ਪਟਿਆਲਾ (17 ਜਨਵਰੀ, 2015): ਥਾਈਲੈਂਡ ਤੋਂ ਗ੍ਰਿਫਤਾਰ ਕਰਕੇ ਪੰਜਾਬ ਲਿਆਦੇ ਗਏ ਭਾਈ ਜਗਤਾਰ ਸਿੰਘ ਤਾਰਾ ਨੂੰ ਪੰਜਾਬ ਪੁਲਿਸ ਵੱਲੋਂ ਅੱਜ ਰਾਸ਼ਟਰੀ ਸਿੱਖ ਸੰਗਤ ਦੇ ਪ੍ਰਧਾਨ ਰੁਲਦਾ ਸਿੰਘ ਕਤਲ ਮਾਮਲੇ ‘ਚ ਪਟਿਆਲਾ ਦੀ ਇੱਕ ਅਦਾਲਤ ਵਿੱਚ ਪੇਸ਼ ਕਰਕੇ 14 ਦਿਨਾਂ ਦੇ ਪੁਲਿਸ ਰਿਮਾਂਡ ਦੀ ਮੰਗ ਕੀਤੀ।
ਭਾਈ ਤਾਰਾ ਵੱਲੋਂ ਪੇਸ਼ ਹੋਏ ਪ੍ਰਸਿੱਧ ਵਕੀਲ਼ ਬਰਜ਼ਿੰਦਰ ਸਿੰਘ ਸੋਢੀ ਨੇ 14 ਦਿਨਾਂ ਪੁਲਿਸ ਰਿਮਾਂਡ ਦੀ ਵਿਰੋਧਤਾ ਕੀਤੀ, ਬਾਅਦ ਵਿੱਚ ਅਦਾਲਤ ਨੇ ਭਾਈ ਤਾਰਾ ਦਾ ਪੰਜ ਦਿਨਾਂ ਪੁਲਿਸ ਰਿਮਾਂਡ ਦਿੱਤਾ।
ਸਰਕਾਰੀ ਧਿਰ ਨੇ ਅਦਾਲਤ ਨੂੰ ਦੱਸਿਆ ਕਿ ਰਾਸ਼ਟਰੀ ਸਿੱਖ ਸੰਗਤ ਦੇ ਸੀਨੀਅਰ ਕਾਰਕੁਨ ਰੁਲਦਾ ਸਿੰਘ ਕਤਲ ਮਾਮਲੇ ‘ਚ ਜੋ ਮੁਕੱਦਮਾ ਨੰਬਰ 279 ਥਾਣਾ ਤ੍ਰਿਪੜੀ ਵਿਖੇ 29 ਜੁਲਾਈ 2009 ਨੂੰ ਦਰਜ ਕੀਤਾ ਗਿਆ ਸੀ ‘ਚ ਭਾਈ ਤਾਰਾ ਤੋਂ ਪੁੱਛਗਿੱਛ ਕਰਨੀ ਹੈ।
ਸਰਕਾਰੀ ਧਿਰ ਨੇ ਅਦਾਲਤ ਨੂੰ ਦੱਸਿਆ ਕਿ ਇਸ ਮਾਮਲੇ ‘ਚ ਪਹਿਲਾਂ ਇਰਾਦਾ ਕਤਲ ਕੇਸ ਦੀ ਧਾਰਾ 307 ਅਤੇ ਬਾਅਦ ਵਿਚ ਜਦੋਂ ਰੁਲਦਾ ਸਿੰਘ ਦੀ ਮੌਤ ਹੋ ਗਈ ਤਾਂ ਇਹ ਮਾਮਲਾ ਕਤਲ ਦੀ ਧਾਰਾ 302 ਵਿਚ ਤਬਦੀਲ ਹੋ ਗਿਆ ਸੀ। ਜਗਤਾਰ ਸਿੰਘ ਤਾਰਾ ਇਸ ਮਾਮਲੇ ਦਾ ਮਾਸਟਰ ਮਾਈਂਡ ਹੈ।
ਸਰਕਾਰੀ ਧਿਰ ਨੇ ਆਖਿਆ ਕਿ ਭਾਈ ਤਾਰਾ ਪਾਕਿਸਤਾਨ ਦੇ ਰਸਤੇ ਥਾਈਲੈਂਡ ਗਿਆ ਅਤੇ ਉੱਥੇ ਬੈਠ ਕੇ ਉਸ ਨੇ ਮੋਟੀਆਂ ਰਕਮਾਂ ਲੋਕਾਂ ਨੂੰ ਦਿੱਤੀਆਂ । ਇਸ ਸਬੰਧ ਵਿਚ ਵਿਸਥਾਰ ਵਿਚ ਜਾਣਕਾਰੀ ਪ੍ਰਾਪਤ ਕਰਨੀ ਹੈ ਕਿ ਤਾਰਾ ਨੇ ਕਿਨ੍ਹਾਂ-ਕਿਨ੍ਹਾਂ ਲੋਕਾਂ ਨੂੰ ਪੈਸੇ ਦਿੱਤੇ ਅਤੇ ਉਹ ਲੋਕ ਕਿਸ ਹੱਦ ਤੱਕ ਭਾਰਤ ਵਿਚ ਸਰਗਰਮ ਹਨ।
ਇਸ ਦੇ ਜਵਾਬ ਵਿਚ ਤਾਰਾ ਦੇ ਬਚਾਅ ਪੱਖ ਤੋਂ ਸ: ਸਿੰਘ ਸੋਢੀ ਨੇ ਅਦਾਲਤ ਵਿਚ ਆਖਿਆ ਕਿ ਹੁਣ ਤੱਕ ਰੁਲਦਾ ਸਿੰਘ ਕੇਸ ‘ਚ ਬਹੁਤ ਸਾਰੇ ਵਿਅਕਤੀਆਂ ਨੂੰ ਇਹ ਪੇਸ਼ ਕਰ ਚੁੱਕੇ ਹਨ ਅਤੇ ਬਹੁਤ ਸਾਰਿਆਂ ਨੂੰ ਦੋਸ਼ ਮੁਕਤ ਵੀ ਦੇ ਚੁੱਕੇ ਹਨ। ਉਨ੍ਹਾਂ ਆਖਿਆ ਕਿ 2009 ਤੋਂ ਹੁਣ ਤੱਕ ਇੱਕ ਦਰਜਨ ਤੋਂ ਵੱਧ ਵਾਰ ਸਰਕਾਰੀ ਧਿਰ ਨੇ ਜਾਂਚ ਕੀਤੀ ਹੈ ਪਰੰਤੂ ਇਨ੍ਹਾਂ ਨੂੰ ਕੁੱਝ ਵੀ ਪਤਾ ਨਹੀਂ ਲੱਗਿਆ।
ਸ: ਸੋਢੀ ਨੇ ਕਿ ਰੁਲਦਾ ਸਿੰਘ ਮਾਮਲੇ ਵਿਚ ਜਗਮੋਹਨ ਸਿੰਘ ਅਤੇ ਰਮਨਦੀਪ ਸਿੰਘ ਗੋਲਡੀ ਨੂੰ ਪੁਲਿਸ ਪਹਿਲਾਂ ਹੀ ਅਦਾਲਤ ਵਿਚ ਪੇਸ਼ ਕਰ ਚੁੱਕੀ ਹੈ। ਉਨ੍ਹਾਂ ਆਖਿਆ ਕਿ ਸਰਕਾਰੀ ਧਿਰ ਇਸ ਗੱਲ ਦਾ ਹਲਫ਼ੀਆ ਬਿਆਨ ਦੇਵੇ ਕਿ ਉਹ ਤਾਰਾ ਤੋਂ ਸਾਰੇ 5 ਕੇਸਾਂ ਵਿਚ ਜਾਂਚ ਇਸ ਰਿਮਾਂਡ ਦੌਰਾਨ ਹੀ ਕਰਨੀ ਹੈ।
ਅਦਾਲਤ ਵਿਚ ਹੀ ਸਫ਼ਾਈ ਧਿਰ ਦੇ ਵਕੀਲ ਸ: ਸੋਢੀ ਨੇ 10 ਮਿੰਟ ਦੇ ਕਰੀਬ ਤਾਰਾ ਨਾਲ ਗੱਲਬਾਤ ਕੀਤੀ।
ਜ਼ਿਕਰਯੋਗ ਹੈ ਕਿ ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਬੇਅੰਤ ਸਿੰਘ ਦੇ ਕਤਲ ‘ਚ ਚੰਡੀਗੜ ਦੀ ਬੂੜੈਲ ਜੇਲ ਵਿੱਚ ਬੰਦ ਸੀ ਅਤੇ 2004 ਵਿੱਚ ਉਹ ਆਪਣੇ ਸਾਥੀਆਂ ਭਾਈ ਜਗਤਾਰ ਸਿੰਘ ਹਵਾਰਾ ਅਤੇ ਭਾਈ ਪਰਮਜੀਤ ਸਿੰਘ ਭਿਉਰਾ ਨਾਲ ਜੇਲ ‘ਚੋਂ ਸੁਰੰਘ ਪੁੱਟ ਕੇ ਫਰਾਰ ਹੋ ਗਿਆ ਸੀ।।
