ਬੰਗਾ (23 ਮਾਰਚ, 2016): ਕਾਂਗਰਸ ਵੱਲੋਂ ਕੈਪਟਨ ਅਮਰਿੰਦਰ ਸਿੰਘ ਪ੍ਰਧਾਨ ਪੰਜਾਬ ਪ੍ਰਦੇਸ਼ ਕਾਂਗਰਸ ਨੇ ਖਟਕੜ ਕਲਾ ਵਿਖੇ ਸ਼ਹੀਦੀ ਕਾਨਫਰੰਸ ‘ਚ ਕਿਹਾ ਕਿ ਸ਼ਹੀਦਾਂ ਦੀਆਂ ਕੁਰਬਾਨੀਆਂ ਨੂੰ ਅਸੀਂ ਭੁੱਲ ਨਹੀਂ ਸਕਦੇ । ਕੈਪਟਨ ਨੇ ਆਖਿਆ ਕਿ ਰਾਜ ਅੰਦਰ ਭਿ੍ਸ਼ਟਾਚਾਰ ਤੇ ਬੇਰੋਜ਼ਗਾਰੀ ਦਾ ਬੋਲਬਾਲਾ ਹੈ ।
ਉਨ੍ਹਾਂ ਕਿਹਾ ਕਿ 75 ਫੀਸਦੀ ਨੌਜਵਾਨ ਨਸ਼ਿਆਂ ਦੀ ਦਲਦਲ ‘ਚ ਫਸੇ ਹੋਏ ਹਨ । ਕੈਪਟਨ ਨੇ ਕਿਹਾ ਕਿ ਕਾਂਗਰਸ ਸਰਕਾਰ ਆਉਣ ‘ਤੇ ਚਾਰ ਘੰਟਿਆਂ ‘ਚ ਨਸ਼ਿਆਂ ਦਾ ਨੈਟਵਰਕ ਤੋੜ ਦਿੱਤਾ ਜਾਵੇਗਾ ਅਤੇ ਚਾਰ ਹਫਤਿਆਂ ‘ਚ ਮੁਕੰਮਲ ਨਸ਼ੇ ਦਾ ਸਫਾਇਆ ਹੋਵੇਗਾ । ਨਸ਼ਿਆਂ ਦੇ ਵੱਡੇ ਕਾਰੋਬਾਰੀ ਜੇਲ੍ਹ ‘ਚ ਹੋਣਗੇ । ਉਨ੍ਹਾਂ ਕਿਹਾ ਕਿ ਬਾਦਲਾ ਨੇ ਰਾਜ ਦੇ ਟਰਾਂਸਪੋਰਟ, ਰੇਤਾ, ਬਜਰੀ, ਕੇਬਲ ‘ਤੇ ਕਬਜੇ ਕੀਤੇ ਹੋਏ ਹਨ । ਜਿਸ ਨੂੰ ਤੁਰੰਤ ਛੁਡਾਇਆ ਜਾਵੇਗਾ ।
ਬੀਬੀ ਰਜਿੰਦਰ ਕੌਰ ਭੱਠਲ ਸਾਬਕਾ ਮੁੱਖ ਮੰਤਰੀ ਨੇ ਆਖਿਆ ਜਿਸ ਤਰ੍ਹਾਂ ਸ਼ਹੀਦ ਭਗਤ ਸਿੰਘ ਵਰਗੇ ਯੋਧਿਆਂ ਨੇ ਦੇਸ਼ ‘ਚੋਂ ਅੰਗਰੇਜ਼ ਭਜਾਓ ਮੁਹਿੰਮ ਸ਼ੁਰੂ ਕੀਤੀ ਸੀ ਹੁਣ ਕਾਂਗਰਸ ਅਕਾਲੀ ਭਜਾਓ ਮੁਹਿੰਮ ਸ਼ੁਰੂ ਕਰੇਗੀ, ਜਿਨ੍ਹਾਂ ਨੇ ਧਾਰਮਿਕ ਅਸਥਾਨ ਵੀ ਲੁੱਟਣ ਤੋਂ ਨਹੀਂ ਬਖਸ਼ੇ ।
ਉਨ੍ਹਾਂ ਕਿਹਾ ‘ਆਪ’ ਦਾ ਝਾੜੂ ਖਿਲਰ ਰਿਹਾ ਹੈ । ‘ਆਪ’ ਆਗੂ ਬਾਹਰਲੇ ਹਮਲਾਵਰ ਹਨ ਜੋ ਪੰਜਾਬ ਨੂੰ ਲੁੱਟਣ ਦੀ ਤਾਂਘ ‘ਚ ਹਨ ।
