ਹਸਨਪੁਰ (1 ਜੁਲਾਈ, 2015): ਲੰਘੇ ਸਿੱਖ ਸੰਘਰਸ਼ ਨਾਲ ਸਬੰਧਿਤ ਸਿੱਖ ਸਿਆਸੀ ਨਜ਼ਰਬੰਦਾਂ ਦੀ ਰਿਹਾਈ ਲਈ ਪਿਛਲੇ 167 ਦਿਨਾਂ ਤੋਂ ਭੁੱਖ ਹੜਤਾਲ ’ਤੇ ਬੈਠੇ ਬਾਪੂ ਸੂਰਤ ਸਿੰਘ ਖਾਲਸਾ ਦੀ ਸਿਹਤ ਅੱਜ ਦੁਪਹਿਰ 1 ਵਜੇ ਅਚਾਨਕ ਬੇਹੱਦ ਵਿਗੜ ਗਈ ਅਤੇ ਫ਼ਿਰ ਉਹ ਨੀਮ ਬੇਹੋਸ਼ੀ ਦੀ ਹਾਲਤ ਵਿਚ ਚਲੇ ਗਏ।
ਉਨ੍ਹਾਂ ਨੂੰ ਮਿਲਣ ਲਈ ਆਈਆਂ ਸੰਗਤਾਂ ਵੱਲੋਂ ਕੀਤੇ ਓਹੜ-ਪੋਹੜ, ਸੇਵਾ ਤੇ ਅਰਦਾਸ ਉੱਪਰੰਤ ਸ਼ਾਮ ਨੂੰ ਬਾਪੂ ਦੀ ਸਿਹਤ ਵਿਚ ਮਾਮੂਲੀ ਜਿਹਾ ਸੁਧਾਰ ਆਇਆ ਅਤੇ ਉਨਾਂ ਅੱਖ ਪੁੱਟੀ, ਦੋ ਘੁੱਟ ਪਾਣੀ ਪੀਤਾ ।
ਕੁਝ ਠੀਕ ਹੋਣ ‘ਤੇ ਉਨਾਂ ਆਖਿਆ ਕਿ ਮੇਰੀ ਸ਼ਹੀਦੀ ’ਤੇ ਪੰਜਾਬ ਦੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਮੇਰਾ ਕਾਤਲ ਐਲਾਨਿਆ ਜਾਵੇ। ਬਾਪੂ ਨੇ ਆਖਿਆ ਕਿ ਸਰਕਾਰ ਸਿੱਖਾਂ ਦੀਆਂ ਕੁਰਬਾਨੀ ਪ੍ਰਤੀ ਦਿ੍ਰੜਤਾ ਨੂੰ ਭੁੱਲ ਗਈ ਹੈ ਜਿਸ ਕਾਰਨ ਉਸ ਨੇ ਮੇਰੀ ਭੁੱਖ ਹੜਤਾਲ ਨੂੰ ਬਹੁਤੀ ਗੰਭੀਰਤਾ ਨਾਲ ਨਹੀਂ ਲਿਆ।
ਉਨਾਂ ਆਖਿਆ ਕਿ ਮੇਰੀ ਸ਼ਹਾਦਤ ਤੋਂ ਬਾਅਦ ਸਰਕਾਰ ਦਾ ਇਹ ਭੁਲੇਖਾ ਦੂਰ ਹੋ ਜਾਵੇਗਾ ਕਿ ਸਿੱਖਾਂ ਵਿਚੋ ਕੁਰਬਾਨੀ ਦਾ ਜ਼ਜ਼ਬਾ ਖ਼ਤਮ ਹੋ ਗਿਆ ਹੈ। ਇਸ ਸਮੇਂ ਉਨਾਂ ਆਖਿਆ ਕਿ ਉਹ 6 ਜੁਲਾਈ ਨੂੰ ਫ਼ੈਸਲਾਕੁੰਨ ਐਲਾਨ ਜ਼ਰੂਰ ਕਰਨਗੇ ਤੇ ਉਨਾਂ ਸਿੱਖ ਸੰਗਤਾਂ ਨੂੰ ਇਸ ਦਿਨ ਦੇ ਪੰਥਕ ਇਕੱਠ ਵਿਚ ਪੁੱਜਣ ਦੀ ਅਪੀਲ ਵੀ ਕੀਤੀ।
ਬਾਪੂ ਦੇ ਸਪੁੱਤਰ ਰਵਿੰਦਰਜੀਤ ਸਿੰਘ ਗੋਗੀ ਅਤੇ ਬੇਟੀ ਸਰਵਿੰਦਰ ਕੌਰ ਨੇ ਇਸ ਸਮੇਂ ਦੱਸਿਆ ਕਿ ਪਿਛਲੇ ਦੋ ਤਿੰਨ ਦਿਨਾਂ ਤੋਂ ਬਾਪੂ ਦੀ ਸਿਹਤ ਕਾਫੀ ਢਿੱਲੀ ਹੈ। ਸੰਘਰਸ਼ ਕਮੇਟੀ ਦੇ ਮੈਂਬਰ ਜੰਗ ਸਿੰਘ, ਭਵਨਦੀਪ ਸਿੰਘ, ਐਡਵੋਕੇਟ ਗੁਰਜਿੰਦਰ ਸਿੰਘ ਸਾਹਨੀ, ਜਸਵੀਰ ਸਿੰਘ ਖੰਡੂਰ ਅਤੇ ਸੁਰਿੰਦਰ ਸਿੰਘ ਠੀਕਰੀਵਾਲ ਨੇ ਸਰਕਾਰ ਨੂੰ ਚਿਤਾਵਨੀ ਦਿੱਤੀ ਹੈ ਕਿ ਉਹ ਬੰਦੀ ਸਿੰਘਾਂ ਦੀ ਰਿਹਾਈ ਲਈ ਤੁਰੰਤ ਐਲਾਨ ਕਰੇ। ਜੇ ਬਾਪੂ ਨੂੰ ਕੁਝ ਹੁੰਦਾ ਹੈ ਤਾਂ ਉਸ ਦੀ ਜਿੰਮੇਵਾਰੀ ਸਰਕਾਰ ਦੀ ਹੋਵੇਗੀ।
