ਕੈਲਗਰੀ (5 ਮਈ, 2015): ਕੈਨੇਡਾ ਦੇ ਸੂਬੇ ਅਲਬਰਟਾ ਵਿੱਚ ਚੋਣਾਂ ਹੋਣ ਜਾ ਰਹੀਆਂ ਹਨ।ਇਸ ਸੂਬੇ ਵਿੱਚ ਸਿੱਖਾਂ ਅਤੇ ਪੰਜਾਬੀਆਂ ਦੀ ਕਾਫੀ ਜ਼ਿਆਦਾ ਵੱਸੋਂ ਹੈ ਅਤੇ ਇਹ ਚੋਣਾਂ ਵਿੱਚ ਨਿਰਨਾਇਕ ਭੂਮਿਕਾ ਨਿਭਾਉਣ ਦੀ ਸਮਰੱਥਾ ਰੱਖਦੀ ਹੈ। ਚੋਣ ਮੈਦਾਨ ਇਸ ਸਮੇਂ ਪੂਰੀ ਤਰਾਂ ਭੱਖ ਚੁੱਕਿਆ ਹੈ।
ਪਿਛਲੇ 44 ਸਾਲਾਂ ਤੋਂ ਪ੍ਰੋਗਰੈਸਿਵ ਪਾਰਟੀ (ਪੀ.ਸੀ.) ਸੱਤਾ ‘ਚ ਹੈ ।ਇਸ ਵਾਰ ਕੁਝ ਹਾਲਾਤ ਬਦਲੇ ਹੋਏ ਨਜ਼ਰ ਆ ਰਹੇ ਹਨ ।ਵਾਈਲਡ ਰੋਜ਼ ਪਾਰਟੀ , ਐਨ.ਡੀ.ਪੀ. ਤੇ ਲਿਬਰਲ ਪਾਰਟੀ ਦੇ ਉਮੀਦਵਾਰ ਪੀ. ਸੀ. ਪਾਰਟੀ ਲਈ ਚੁਣੌਤੀ ਬਣੇ ਹੋਏ ਨਜ਼ਰ ਆ ਰਹੇ ਹਨ ।ਇਨ੍ਹਾਂ ਚੋਣਾਂ ਵਿਚ ਕੋਈ ਦੋ ਦਰਜਨ ਦੇ ਕਰੀਬ ਪ੍ਰਵਾਸੀ ਭਾਰਤੀ ਉਮੀਦਵਾਰ ਹਨ, ਜਿਨ੍ਹਾਂ ਵਿਚ ਸਿੱਖਾਂ ਅਤੇ ਪੰਜਾਬੀਆਂ ਦੀ ਬਹੁਤਾਤ ਹੈ ।
ਕੈਲਗਰੀ ਗਰੀਨ ਵੇਅ ਹਲਕੇ ਤੋਂ ਹੰਢੇ ਵਰਤੇ ਸਿਆਸਤਦਾਨ ਸਾਬਕਾ ਮੰਤਰੀ ਮਨਮੀਤ ਸਿੰਘ ਭੁੱਲਰ ਪੀ. ਸੀ. ਪਾਰਟੀ ਵੱਲੋਂ ਚੋਣ ਮੈਦਾਨ ਵਿਚ ਹਨ ।ਉਨ੍ਹਾਂ ਦਾ ਮੁਕਾਬਲਾ ਵਾਈਲਡ ਰੋਜ਼ ਪਾਰਟੀ ਦੇ ਦਵਿੰਦਰ ਤੂਰ ਨਾਲ ਹੈ ।ਸਿੱਖਾਂ ਅਤੇ ਪੰਜਾਬੀਆਂ ਦੇ ਗੜ੍ਹ ਵਜੋਂ ਜਾਣੇ ਜਾਂਦੇ ਕੈਲਗਰੀ ਮੈਕਾਲ ਹਲਕਾ ਇਸ ਵਾਰ ਵਧੇਰੇ ਦਿਲਚਸਪੀ ਦਾ ਕੇਂਦਰ ਬਣਿਆ ਹੋਇਆ ਹੈ ।ਇਸ ਹਲਕੇ ਤੋਂ ਪੀ. ਸੀ. ਪਾਰਟੀ ਨੇ ਐਡਵੋਕੇਟ ਜਗਦੀਪ ਕੌਰ ਸਹੋਤਾ ਨੂੰ ਮੈਦਾਨ ਵਿਚ ਉਤਾਰਿਆ ਹੈ ।ਉਨ੍ਹਾਂ ਦਾ ਮੁਕਾਬਲਾ ਲਿਬਰਲ ਪਾਰਟੀ ਦੇ ਅਵਿਨਾਸ਼ ਖੰਗੂੜਾ ਤੇ ਵਾਈਲਡ ਰੋਜ਼ ਪਾਰਟੀ ਦੇ ਹਰਦਿਆਲ ਸਿੰਘ ਹੈਪੀ ਮਾਨ ਨਾਲ ਹੈ ।
ਐਡਮਿੰਟਨ ਮੈਨਿੰਗ ਹਲਕੇ ਤੋਂ ਗੁਰਚਰਨ ਸਿੰਘ ਗਰਚਾ ਤੇ ਐਡਮਿੰਟਨ ਐਲਰਸਲੀ ਤੋਂ ਹਰਮਨ ਕੰਦੋਲਾ ਪੀ. ਸੀ. ਪਾਰਟੀ ਵੱਲੋਂ ਚੋਣ ਮੈਦਾਨ ਵਿਚ ਹਨ ।ਐਡਮਿੰਟਨ ਮਿਲਵੁੱਡਜ਼ ਤੋਂ ਪੀ. ਸੀ. ਪਾਰਟੀ ਨੇ ਪਾਕਿਸਤਾਨੀ ਪੰਜਾਬੀ ਸੁਹੇਲ ਕਾਦਰੀ ਨੂੰ ਉਮੀਦਵਾਰ ਬਣਾਇਆ ਹੈ ।ਲਿਬਰਲ ਪਾਰਟੀ ਵੱਲੋਂ ਕੈਲਗਰੀ ਹਾਕਵੁੱਡ ਤੋਂ ਹਰਬਖਸ਼ ਸਿੰਘ ਸੇਖੋਂ, ਐਡਮਿੰਟਨ ਮਿਲਕਰੀਕ ਤੋਂ ਹਰਪ੍ਰੀਤ ਸਿੰਘ ਗਿੱਲ, ਐਡਮਿੰਟਨ ਕੈਲਡਰ ਤੋਂ ਅਮਿਤ ਬੱਤਰਾ ਨੂੰ ਉਮੀਦਵਾਰ ਬਣਾਇਆ ਗਿਆ ਹੈ ।
ਅਲਬਰਟਾ ਦੀ ਵਿਰੋਧੀ ਧਿਰ ਵਾਈਲਡ ਰੋਜ਼ ਵੱਲੋਂ ਕੈਲਗਰੀ ਫੋਰਟ ਤੋਂ ਜੀਵਨ ਮਾਂਗਟ, ਕੈਲਗਰੀ ਨਾਰਥ ਹਿੱਲ ਤੋਂ ਪ੍ਰਸਾਦ ਪਾਂਡਾ, ਚੈਸਟਮੇਅਰ ਤੋਂ ਲੀਲਾ ਆਹੀਰ ਤੇ ਐਡਮਿੰਟਨ ਮਿਲਵੁੱਡਜ਼ ਤੋਂ ਬਲਜੀਤ ਸਿੰਘ ਸੱਲ ਉਮੀਦਵਾਰ ਹਨ ।ਕੈਲਗਰੀ ਗਰੀਨਵੇਅ, ਕੈਲਗਰੀ ਮੈਕਾਲ ਸਮੇਤ ਹੋਰ ਕਈ ਹਲਕਿਆਂ ਵਿਚ ਸਿੱਖ ਅਤੇ ਪੰਜਾਬੀ ਉਮੀਦਵਾਰਾਂ ਦਾ ਆਪਸ ਵਿਚ ਹੀ ਮੁਕਾਬਲਾ ਹੋਣ ਕਾਰਨ ਸਿੱਖ ਅਤੇ ਪੰਜਾਬੀ ਵੋਟਰ ਸ਼ਸ਼ੋਪੰਜ ਵਿਚ ਹਨ ।
ਪੰਜਾਬੀ ਵੋਟਰ ਭਾਵੇਂ ਆਪਣੇ ਦਿਲ ਦੀ ਗੱਲ ਖੁੱਲ੍ਹ ਕੇ ਨਹੀਂ ਦੱਸ ਰਹੇ ਪਰ ਉਨ੍ਹਾਂ ਦਾ ਜ਼ਿਆਦਾਤਰ ਉਲਾਰ ਮੁੱਖ ਪਾਰਟੀਆਂ ਪੀ. ਸੀ. ਤੇ ਵਾਈਲਡ ਰੋਜ਼ ਪਾਰਟੀਆਂ ਦੇ ਉਮੀਦਵਾਰਾਂ ਵੱਲ ਹੀ ਨਜ਼ਰ ਆ ਰਿਹਾ ਹੈ ।2012 ਦੀਆਂ ਵਿਧਾਨ ਸਭਾ ਚੋਣਾਂ ਵਿਚ ਵੋਟਾਂ ਪੈਣ ਤੋਂ ਪਹਿਲਾਂ ਤੱਕ ਵਾਈਲਡ ਰੋਜ਼ ਪਾਰਟੀ ਦਾ ਹੱਥ ਉਪਰ ਦੱਸਿਆ ਜਾ ਰਿਹਾ ਸੀ ਪਰ ਆਖਰੀ ਪਲਾਂ ਵਿਚ ਬਾਜ਼ੀ ਪੀ. ਸੀ. ਪਾਰਟੀ ਮਾਰ ਗਈ ਸੀ ।ਉਸ ਨੇ 87 ਮੈਂਬਰੀ ਵਿਧਾਨ ਸਭਾ ਵਿਚ 62 ਸੀਟਾਂ ਜਿੱਤ ਲਈਆਂ ਸਨ ।ਇਸ ਵਾਰ ਵੀ ਹੁਣ ਤੱਕ ਦੇ ਆਏ ਸਰਵੇਖਣ ਪੀ. ਸੀ. ਪਾਰਟੀ ਦੇ ਉਲਟ ਗਏ ਹਨ ਕੀ ਉਹ 2012 ਵਾਲੀ ਕਾਰਗੁਜ਼ਾਰੀ ਦੁਹਰਾ ਸਕੇਗੀ, ਇਸ ਬਾਰੇ ਅਜੇ ਕੁੱਝ ਵੀ ਕਿਹਾ ਨਹੀਂ ਜਾ ਸਕਦਾ ।
