ਲੰਡਨ (22 ਫਰਵਰੀ, 2016): ਭਾਰਤ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ 12 ਨਵੰਬਰ, 2015 ਵਿਚ ਹੋਈ ਪਹਿਲੀ ਯੂ.ਕੇ. ਫੇਰੀ ਮੌਕੇ ਸਿੱਖਾਂ ਖਿ਼ਲਾਫ਼ ਇਕ ਡੋਜ਼ੀਅਰ ਬਰਤਾਨਵੀ ਸਰਕਾਰ ਨੂੰ ਦਿੱਤੇ ਜਾਣ ਸਬੰਧੀ ਖ਼ਬਰ ਭਾਰੀ ਚਰਚਾ ਦਾ ਵਿਸ਼ਾ ਬਣੀ ਸੀ ।
ਪਰ ਬਰਤਾਨੀਆ ਸਰਕਾਰ ਨੇ ਇੱਕ ਚਿੱਠੀ ਦੇ ਜਵਾਬ ਵਿੱਚ ਕਿਹਾ ਹੈ ਕਿ ਭਾਰਤ ਵਲੋਂ ਬਰਤਾਨੀਆ ਨੂੰ ਸਿੱਖਾਂ ਬਾਰੇ ਕੋਈ ਡੋਜ਼ੀਅਰ ਨਹੀਂ ਦਿੱਤਾ ਗਿਆ । ਇਸ ਗੱਲ ਦੀ ਪੁਸ਼ਟੀ ਬਰਤਨਾਵੀ ਸਰਕਾਰ ਦੇ ‘ਡਿਪਾਰਟਮੈਂਟ ਆਫ਼ ਕਮਿਊਨਿਟੀ ਤੇ ਲੋਕਲ ਗਵਰਨਮੈਂਟ’ ਬਾਰੇ ਮੰਤਰੀ ਬੈਰੋਨੈੱਸ ਵਿਲੀਅਮ ਨੇ ਲਿਖਤੀ ਰੂਪ ‘ਚ ਕੀਤੀ ਹੈ ।
ਮੋਦੀ ਦੀ ਬਰਤਾਨੀਆ ਫੇਰੀ ਮੌਕੇ ਪ੍ਰਕਾਸ਼ਿਤ ਖ਼ਬਰ ਅਨੁਸਾਰ ਡੋਜ਼ੀਅਰ ‘ਚ ਜਿੱਥੇ ਤਿੰਨ ਸਿੱਖ ਗੁਰੂ ਘਰਾਂ ‘ਚ ਹਥਿਆਰਾਂ ਦੀ ਸਿਖਲਾਈ ਦੇਣ ਸਬੰਧੀ, ਪੁਰਤਗਾਲ ‘ਚ ਗਿ੍ਫ਼ਤਾਰ ਕੀਤੇ ਭਾਈ ਪਰਮਜੀਤ ਸਿੰਘ ਪੰਮਾ ਸਮੇਤ ਦੋ ਸਿੱਖਾਂ ਤੇ ਦੋ ਸਿੱਖ ਟੈਲੀਵੀਜ਼ਨਾਂ ਖਿ਼ਲਾਫ਼ ਕਾਰਵਾਈ ਦੀ ਮੰਗ ਕੀਤੀ ਗਈ ਸੀ।
ਸਿੱਖ ਕੌਾਸਲ ਯੂ.ਕੇ. ਵਲੋਂ ਪ੍ਰਧਾਨ ਮੰਤਰੀ ਡੇਵਿਡ ਕੈਮਰਨ ਨੂੰ ਲਿਖੀ ਚਿੱਠੀ ਦੇ ਜਵਾਬ ‘ਚ ਬੈਰੋਨੈੱਸ ਵਿਲੀਅਮਜ਼ ਨੇ ਕਿਹਾ ਹੈ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਫੇਰੀ ਤੋਂ ਪਹਿਲਾਂ, ਫੇਰੀ ਮੌਕੇ ਜਾਂ ਫੇਰੀ ਤੋਂ ਬਾਅਦ ਭਾਰਤ ਵਲੋਂ ਕੋਈ ਡੋਜ਼ੀਅਰ ਪ੍ਰਧਾਨ ਮੰਤਰੀ ਡੇਵਿਡ ਕੈਮਰਨ ਜਾਂ ਸਰਕਾਰ ਦੇ ਕਿਸੇ ਮੈਂਬਰ ਨੂੰ ਨਹੀਂ ਦਿੱਤਾ ਗਿਆ ।
ਸਿੱਖ ਕੌਾਸਲ ਯੂ.ਕੇ. ਵਲੋਂ ਇਸ ਸਬੰਧੀ ਉਸੇ ਸਮੇਂ ਤੋਂ ਜਾਂਚ ਕੀਤੀ ਜਾ ਰਹੀ ਸੀ ਤੇ ਵਾਰ-ਵਾਰ ਬਰਤਾਨਵੀ ਸਰਕਾਰ ਨੂੰ ਡੋਜ਼ੀਅਰ ਜਨਤਕ ਕਰਨ ਦੀ ਮੰਗ ਕੀਤੀ ਜਾ ਰਹੀ ਸੀ ।
ਸਿੱਖ ਕੌਾਸਲ ਯੂ.ਕੇ. ਦੇ ਜਨਰਲ ਸਕੱਤਰ ਗੁਰਮੇਲ ਸਿੰਘ ਕੰਦੋਲਾ ਨੇ ਕਿਹਾ ਹੈ ਕਿ ਸਿੱਖ ਕੌਾਸਲ ਯੂ.ਕੇ. ਨੇ ਪਹਿਲੀ ਚਿੱਠੀ 17 ਨਵੰਬਰ, 2015 ਨੂੰ ਪ੍ਰਧਾਨ ਮੰਤਰੀ ਡੇਵਿਡ ਕੈਮਰਨ ਨੂੰ ਲਿਖੀ ਸੀ । ਇਸ ਤੋਂ ਬਾਅਦ ਸਿੱਖ ਕੌਾਸਲ ਨੇ ਨਿੱਜੀ ਤੌਰ ‘ਤੇ ਵੱਖ- ਵੱਖ ਭਾਰਤੀ ਮੀਡੀਆ ਰਿਪੋਰਟਾਂ ਤੇ ਡੋਜ਼ੀਅਰ ਸਬੰਧੀ ਜਾਂਚ ਕੀਤੀ ਜਿਸ ਤੋਂ ਸ਼ੱਕ ਪੈਦਾ ਹੋ ਰਿਹਾ ਸੀ ਕਿ ਸਿੱਖ ਕੌਮ ਨੂੰ ਜਾਣਬੁਝ ਕੇ ਬਦਨਾਮ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ ।
