May 19, 2014

ਜਲੰਧਰ, (18 ਮਈ 2014):- ਨੂਰ ਮਹਿਲ ਦੇ ਵਿਵਾਦਤ ਅਤੇ ਚਰਚਿੱਤ ਡੇਰੇ ਦਿਵਯ ਜਯੋਤੀ ਜਾਗਰਿਤੀ ਸੰਸਥਾਨ ਦੇ ਮੁਖੀ ਆਸ਼ੂਤੋਸ਼ ਦੀ ਮੌਤ ਦੇ ਰਹੱਸ ਦੇ ਬਰਕਰਾਰ ਰਹਿੰਦਿਆਂ ਆਸ਼ੂਤੋਸ਼ ਦੇ ਪੁੱਤਰ ਦਲੀਪ ਝਾਅ ਨੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਕੋਲੋਂ ਮੰਗ ਕੀਤੀ ਹੈ ਕਿ ਉਨ੍ਹਾਂ ਨੂੰ ਨੂਰਮਹਿਲ ਦੇ ਡੇਰੇ ਤੋਂ ਉਸ ਦੇ ਪਿਤਾ ਦੀ ਮ੍ਰਿਤਕ ਦੇਹ ਲੈ ਕੇ ਦਿੱਤੀ ਜਾਵੇ ਅਤੇ ਡੇਰੇ ਅੰਦਰ ਚੱਲ ਰਹੇ ਪਾਖੰਡ ਨੂੰ ਬੇਪਰਦਾ ਕੀਤਾ ਜਾਵੇ। ਉਹ ਅੱਜ ਇੱਥੇ ਪ੍ਰੈਸ ਕਲੱਬ ‘ਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰ ਰਹੇ ਸਨ। ਉਨ੍ਹਾਂ ਸ਼ੱਕ ਜ਼ਾਹਰ ਕੀਤਾ ਕਿ ਉਨ੍ਹਾਂ ਦੇ ਪਿਤਾ ਦੀ ਮੌਤ ਕਿਸੇ ਗ਼ੈਰ ਕੁਦਰਤੀ ਵਰਤਾਰੇ ਨਾਲ ਹੋਈ ਹੈ ਤੇ ਇਸੇ ਲਈ ਸੱਚ ਨੂੰ ਲੁਕਾਉਣ ਲਈ ਸਮਾਧੀ ਵਿੱਚ ਜਾਣ ਦਾ ਪਾਖੰਡ ਰਚਿਆ ਗਿਆ ਹੈ।