ਨਵੀਂ ਦਿੱਲੀ (1 ਮਈ, 2015): ਸਿਰਸਾ ਦੇ ਬਦਨਾਮ ਸੌਦਾ ਸਾਧ ਵੱਲੋਂ ਆਪਣੇ ਹੀ ਡੇਰੇ ਦੀ ਸਾਧਵੀਆਂ ਨਾਲ ਬਲਾਤਕਾਰ ਕਰਨ ਦੇ ਮਾਮਲੇ ਵਿੱਚ ਅੱਜ ਭਾਰਤੀ ਸੁਪਰੀਮ ਕੋਰਟ ਨੇ ਸੌਦਾ ਸਾਧ ਗੁਰਮੀਤ ਰਾਮ ਰਹੀਮ ਦੀ ਪਟੀਸ਼ਨ ‘ਤੇ 1999 ਦੇ ਜਬਰ ਜਨਾਹ ਮਾਮਲੇ ਵਿਚ ਪੰਚਕੂਲਾ ਦੀ ਸੀ. ਬੀ. ਆਈ. ਅਦਾਲਤ ਸਾਹਮਣੇ ਕੁਝ ਹੋਰ ਗਵਾਹ ਸੱਦਣ ਬਾਰੇ ਇਜਾਜ਼ਤ ਦੇ ਦਿੱਤੀ ਹੈ।
16 ਸਾਲ ਪੁਰਾਣਾ ਮਾਮਲਾ ਹਰਿਆਣਾ ਦੀਆਂ ਦੋ ਲੜਕੀਆਂ ਵਲੋਂ ਸੌਦਾ ਸਾਧ ਖਿਲਾਫ਼ ਦਾਇਰ ਸ਼ਿਕਾਇਤ ਨਾਲ ਸਬੰਧਤ ਹੈ। ਦੋਵੇਂ ਲੜਕੀਆਂ ਪੰਚਕੂਲਾ ਵਿਚ ਸੌਦਾ ਸਾਧ ਦੇ ਆਸ਼ਰਮ ਵਿਚ ਰਹਿੰਦੀਆਂ ਸਨ ਜਿਥੇ ਕਥਿਤ ਤੌਰ ‘ਤੇ ਘਟਨਾ ਵਾਪਰੀ ਸੀ।
ਲੜਕੀਆਂ ਨੇ ਦਾਅਵਾ ਕੀਤਾ ਕਿ ਸੌਦਾ ਸਾਧ ਨੇ 1999 ਵਿਚ ਉਨ੍ਹਾਂ ਨਾਲ ਕਥਿਤ ਤੌਰ ‘ਤੇ ਜਬਰ ਜਨਾਹ ਕੀਤਾ ਸੀ।
ਮਾਮਲਾ ਪੰਚਕੂਲਾ ਦੀ ਸੀ. ਬੀ. ਆਈ. ਅਦਾਲਤ ਦੇ ਸਾਹਮਣੇ ਵਿਚਾਰ ਅਧੀਨ ਹੈ। ਜਸਟਿਸ ਦੀਪਕ ਮਿਸ਼ਰਾ ਅਤੇ ਜਸਟਿਸ ਪ੍ਰਫੁੱਲ ਸੀ ਪੰਤ ‘ਤੇ ਆਧਾਰਤ ਸਾਂਝੇ ਡਵੀਜ਼ਨ ਬੈਂਚ ਨੇ ਸੌਦਾ ਸਾਧ ਦੀ ਪੰਜ ਗਵਾਹ ਸੱਦਣ ਬਾਰੇ ਪਟੀਸ਼ਨ ਸਵੀਕਾਰ ਕਰ ਲਈ ਜਿਨ੍ਹਾਂ ਵਿਚੋਂ ਚਾਰ ਰੱਖਿਆ ਪੱਖ ਨਾਲ ਸੰਬੰਧਿਤ ਹਨ ਅਤੇ ਇਕ ਹੋਰ ਇਕ ਮਾਹਿਰ ਗਵਾਹ ਹੈ। ਸੁਪਰੀਮ ਕੋਰਟ ਨੇ ਮਾਮਲੇ ਦੀ ਅਗਲੀ ਸੁਣਵਾਈ 11 ਮਈ ‘ਤੇ ਪਾ ਦਿੱਤੀ ਹੈ।
