ਅੰਮ੍ਰਿਤਸਰ (15 ਅਕਤੂਬਰ, 2014): ਸਿੱਖ ਗੁਰੂ ਸਹਿਬਾਨਾਂ ਦੇ ਹੁਕਮਾਂ ਅਨੁਸਾਰ ਲੋੜਵੰਦਾਂ ਅਤੇ ਹੜ੍ਹਾਂ ਦੀ ਮੁਸੀਬਤ ਦਾ ਸਾਹਮਣਾ ਕਰ ਰਹੇ ਕਸ਼ਮੀਰ ਦੇ ਮੁਸਲਿਮ ਭਾਈਚਾਰੇ ਲਈ ਅੱਜ ਸਿੱਖਾਂ ਦੀ ਕੇਂਦਰੀ ਸੰਸਥਾ ਸ਼੍ਰੌਮਣੀ ਕਮੇਟੀ ਵੱਲੋਂ ਹੜ ਪੀੜਤਾਂ ਨੂੰ ਦਿੱਤੀ ਜਾ ਰਹੀ ਸਹਾਇਤਾ ਨੂੰ ਅੱਗੇ ਵਧਾਉਦਿਆਂ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਅਵਤਾਰ ਸਿੰਘ ਮੱਕੜ ਨੇ ਪੰਜ ਟਰੱਕ ਰਾਹਤ ਸਮੱਗਰੀ ਦੇ ਜੰਮੂ ਕਸ਼ਮੀਰ ਲਈ ਰਵਾਨਾ ਕੀਤੇ ਹਨ।
ਇਸ ਮੌਕੇ ਪ੍ਰਧਾਨ ਅਵਤਾਰ ਸਿੰਘ ਨੇ ਕਿਹਾ ਕਿ ਸਿੱਖ ਮਨੁੱਖਤਾ ਦੀ ਸੇਵਾ ਲਈ ਹਮੇਸ਼ਾ ਅੱਗੇ ਹੋਕੇ ਕੰਮ ਕਰਨ ਵਾਲੀ ਕੌਮ ਹੈ।ਸ਼ੌਮਣੀ ਕਮੇਟੀ ਵੱਲੋਂ ਸ੍ਰੀਨਗਰ ਵਿਖੇ ਗੁਰਦੁਆਰਾ ਸ਼ਹੀਦ-ਬੁੰਗਾ ਵਿਖੇ ਰਾਹਤ ਕੈਂਪ ਸ਼ੁਰੂ ਕੀਤਾ ਜੋ 9 ਸਤੰਬਰ ਤੋਂ ਲਗਾਤਾਰ ਜਾਰੀ ਹੈ।ਜਿਥੋਂ ਹਰ ਲੋੜਵੰਦ ਦੀ ਲੋੜ ਪੂਰੀ ਕੀਤੀ ਜਾ ਰਹੀ ਹੈ।
ਉਨ੍ਹਾਂ ਦੱਸਿਆ ਕਿ ਅੱਜ ਪੰਜ ਟਰੱਕ ਰਾਹਤ ਸਮੱਗਰੀ ਭੇਜੀ ਜਾ ਰਹੀ ਹੈ, ਜਿਸ ‘ਚ ਚਾਵਲ 100 ਕੁਇੰਟਲ, ਦਾਲ 50 ਕੁਇੰਟਲ, ਖੰਡ 30 ਕੁਇੰਟਲ, ਚਾਹ ਪੱਤੀ 150 ਕਿਲੋ, ਆਟਾ 50 ਕੁਇੰਟਲ, ਹਲਦੀ 150 ਕਿਲੋ, ਮਿਰਚ 150 ਕਿਲੋ, ਸਾਬਨ 100 ਕਿਲੋ, ਤੇਲ ਸਰਸੋਂ 100 ਕਿਲੋ, ਰਸ 300 ਪੇਟੀ, ਬਿਸਕੁਟ 300 ਪੇਟੀ, ਕੰਬਲ 5000 ਨਗ, ਰਜਾਈਆਂ 1000 ਨਗ, ਤਲਾਈਆਂ 1000 ਨਗ, ਸਿਰਹਾਣੇ 1000 ਨਗ, ਚਾਦਰਾਂ 1000 ਨਗ, ਸ਼ਾਲਾਂ (ਲੋਈਆਂ) 1050 ਨਗ, ਸੂਟ ਜਨਾਨਾਂ 3000 ਨਗ, ਜੈਕਟਾਂ 150 ਨਗ, ਪਜਾਮੇ 500 ਨਗ, ਟੀ ਸ਼ਰਟਾਂ 500 ਨਗ, ਕੱਛਹਰੇ 500 ਨਗ ਤੇ ਦਸਤਾਰਾਂ 200 ਨਗ ਭੇਜੀਆਂ ਗਈਆਂ ਹਨ।
ਉਨ੍ਹਾਂ ਕਿਹਾ ਕਿ ਇਨ੍ਹਾਂ ‘ਚ ਦੋ ਟਰੱਕ ਜੰਮੂ ਕਸ਼ਮੀਰ ਸਟੇਟ ਕਮਿਸ਼ਨ ਫਾਰ ਵੋਮੈਨ ਦੀ ਚੇਅਰਪਰਸਨ ਐਡਵੋਕੇਟ ਬੇਗਮ ਸਮੀਮ ਫਿਰਦੋਸ ਦੀ ਮੰਗ ਅਨੁਸਾਰ ਮੁਸਲਮਾਨ ਭਾਈਚਾਰੇ ਲਈ ਭੇਜੇ ਗਏ ਹਨ। ਕਸ਼ਮੀਰ ਦੇ ਸਿੱਖ ਪੀੜਤਾਂ ਦੀ ਮਦਦ ਬਾਰੇ ਵਿਸ਼ੇਸ਼ ਯਤਨਾਂ ਸਬੰਧੀ ਉਨ੍ਹਾਂ ਦੱਸਿਆ ਕਿ ਇਸ ਬਾਰੇ ਜ਼ਾਇਜ਼ਾ ਲੈਣ ਗਈ ਟੀਮ ਵੱਲੋਂ ਪ੍ਰਾਪਤ ਜਾਣਕਾਰੀ ਦੇ ਅਧਾਰ ‘ਤੇ ਸਬ ਕਮੇਟੀ ਨੇ ਸਿਫਾਰਸ਼ੀ ਰਿਪੋਰਟ ਸੌਂਪ ਦਿੱਤੀ ਹੈ, ਜਿਸ ‘ਤੇ ਅਗਾਮੀ 20 ਅਕਤੂਬਰ ਨੂੰ ਅੰਤ੍ਰਿਗ ਕਮੇਟੀ ਦੀ ਬੈਠਕ ਦੌਰਾਨ ਢੁੱਕਵਾਂ ਫੈਸਲਾ ਲੈ ਲਿਆ ਜਾਵੇਗਾ।
ਇਸ ਮੌਕੇ ਸਕੱਤਰ ਮਨਜੀਤ ਸਿੰਘ, ਵਧੀਕ ਸਕੱਤਰ ਦਿਲਜੀਤ ਸਿੰਘ ਬੇਦੀ, ਪਰਮਜੀਤ ਸਿੰਘ ਸਰੋਆ, ਮਹਿੰਦਰ ਸਿੰਘ ਆਹਲੀ, ਸਤਿੰਦਰ ਸਿੰਘ, ਪ੍ਰਤਾਪ ਸਿੰਘ, ਕੁਲਵਿੰਦਰ ਸਿੰਘ ਰਮਦਾਸ ਆਦਿ ਮੌਜੂਦ ਸਨ।
