ਲੰਡਨ (21 ਮਈ, 2015): ਗੁਰਦਵਾਰਾ ਅੰਬ ਸਾਹਿਬ ਤੋਂ ਸਿਘਾਂ ਦੀ ਰਿਹਾਈ ਲਈ ਅਰੰਭ ਹੋਣ ਵਾਲੇ ਮਾਰਚ ਵਿੱਚ ਸ਼ਾਮਲ ਸਿੱਖ ਬੀਬੀਆਂ ੳਤੇ ਸਿੰਘਾਂ ਪ੍ਰਤੀ ਪੰਜਾਬ ਪੁਲਿਸ ਵਲੋਂ ਬਾਦਲ ਸਰਕਾਰ ਦੀ ਸ਼ਹਿ ਤੇ ਅਪਣਾਏ ਗਏ ਧੱਕੜ ਅਤੇ ਜ਼ਾਲਮਾਨਾ ਵਤੀਰੇ ,ਸਿੱਖ ਬੀਬੀਆਂ ਨਾਲ ਬਦਸਲੂਕੀ ਨਾਲ ਪੇਸ਼ ਆਉਣ ਅਤੇ 250 ਦੇ ਕਰੀਬ ਸਿੱਖਾਂ ਦੀਆਂ ਗ੍ਰਿਫਤਾਰੀਆਂ ਦੀ ਯੂਨਾਈਟਿਡ ਖਾਲਸਾ ਦਲ ਯੂ,ਕੇ ਦੇ ਜਨਰਲ ਸਕੱਤਰ ਸ੍ਰ, ਲਵਸਿ਼ੰਦਰ ਸਿੰਘ ਡੱਲੇਵਾਲ ਵਲੋਂ ਜਾਰੀ ਪ੍ਰੈੱਸ ਬਿਆਨ ਵਿੱਚ ਸਖਤ ਨਿਖੇਧੀ ਕੀਤੀ ਗਈ ਹੈ ।
ਜਾਰੀ ਬਿਆਨ ਵਿੱਚ ਉਨ੍ਹਾਂ ਕਿਹਾ ਕਿ ਕਿ ਅੱਜ ਤੱਕ ਸਿੱਖ ਕੌਮ ਨਾਲ ਪੈਰ ਪੈਰ ਤੇ ਧੋਖਾ ਕੀਤਾ ਗਿਆ ਅਤੇ ਸਿੱਖ ਦੁਸ਼ਮਣ ਦਾ ਪੱਖ ਪੂਰਦਿਆਂ ਸ਼ਰੇਆਮ ਉਸਦੇ ਹੱਕ ਵਿੱਚ ਭੁਗਤਣਾ ਹੀ ਇਸ ਬਾਦਲ ਪਰਿਵਾਰ ਦੀ ਫਿਤਰਤ ਬਣ ਚੁੱਕੀ ਹੈ ।
ਜਿਸ ਕਦਰ ਸ੍ਰ਼ੋਮਣੀ ਗੁਰਦਵਾਰਾ ਪ੍ਰਬੰਧਕ ਕਮੇਟੀ ਦੇ ਲੱਠਮਾਰਾਂ ਨੇ ਸਿੱਖ ਸੰਗਤਾਂ ਨੂੰ ਗੁਰਦਵਾਰਾ ਸਾਹਿਬ ਦੇ ਅੰਦਰ ਜਾਣ ਤੋਂ ਰੋਕਿਆ ਉਸ ਨਾਲ ਇਹਨਾਂ ਨੇ ਸਾਬਤ ਕਰਨ ਦਿੱਤਾ ਕਿ ਪੰਜਾਬ ਦੇ ਗੁਰਦਵਾਰਿਆਂ ਤੇ ਕਾਬਜ਼ ਅਜੋਕੇ ( ਬਾਦਲ ਮੱਕੜ ) ਵਿਆਕਤੀਆਂ ਵਿੱਚ ਅਤੇ ਮਹੰਤ ਨਰੈਣੂ ਵਿੱਚ ਕੋਈ ਅੰਤਰ ਨਹੀਂ ਹੈ ।
ਉਨ੍ਹਾਂ ਕਿਹਾ ਕਿ ਕੋਈ ਵੀ ਸਰਕਾਰੀ ਜ਼ੁਲਮ ,ਅੱਤਿਆਚਾਰ ਸਿੱਖ ਕੌਮ ਦੇ ਹੌਂਸਲੇ ਪਸਤ ਨਹੀਂ ਕਰ ਸਕਦਾ । ਸਿੱਖ ਕੌਮ ਆਪਣੇ ਕੌਮੀ ਨਿਸ਼ਾਨੇ ਦੀ ਮੰਜਿ਼ਲ ਵਲ ਨਿਰੰਤਰ ਵਧਦੀ ਰਹੇਗੀ ।
ਭਾਰਤ ਦੀਆਂ ਵੱਖ ਵੱਖ ਜੇਹਲਾਂ ਵਿੱਚ 77 ਸਿੱਖ ਕੈਦ ਹਨ ।ਜਿਹਨਾਂ ਵਿੱਚ ਭਾਈ ਬਲਵੰਤ ਸਿੰਘ ਰਾਜੋਆਣਾ ਨੂੰ ਫਾਂਸੀ ਦੀ ਸਜ਼ਾ ਹੋ ਚੁੱਕੀ ਹੈ ,ਵੀਹ ਸਿੱਖ ਉਮਰ ਕੈਦ ਦੀ ਸਜ਼ਾ ਕੱਟ ਚੁੱਕੇ ਹਨ ਜਿਹਨਾਂ ਵਿੱਚ ਜਿ਼ਆਦਾਤਰ ਅਜਿਹੇ ਹਨ ਜਿਹੜੇ 19 ਸਾਲ ਤੋਂ 24 ਸਾਲ ਦਾ ਸਮਾਂ ਜੇਹਲਾਂ ਵਿੱਚ ਗੁਜ਼ਾਰ ਚੁੱਕੇ ਹਨ, ਅੱਠ ਸਿੱਖ ਦਸ ਦਸ ਸਾਲ ਦੀ ਸਜ਼ਾ ਕੱਟ ਰਹੇ ਹਨ ਜਿਹਨਾਂ ਦੀ ਉਮਰ 65 ਤੋਂ 85 ਸਾਲ ਹੈ ।
ਅੱਜ ਜਿਹੜੀ ਅਖੌਤੀ ਪੰਥਕ ਧਿਰ ਤੇ ਰਾਜ ਕਰ ਰਹੀ ਹੈ , ਇਹ ਇਹਨਾਂ ਵਲੋਂ ਹੀ 4 ਅਗਸਤ 1982 ਨੂੰ ਲਗਾਏ ਗਏ ਧਰਮ ਮੋਰਚੇ ਅਤੇ ਇਹਨਾਂ ਵਲੋਂ ਸਿੱਖ ਕੌਮ ਨੂੰ ਮੋਰਚੇ ਵਿੱਚ ਸਾਥ ਦੇਣ ਦੀਆਂ ਅਪੀਲਾਂ ਕਰਨ ਦੇ ਫਲਸਰੂਪ ਹੀ ਇਹ ਸਿੱਖ ਕੌਮ ਦੇ ਨੌਜਵਾਨ ਵੀਹ ਵੀਹ ,ਪੱਚੀ ਪੱਚੀ ਸਾਲ ਤੋਂ ਜੇਹਲਾਂ ਵਿੱਚ ਬੰਦ ਹਨ ਜੋ ਕਿ ਹੁਣ ਬੁਢਾਪੇ ਦੀਆਂ ਦਹਿਲੀਜ਼ਾਂ ਤੇ ਜਾ ਪੁੱਜੇ ਹਨ।
