ਲੁਧਿਆਣਾ( 13 ਅਪ੍ਰੈਲ, 2015): ਪੰਜਾਬ ਪੁਲਿਸ ਦੇ ਇੱਕ ਥਾਣੇਦਾਰ ਰਿਚਾਰਡ ਮਸੀਹ ਵੱਲੋਂ ਬੰਦੀ ਸਿੰਘਾਂ ਦੀ ਰਿਹਾਈ ਲਈ ਭੁੱਖ ਹੜਤਾਲ ‘ਤੇ ਚੱਲ ਰਹੇ ਬਾਪੂ ਸੂਰਤ ਸਿੰਘ ਦੇ ਸਪੱਤਰ ਰਵਿੰਦਰਜੀਤ ਸਿੰਘ ਗੋਗੀ ਦੀ ਲੁਧਿਆਣਾ ਅਦਾਲਤ ਦੇ ਖਾਰਜ਼ੇ ਵਿੱਚ ਬੂਰੀ ਤਰਾਂ ਕੁੱਟਮਾਰ ਕੀਤੀ ਗਈ।
ਰਵਿੰਦਰ ਸਿੰਘ ਗੋਗੀ ਨੂੰ ਲੁਧਿਆਣਾ ਅਦਾਲਤ ਵਿੱਚ ਚੌਥੀ ਵਾਰ ਪੇਸ਼ ਕੀਤਾ ਗਿਆ ਸੀ, ਉਨ੍ਹਾਂ ਨੂੰ ਬਾਪੂ ਸੂਰਤ ਸਿੰਘ ਦੀ ਭੁੱਖ ਹੜਤਾਲ ਦੇ ਸਬੰਧ ਵਿੱਚ ਧਾਰਾ 107/151 ਅਧੀਨ ਪੰਜਾਬ ਪੁਲਿਸ ਵੱਲੋਂ ਗ੍ਰਿਫਤਾਰ ਕਰਕੇ ਜੇਲ ਭੇਜ ਦਿੱਤਾ ਗਿਆ ਸੀ।ਅਦਾਲਤ ਵਿੱਚ ਦੁਪਿਹਰ ਦੀ ਖਾਣੇ ਦੀ ਛੁੱਟੀ ਸਮੇਂ ਇਹ ਘਟਨਾ ਵਾਪਰੀ ਹੈ।
ਇਸ ਘਟਨਾ ਦੀ ਚਸ਼ਮਦੀਦ ਗਵਾਹ ਬੀਬੀ ਸਰਵਿੰਦਰ ਕੌਰ ਪੁੱਤਰੀ ਬਾਪੂ ਸੂਰਤ ਸਿੰਘ ਨੇ ਸਿੱਖ ਸਿਆਸਤ ਨੂੰ ਫੋਨ ‘ਤੇ ਦੱਸਿਆ ਕਿ ਇਸ ਤੋਂ ਪਹਿਲਾਂ ਪੇਸ਼ੀਆਂ ‘ਤੇ ਪੁਲਿਸ ਭਾਈ ਗੋਗੀ ਨੂੰ ਅਦਾਲਤੀ ਖਾਰਜ਼ੇ ਵਿੱਚ ਰੱਖਦੀ ਸੀ ਅਤੇ ਉਨ੍ਹਾਂ ਦੀ ਪੇਸ਼ੀ ਦੀ ਵਾਰੀ ਆਉਣ ‘ਤੇ ਉਨ੍ਹਾਂ ਨੂੰ ਅਦਾਲਤ ਵਿੱਚ ਲਜਾਇਆ ਜਾਂਦਾ ਸੀ। ਪਰ ਇਸ ਵਾਰੀ ਸਹਾਇਕ ਥਾਣੇਦਾਰ ਰਿਚਾਰਡ ਮਸੀਹ ਵੱਲੋਂ ਘੜੀ ਘੜਾਈ ਸਾਜਿਜ਼ ਅਨੁਸਾਰ ਉਨ੍ਹਾਂ ਨੂੰ 1.30 ਵਜੇ ਖਾਰਜ਼ੇ ਤੋਂ ਬਾਹਰ ਕੱਢਿਆ।
ਬੀਬੀ ਸਰਵਿੰਦਰ ਕੌਰ ਨੇ ਦੱਸਿਆ ਕਿ ਜਿਉਂ ਹੀ ਭਾਈ ਗੋਗੀ ਨੂੰ ਬਾਹਰ ਲਿਆਦਾ ਗਿਆ, ਤਾਂ ਬਾਹਰ ਇੰਤਜ਼ਾਰ ਕਰ ਰਹੇ ਪੱਤਰਕਾਰਾਂ ਨੇ ਉਨ੍ਹਾਂ ਨਾਲ ਸਵਾਲ ਕਰਨੇ ਸ਼ੁਰੂ ਕਰ ਦਿੱਤੇ ਅਤੇ ਉਨ੍ਹਾਂ ਦੀਆਂ ਫੋਟੋਆਂ ਖਿੱਚਣ ਲੱਗੇ ਅਤੇ ਇਸੇ ਦੌਰਾਨ ਹੀ ਥਾਣੇਦਾਰ ਮਸੀਹ ਭਾਈ ਗੋਗੀ ਨੂੰ ਗਾਲ੍ਹਾਂ ਕੱਢਣ ਲੱਗਾ।
ਜਿਊਂ ਹੀ ਭਾਈ ਗੋਗੀ ਨੇ ਥਾਣੇਦਾਰ ਮਸੀਹ ਨੂੰ ਗਲਤ ਨਾ ਬੋਲਣ ਲਈ ਕਿਹਾ ਤਾਂ ਉਸਨੇ ਭਾਈ ਗੋਗੀ ਨੂੰ ਥੱਕੇਮਾਰ ਕੇ ਖਾਰਜ਼ੇ ਦੇ ਅੰਦਰ ਧੱਕ ਦਿੱਤਾ ਅਤੇ ਉਨਾਂ ਨੂੰ ਬੁਰੀ ਤਰਾਂ ਕੁਟਿਆ। ਥਾਣੇਦਾਰ ਨੇ ਉਨ੍ਹਾਂ ਦੀ ਪਿੱਠ ਅਤੇ ਗਰਦਨ ‘ਤੇ ਮੁੱਕਿਆਂ ਨਾਲ ਮਾਰ ਕੁਟਾਈ ਕੀਤੀ।
ਸੂਤਰਾਂ ਨੇ ਸਿੱਖ ਸਿਆਸਤ ਨੂੰ ਦੱਸਿਆ ਕਿ ਹੁਣ ਰਵਿੰਦਰਜੀਤ ਸਿੰਘ ਦੀ ਧੌਣ ਵਿੱਚ ਸਖਤ ਦਰਦ ਹੋ ਰਿਹਾ ਹੈ ਅਤੇ ਉਨ੍ਹਾਂ ਨੂੰ ਡਾਕਟਰੀ ਸਹਾਇਤਾ ਦੀ ਬੜੀ ਜਰੂਰਤ ਹੈ।
ਬੰਦੀ ਸਿੰਘਾਂ ਦੀ ਰਿਹਾਈ ਲਈ ਜੂਝ ਰਹੇ ਬਾਪੂ ਸੂਰਤ ਸਿੰਘ ਦੇ ਹਮਾਇਤੀਆਂ ਨੇ ਦੋਸ਼ ਲਾਇਆ ਕਿ ਇਹ ਸਭ ਥਾਣੇਦਾਰ ਵੱਲੋਂ ਰਵਿੰਦਰਜੀਤ ਸਿੰਘ ਗੋਗੀ ਨੂੰ ਕੁੱਟਣ ਦੀ ਘੜੀ ਘੜਾਈ ਯੋਜਨਾ ਸੀ। ਉਨ੍ਹਾਂ ਕਿਹਾ ਕਿ ਪੰਜਾਬ ਸਰਕਾਰ ਬਾਪੂ ਸੁਰਤ ਸਿੰਘ ਦੇ ਪਰਿਵਾਰਕ ਮੈਂਬਰਾਂ ਨੂੰ ਡਰਾਉਣ ਲਈ ਬੜੇ ਕੋਝੇ ਹੱਥ ਕੰਡੇ ਵਰਤ ਰਹੀ ਹੈ।ਜਦੋਂ ਅਦਾਲਤ ਵਿੱਚ ਦੁਪਿਹਰ ਦੇ ਖਾਣੇ ਦੀ ਛੁੱਟੀ ਸਮਾਂ ਸੀ ਤਾਂ ਉਨਾਂ ਨੂੰ ਬਾਹਰ ਕਿਉਂ ਕੱਢਿਆ ਗਿਆ।
ਸੂਤਰਾਂ ਅਨੁਸਾਰ ਥਾਣੇਦਾਰ ਮਸੀਹ ਨੇ ਰਵਿੰਦਰਜੀਤ ਸਿੰਘ ਗੋਗੀ ਦੀਆਂ ਫੋਟੋਆਂ ਖਿੱਚਣ ਵਾਲੇ ਇੱਕ ਪੱਤਰਕਾਰ ਦੀ ਵੀ ਕੁੱਟਮਾਰ ਕੀਤੀ।ਇਹ ਘਟਨਾ ਪੰਜਾਬ ਪੁਲਿਸ ਦੀ ਖੂੰਖਾਰਤਾ ਮਾਨਸਿਕਤਾ ਨੂੰ ਪੁਰੀ ਤਰਾਂ ਨੰਗਿਆਂ ਕਰਦੀ ਹੈ।
