ਅੰਮ੍ਰਿਤਸਰ (ਨਰਿੰਦਰ ਪਾਲ ਸਿੰਘ): ਨਵੰਬਰ 1984 ਦੇ ਦਿੱਲੀ ਸਿੱਖ ਕਤਲੇਆਮ ਦੀ ਅਹਿਮ ਗਵਾਹ ਅਤੇ ਪਾਲਮ ਕਲੋਨੀ ਕਤਲ ਕਾਂਡ ਵਿੱਚ ਕਾਂਗਰਸੀ ਆਗੂ ਸੱਜਣ ਕੁਮਾਰ ਖਿਲਾਫ ਚੱਲ ਰਹੇ ਅਦਾਲਤੀ ਮਾਮਲੇ ਦੀ ਮੁਦਈ ਬੀਬੀ ਜਗਦੀਸ਼ ਕੌਰ ਨੇ ਕੈਪਟਨ ਅਮਰਿੰਦਰ ਸਿੰਘ ਵਲੋਂ ਦਿੱਤੇ ਉਸ ਬਿਆਨ ਦਾ ਗੰਭੀਰ ਨੋਟਿਸ ਲਿਆ ਹੈ ਜਿਸ ਵਿੱਚ ਪੰਜਾਬ ਪ੍ਰਦੇਸ਼ ਕਾਂਗਰਸ ਪ੍ਰਧਾਨ ਨੇ ਕਿਹਾ ਹੈ ਕਿ ਨਵੰਬਰ 1984 ਦੇ ਸਿੱਖ ਕਤਲੇਆਮ ਲਈ ਕਾਂਗਰਸ ਜ਼ਿੰਮੇਵਾਰ ਨਹੀਂ ਹੈ। ਬੀਬੀ ਜਗਦੀਸ਼ ਕੌਰ ਨੇ ਕੈਪਟਨ ਅਮਰਿੰਦਰ ਸਿੰਘ ਨੂੰ ਸਵਾਲ ਕੀਤਾ ਹੈ ਕਿ ‘ਇਹ ਹੀ ਦੱਸ ਦਿਓ ਕਿ ਇਹ ਕਤਲੇਆਮ ਕਿਸਨੇ ਕਰਵਾਇਆ ਸੀ? ਜੇਕਰ ਕਾਂਗਰਸ ਨੇ ਨਹੀਂ ਕਰਵਾਇਆ ਤਾਂ ਕੈਪਟਨ ਸਮੇਤ ਹੁਣ ਤੀਕ ਕਾਂਗਰਸ ਦੀਆਂ ਕੇਂਦਰੀ ਤੇ ਸੂਬਾਈ ਸਰਕਾਰਾਂ ਤੇ ਉਨ੍ਹਾਂ ਦੇ ਆਗੂ ਕਤਲੇਆਮ ਦੇ ਦੋਸ਼ੀਆਂ ਨੂੰ ਬੇਨਕਾਬ ਕਰਨ ਅੱਗੇ ਕਿਉਂ ਨਹੀ ਆਏ’?
ਅੱਜ ਆਪਣੀ ਰਿਹਾਇਸ਼ ‘ਤੇ ਗੱਲਬਾਤ ਕਰਦਿਆਂ ਬੀਬੀ ਜਗਦੀਸ਼ ਕੌਰ ਨੇ ਦੱਸਿਆ ਕਿ ਉਹ ਖੁੱਦ ਇੱਕ ‘ਅਜ਼ਾਦੀ ਘੁਲਾਟੀ’ ਦੀ ਧੀਅ ਹੈ ਅਤੇ ਸਪੱਸ਼ਟ ਕਰਨਾ ਚਾਹੁੰਦੀ ਕਿ ਕਾਂਗਰਸ ਦਾ ਜੋ ਕਰੂਰ ਚਿਹਰਾ ਨਵੰਬਰ 1984 ਵਿਚ ਰਾਜੀਵ ਗਾਂਧੀ ਦੇ ਪ੍ਰਧਾਨ ਮੰਤਰੀ ਵਜੋਂ ਤੇ ਨਰਸਿੰਮਹਾ ਰਾਉ ਦੇ ਗ੍ਰਹਿ ਮੰਤਰੀ ਵਜੋਂ ਸਮੇਂ ਵਿੱਚ ਉਸਨੇ ਵੇਖਿਆ ਹੈ ,ਉਹ ਕਾਂਗਰਸ ਦੇ ਇਸ ਚਿਹਰੇ ਪ੍ਰਤੀ ਸ਼ਰਮਸਾਰ ਹੈ ਕਿ ਉਸ ਦੇ ਪੁਰਖਿਆਂ ਨੇ ਅੰਗ੍ਰੇਜ਼ਾਂ ਤੋਂ ‘ਅਜ਼ਾਦੀ’, ਸਿੱਖਾਂ ਦਾ ਕਤਲ ਕਰਾਉਣ ਲਈ ਲਈ ਸੀ। ਭਰੇ ਮਨ ਤੇ ਨਮ ਅੱਖਾਂ ਨਾਲ ਬੀਬੀ ਜਗਦੀਸ਼ ਕੌਰ ਨੇ ਦੱਸਿਆ ਕਿ ਕਾਂਗਰਸੀ ਲੀਡਰਾਂ ਦੀ ਅਗਵਾਈ ਵਾਲੇ ਕਾਤਲਾਂ ਤੇ ਲੁਟੇਰਿਆਂ ਨੇ ਪੁਲਿਸ ਦੀ ਸਰਪ੍ਰਸਤੀ ਹੇਠ ਹੀ 31 ਅਕਤੂਬਰ ਦੀ ਦੇਰ ਸ਼ਾਮ ਸਿੱਖਾਂ ਨੂੰ ਨਿਸ਼ਾਨਾ ਬਨਾਉਣਾ ਸ਼ੁਰੂ ਕਰ ਦਿੱਤਾ ਸੀ।
ਇੱਕ ਨਵੰਬਰ ਨੂੰ ਚਿੱਟੇ ਦਿਨ ਡੇਢ ਵਜੇ ਦੇ ਕਰੀਬ ਹਜ਼ੂਮ ਨੇ ਘਰ ਦੇ ਡਰਾਇੰਗ ਰੂਮ ਵਿੱਚ ਬੈਠੇ ਉਸਦੇ ਪਤੀ ਨੂੰ ਕਤਲ ਕੀਤਾ ਤੇ ਬੱਚਕੇ ਭੱਜ ਰਹੇ ਬੇਟੇ ਨੂੰ ਭਰੇ ਬਜ਼ਾਰ ਵਿੱਚ ਖਤਮ ਕੀਤਾ। ਦੋ ਨਵੰਬਰ ਦੀ ਸਵੇਰ 8-9 ਵਜੇ ਦੇ ਕਰੀਬ ਘਰ ਦੀ ਛੱਤ ਤੇ ਲੁਕੇ ਉਸਦੇ ਤਿੰਨ ਭਰਾਵਾਂ ਨੂੰ ਮੌਤ ਦੇ ਘਾਟ ਉਤਾਰ ਦਿੱਤਾ। ਬੀਬੀ ਜਗਦੀਸ਼ ਕੌਰ ਨੇ ਕਿਹਾ ਹੈ ਕਿ ਕੈਪਟਨ ਅਮਰਿੰਦਰ ਸਿੰਘ ਧਿਆਨ ਨਾਲ ਸੁਣ ਲਵੇ ਕਿ ਦਿੱਲੀ ਦੇ ਕੈਂਟ ਏਰੀਆ ਦੀ ਪਾਲਮ ਪੁਲਿਸ ਚੌਂਕੀ ਪਾਸ ਇਸ ਕਤਲੇਆਮ ਦੀ ਸ਼ਿਕਾਇਤ ਕਰਨ ਵਾਲੀ ਉਹੀ ਔਰਤ ਹੈ ਜਿਸਨੇ ਆਪਣੇ ਘਰ ਦਾ ਫਰਨੀਚਰ ਤੀਕ ਕੱਢ ਕੇ ਸੜਕਾਂ ਤੇ ਪਈਆਂ ਅਨਗਿਣਤ ਸਿੱਖਾਂ ਦੀਆਂ ਅੱਧ ਸੜੀਆਂ ਲਾਸ਼ਾਂ ਦਾ ਸਸਕਾਰ ਕੀਤਾ। ਪ੍ਰਵਾਰਕ ਜੀਆਂ ਦੀ ਅਰਦਾਸ ਖੁਦ ਕੀਤੀ, ਦਿੱਲੀ ਦੇ ਇਸ ਖੇਤਰ ਦੇ ਮਿਲਟਰੀ ਅਫਸਰਾਂ ਤੀਕ ਸ਼ਿਕਾਇਤ ਕੀਤੀ।
ਬੀਬੀ ਜਗਦੀਸ਼ ਕੌਰ ਨੇ ਸਵਾਲ ਕੀਤਾ ਹੈ ਕਿ ਜੇਕਰ ਇਹ ਕਤਲੇਆਮ ਕਾਂਗਰਸ ਨੇ ਨਹੀਂ ਕਰਵਾਇਆ ਤਾਂ ਕਤਲੇਆਮ ਦੇ ਦੋਸ਼ੀ ਕਾਂਗਰਸੀਆਂ ਦੀ ਸ਼ਨਾਖਤ ਕਰਨ ਵਾਲੇ ਮਨੁੱਖੀ ਅਧਿਕਾਰ ਕਾਮਿਆਂ ਖਿਲਾਫ ਕਾਂਗਰਸ ਨੇ ਕੋਈ ਕਾਰਵਾਈ ਕਿਉਂ ਨਹੀ ਕੀਤੀ। ਉਨ੍ਹਾਂ ਦੱਸਿਆ ਕਿ ਉਹ ਪਿਛਲੇ 32 ਸਾਲ ਤੋਂ ਸਿੱਖ ਕਤਲੇਆਮ ਦੇ ਇੱਕ ਪ੍ਰਮੁਖ ਦੋਸ਼ੀ ਤੇ ਕਾਂਗਰਸੀ ਆਗੂ ਸੱਜਣ ਕੁਮਾਰ ਨੂੰ ਸਜਾ ਦਿਵਾਉਣ ਲਈ ਜਦੋਜਹਿਦ ਕਰ ਰਹੀ ਹੈ ਪਰ ਕੈਪਟਨ ਤੇ ਉਸ ਵਰਗੇ ਅਨੇਕਾਂ ਬੇਗੈਰਤ ਕਾਂਗਰਸੀ ਸੱਜਣ ਕੁਮਾਰ ਨੂੰ ਬਾਇੱਜ਼ਤ ਬਰੀ ਕਰਾਉਣ ਲਈ ਪੱਬਾਂ ਭਾਰ ਫਿਰ ਰਹੇ ਹਨ। ਬੀਬੀ ਜਗਦੀਸ਼ ਕੌਰ ਨੇ ਇਹ ਵੀ ਦੱਸਿਆ ਕਿ ਕੈਪਟਨ ਇਹ ਵੀ ਯਾਦ ਰੱਖੇ ਕਿ ਉਹ (ਬੀਬੀ ਜਗਦੀਸ਼ ਕੌਰ) ਉਸ ਖਾਨਦਾਨ ਵਿੱਚੋਂ ਹੈ ਜਿਸ ਖਾਨਦਾਨ ਨਾਲ ਮਹਾਰਾਣੀ ਪਰਣੀਤ ਕੌਰ ਦਾ ਸਬੰਧ ਹੈ ਤੇ ਇਸ ਖਾਨਦਾਨ ਦੀਆਂ ਔਰਤਾਂ ਕਿਸੇ ‘ਤੇ ਝੂਠਾ ਇਲਜ਼ਾਮ ਨਹੀਂ ਲਾਉਂਦੀਆਂ। ਉਨ੍ਹਾਂ ਕਿਹਾ ਕਿ ਜੇ ਕੈਪਟਨ ਅਮਰਿੰਦਰ ਸਿੰਘ ਨੂੰ ਅਜੇ ਵੀ ਕੋਈ ਸ਼ੱਕ ਹੈ ਤਾਂ ਉਹ ਆਕੇ ਮਿਲ ਲਵੇ ਸਭ ਕੁਝ ਵਿਸਥਾਰ ਸਹਿਤ ਦੱਸਾਂਗੀ।
