬੀ ਕੀਤੇ ਜਾਣ ਦੀ ਵੀ ਖਬਰ ਹੈ। ਜੀ. ਕੇ. ਨੇ ਭਾਰਤ ਦੇ ਸਵਿਧਾਨ ‘ਚ ਆਸਥਾ ਜਤਾਉਣ ਵਾਲੇ ਸਿੱਖਾਂ ਨੂੰ ਭਾਰਤ ਪਰਤਨ ਦਾ ਸੱਦਾ ਵੀ ਦਿੱਤਾ।
ਵੱਖ-ਵੱਖ ਜਥੇਬੰਦੀਆਂ ਵੱਲੋਂ ਜੀ.ਕੇ. ਨਾਲ ਮੁਲਾਕਾਤ ਕਰਦੇ ਹੋਏ ਦਿੱਲੀ ਕਮੇਟੀ ਵੱਲੋਂ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀ ਛਪਾਈ ਵਿਦੇਸ਼ ‘ਚ ਕਰਨ ਵਾਸਤੇ ਲਗਾਏ ਜਾਣ ਵਾਲੇ ਸੰਭਾਵੀ ਛਾਪੇਖਾਨੇ ਲਈ ਵੀ ਧੰਨਵਾਦ ਜਤਾਇਆ ਗਿਆ।
ਆਪਣੇ ਇੰਗਲੈਂਡ ਅਤੇ ਯੂਰਪ ਦੌਰੇ ਵਾਙ ਜੀ. ਕੇ. ਨੇ ਕੈਨੇਡਾ ਫੇਰੀ ਮੌਕੇ ਵੀ ਭਾਰਤੀ ਰਾਸ਼ਰਟਵਾਦ ਦਾ ਪ੍ਰਚਾਰ ਜੋਰਾਂ ਉੱਤੇ ਰੱਖਿਆ ਅਤੇ ਕਿਹਾ ਕਿ ਉਹ ਪਰਵਾਸੀ ਸਿੱਖਾਂ ਨੂੰ ਭਾਰਤੀ ਰਾਸ਼ਟਰਵਾਦ ਦੇ ਘੇਰੇ ਹੇਠ ਲਿਆੳੇਣ ਲਈ ਹਰ ਸੰਭਵ ਯਤਨ ਕਰੇਗਾ।
