ਸਰਕਾਰੀ ਸਕੂਲ ਦੇ ਗੇਟ ਸਾਹਮਣੇ ਕਿਰਤੀ ਕਿਸਾਨ ਯੂਨੀਅਨ ਤੇ ਵਿਦਿਆਰਥੀਆਂ ਵੱਲੋ ਧਰਨਾ
ਬੀਬੀ ਭਾਗੀਕੇ ਨੂੰ ਸਾਇਕਲ ਵੰਡਣ ਲਈ ਨਹੀ ਵੜਨ ਦਿੱਤਾ ਢੁੱਡੀਕੇ ‘ਚ
ਅਜੀਤਵਾਲ: ਸ਼੍ਰੋਮਣੀ ਅਕਾਲੀ ਦਲ ਬਾਦਲ ਵੱਲੋਂ ਹਲਕਾ ਵਿਧਾਇਕ ਬੀਬੀ ਰਾਜਵਿੰਦਰ ਕੌਰ ਭਾਗੀਕੇ ਵੱਲੋ ਸਰਕਾਰੀ ਸੀਨੀਅਰ ਸਕੈਂਡਰੀ ਸਕੂਲ ਢੁੱਡੀਕੇ ਵਿਖੇ ਅੱਜ ਵਿਦਿਆਰਥਣਾਂ ਨੂੰ ਸਾਇਕਲ ਵੰਡਣ ਦਾ ਪ੍ਰੋਗਰਾਮ ਸੀ ਪ੍ਰੰਤੂ ਜਦ ਇਸ ਦੀ ਭਿਣਕ ਕਿਰਤੀ ਕਿਸਾਨ ਯੂਨੀਅਨ ਦੇ ਆਹੁਦੇਦਾਰਾਂ ਤੇ ਵਰਕਰਾਂ ਨੂੰ ਪਈ ਤਾਂ ਉਨ੍ਹਾਂ ਸੂਬਾ ਪ੍ਰਧਾਨ ਨਿਰਭੈ ਸਿੰਘ ਢੁੱਡੀਕੇ ਦੀ ਅਗਵਾਈ ‘ਚ ਸਕੂਲ ਦੇ ਗੇਟ ਸਾਹਮਣੇ ਧਰਨਾ ਲਗਾ ਦਿੱਤਾ ਜਿਨ੍ਹਾਂ ਦੇ ਹੱਥਾਂ ਵਿਚ ਕਾਲੀਆਂ ਤੇ ਲਾਲ ਝੰਡੀਆਂ ਫੜੀਆਂ ਹੋਈਆਂ ਸਨ ਜੋ ਬੀਬੀ ਭਾਗੀਕੇ ਤੇ ਪੰਜਾਬ ਸਰਕਾਰ ਖਿਲਾਫ ਨਾਅਰੇਬਾਜੀ ਕਰ ਰਹੇ ਸਨ।
ਧਰਨਾਕਾਰੀਆਂ ਦੇ ਹੋਸਲੇ ਉਸ ਸਮੇ ਹੋਰ ਬੁਲੰਦ ਹੋ ਗਏ ਜਦ ਸਕੂਲ ਦੇ ਵਿਦਿਆਰਥੀ ਵੀ ਧਰਨੇ ‘ਚ ਸਾਮਿਲ ਹੋ ਕੇ ਸਰਕਾਰ ਖਿਲਾਫ ਨਾਅਰੇਬਾਜੀ ਕਰਨ ਲੱਗੇ। ਧਰਨਾਕਾਰੀਆਂ ਨੂੰ ਸੰਬੋਧਨ ਕਰਦਿਆਂ ਨਿਰਭੈ ਸਿੰਘ ਢੁੱਡੀਕੇ ਨੇ ਕਿਹਾ ਕਿ ਪਿਛਲੇ ਸਮੇ ਦੌਰਾਨ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਹੋਈ ਬੇਅਦਬੀ ਕਾਰਨ ਬਾਦਲ ਸਰਕਾਰ ਪ੍ਰਤੀ ਪਿੰਡ ਵਾਸੀਆਂ ਦੇ ਮਨਾਂ ‘ਚ ਗੁੱਸਾ ਅਜੇ ਸ਼ਾਂਤ ਨਈ ਹੋਇਆ ਜਦ ਤੱਕ ਅਸਲ ਦੋਸ਼ੀਆਂ ਨੂੰ ਸਖਤ ਸਜਾਵਾਂ ਨਹੀ ਮਿਲ ਜਾਦੀਆਂ ਅਸੀ ਕਿਸੇ ਵੀ ਅਕਾਲੀ ਆਗੂ ਨੂੰ ਪਿੰਡ ਵਿਚ ਵੜਨ ਨਹੀ ਦਿਆਗੇ। ਉਨ੍ਹਾਂ ਸਰਕਾਰ ਤੋ ਮੰਗ ਕੀਤੀ ਕਿ ਬਾਸਮਤੀ ਦਾ ਰੇਟ ਪੂਰਾ ਤੇ ਨਰਮੇ ਦਾ ਮੁਆਵਜਾ ਦਿੱਤਾ ਜਾਵੇ।
ਸੂਤਰਾਂ ਅਨੁਸਾਰ ਜਦ ਧਰਨੇ ਦਾ ਪਤਾ ਬੀਬੀ ਰਾਜਵਿੰਦਰ ਕੌਰ ਭਾਗੀਕੇ ਨੂੰ ਲੱਗਾ ਤਾ ਉਨ੍ਹਾਂ ਆਪਣੇ ਲਾਮ-ਲਸ਼ਕਰ ਸਮੇਤ ਗੁਆਢੀ ਪਿੰਡ ਚੂਹੜਚੱਕ ਦੇ ਸਰਕਾਰੀ ਸਕੂਲ ਵੱਲ ਆਪਣੀਆਂ ਗੱਡੀਆਂ ਦੇ ਕਾਫਲੇ ਨੂੰ ਮੋੜ ਦਿੱਤਾ ਤੇ ਫੁਰਤੀ ਨਾਲ ਹੀ ਸਕੂਲ ਦੀਆਂ ਵਿਦਿਆਰਥਣਾਂ ਨੂੰ ਸਾਇਕਲ ਵੰਡ ਕੇ ਚਲਦੇ ਬਣੇ। ਧਰਨੇ ਦੌਰਾਨ ਕੋਈ ਮਾੜੀ ਘਟਨਾ ਨਾ ਵਾਪਰੇ ਜਸਤਿੰਦਰ ਸਿੰਘ ਡੀ.ਐਸ.ਪੀ ਨਿਹਾਲ ਸਿੰਘ ਵਾਲਾ ਆਪਣੀ ਪੁਲੀਸ ਪਾਰਟੀ ਸਮੇਤ ਹਾਜਰ ਰਹੇ।
