ਵਾਘਾ ਸਰਹੱਦ: ਐਤਵਾਰ ਨੂੰ ਭਾਰਤ-ਪਾਕਿਸਤਾਨ ਦੀ ਵਾਘਾ-ਅਟਾਰੀ ਸਰਹੱਦ ‘ਤੇ ਰੋਜ਼ਾਨਾ ਹੋਣ ਵਾਲੀ ਬੀਟਿੰਗ ਰਿਟ੍ਰੀਟ (ਝੰਡੇ ਦੀ ਰਸਮ) ਨੂੰ ਦੇਖਣ ਵਾਲਿਆਂ ਨੂੰ ਚਾਰ ਦਿਨਾਂ ਬਾਅਦ ਇਜਾਜ਼ਤ ਮਿਲੀ।
ਹਾਲਾਂਕਿ ਇਸ ਦੌਰਾਨ ਪਾਕਿਸਤਾਨੀ ਦਰਸ਼ਕਾਂ ਵਲੋਂ ਕਸ਼ਮੀਰ ਦੀ ਅਜ਼ਾਦੀ ਦੇ ਹੱਕ ਵਿਚ ਨਾਅਰੇ ਵੀ ਲਾਏ ਗਏ। ਇਸ ਦੌਰਾਨ ਮੀਡੀਆ ਨੇ ਵਾਘਾ-ਅਟਾਰੀ ਸਰਹੱਦ ‘ਤੇ ਮੌਜੂਦ ਕੁਝ ਲੋਕਾਂ ਨਾਲ ਗੱਲਬਾਤ ਵੀ ਕੀਤੀ।
ਅਟਾਰੀ ਸਰਹੱਦ ਟਰੱਕ ਐਸੋਸੀਏਸ਼ਨ ਦੇ ਗੁਰਵਿੰਦਰ ਸਿੰਘ ਨੇ ਦੱਸਿਆ, “ਇਥੇ ਅਜਿਹਾ ਕੋਈ ਮਾਹੌਲ ਨਹੀਂ, ਜਿਹੋ ਜਿਹਾ ਕਾਰਗਿਲ ਵੇਲੇ ਸੀ, ਜਦੋਂ ਇਥੇ ਵੱਡੀ ਤਾਦਾਦ ‘ਚ ਫੌਜ ਮੌਜੂਦ ਸੀ। ਇਥੇ ਮਾਹੌਲ ਬਿਲਕੁਲ ਠੀਕ ਹੈ ਅਤੇ ਜੰਗ ਵਰਗੀ ਕੋਈ ਗੱਲ ਨਹੀਂ ਹੈ।”
ਗੁਰਵਿੰਦਰ ਸਿੰਘ ਦਾ ਕਹਿਣਾ ਹੈ, “ਸਾਡੀ ਐਸੋਸੀਏਸ਼ਨ ਦੇ ਕੋਲ 450 ਟਰੱਕ ਹਨ ਪਰ ਇਸ ‘ਤਣਾਅ’ ਦਾ ਸਾਡੇ ਕੰਮ ‘ਤੇ ਕੋਈ ਅਸਰ ਨਹੀਂ ਪਿਆ ਹੈ। ਸਾਡਾ ਕੰਮ ਰੋਜ਼ ਵਾਂਗ ਹੀ ਚੱਲ ਰਿਹਾ ਹੈ। ਇਹ ਸਾਰਾ ਕੁਝ ਰਾਜਨੀਤਕ ਸਟੰਟ ਹੈ, ਲੋਕਾਂ ਨੂੰ 10 ਕਿਲੋਮੀਟਰ ਪਿੱਛੇ ਜਾਣ ਨੂੰ ਕਿਹਾ ਜਾ ਰਿਹਾ ਹੈ। ਕਿੱਥੇ ਜਾਣਗੇ ਲੋਕ? ਕਿਸਾਨਾਂ ਦੀ ਤਿਆਰ ਫਸਲ ਖੇਤਾਂ ‘ਚ ਖੜੀ ਹੈ, ਉਸਨੂੰ ਛੱਡ ਕੇ ਕਿੱਥੇ ਜਾਣ?”
ਲੋਕਾਂ ਦਾ ਕਹਿਣਾ ਹੈ ਕਿ ਪੰਜਾਬ ਦਾ ਅਰਥਚਾਰਾ ਖੇਤੀ ‘ਤੇ ਨਿਰਭਰ ਹੈ ਅਤੇ ਅਜਿਹੇ ਵਿਚ ਲੋਕਾਂ ਨੂੰ ਆਪਣੇ ਖੇਤ ਛੱਡ ਕੇ ਜਾਣ ਨੂੰ ਕਿਹਾ ਜਾ ਰਿਹਾ ਹੈ।
ਵਾਘਾ ਸਰਹੱਦ ਦੇ ਨੇੜੇ ਦੁਕਾਨ ਚਲਾਉਣ ਵਾਲੇ ਕੰਵਲਜੀਤ ਸਿੰਘ ਦਾ ਕਹਿਣਾ ਹੈ, “ਇਸ ਥਾਂ ‘ਤੇ ਇਹ ਹਜ਼ਾਰ ਲੋਕ ਕੰਮ ਕਰਦੇ ਹਨ। ਜੋ ਦੁਕਾਨ, ਰੇਹੜੀ ਜਾਂ ਪਾਰਕਿੰਗ ਤੋਂ ਪੈਸੇ ਕਮਾ ਕੇ ਆਪਣਾ ਗੁਜ਼ਾਰਾ ਕਰਦੇ ਹਨ, ਪਰ ਚਾਰ ਦਿਨਾਂ ਤੋਂ ਸਾਰਾ ਕੰਮ ਬੰਦ ਪਿਆ ਹੈ।”
ਉਥੇ ਇਕ ਹੋਰ ਦੁਕਾਨਦਾਰ ਕੁਲਦੀਪ ਨੇ ਦੱਸਿਆ, “ਚਾਰ ਦਿਨਾਂ ਤੋਂ ਬਾਅਦ ਸਥਿਤੀ ਥੋੜ੍ਹੀ ਬਦਲੀ ਹੈ, ਕਿਉਂਕਿ ਬੀ.ਐਸ.ਐਫ. ਵਾਲੇ ਪਿੱਛਿਉਂ ਕਿਸੇ ਨੂੰ ਆਉਣ ਨਹੀਂ ਸੀ ਦਿੰਦੇ। ਪਰ ਹੁਣ ਲੋਕ ਇਸ ਪਾਸੇ ਆ ਰਹੇ ਹਨ। ਇਥੇ ਕੋਈ ਖਤਰਾ ਨਹੀਂ ਹੈ।”
ਕੁਝ ਲੋਕਾਂ ਨੇ ਦੱਸਿਆ ਕਿ ਸਰਹੱਦ ਪਾਰ ਤੋਂ ਆਉਣ ਵਾਲੇ ਟਰੱਕ ਡਰਾਈਵਰਾਂ ਨੇ ਵੀ ਦੱਸਿਆ ਕਿ ਪਾਕਿਸਤਾਨ ਵਾਲੇ ਪਾਸੇ ਕੋਈ ਤਣਾਅ ਦਾ ਮਾਹੌਲ ਨਹੀਂ ਹੈ। ਲੋਕ ਕਹਿ ਰਹੇ ਹਨ ਕਿ ਸਰਕਾਰ ਜ਼ਬਰਦਸਤੀ ਸਾਨੂੰ 10 ਕਿਲੋਮੀਟਰ ਦੂਰ ਜਾਣ ਨੂੰ ਕਹਿ ਰਹੀ ਹੈ।
