ਲਖਨਊ (17 ਅਕਤੂਬਰ, 2014): ਅਯੋਧਿਆ ‘ਚ ਰਾਮ ਮੰਦਰ ਉਸਾਰੀ ਦਾ ਰਾਗ ਇਕ ਵਾਰ ਫਿਰ ਛੇੜਦਿਆਂ ਰਾਸ਼ਟਰੀ ਸਵੈਮਸੇਵਮ ਸੰਘ (ਆਰ.ਐਸ.ਐਸ.) ਨੇ ਅੱਜ ਕਿਹਾ ਕਿ ਇਹ ਮੁੱਦਾ ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਦੇ ਚੋਣ ਮਨੋਰਥ ਪੱਤਰ ‘ਚ ਰਿਹਾ ਹੈ ਅਤੇ ਕੇਂਦਰ ਸਰਕਾਰ ਕੋਲ ਇਸ ਲਈ 2019 ਤਕ ਦਾ ਸਮਾਂ ਹੈ।
ਸੰਘ ਦੇ ਸੰਯੁਕਤ ਜਨਰਲ ਸਕੱਤਰ ਦੱਤਾਤਰੇ ਹੋਸਬਾਲੇ ਨੇ ਪੱਤਰਕਾਰਾਂ ਦੇ ਇਕ ਸਵਾਲ ਦੇ ਜਵਾਬ ‘ਚ ਕਿਹਾ, ”ਰਾਮ ਮੰਦਰ ਦਾ ਮੁੱਦਾ ਤਾਂ ਪਹਿਲਾਂ ਹੀ ਭਾਜਪਾ ਦੇ ਚੋਣ ਮਨੋਰਥ ਪੱਤਰ ‘ਚ ਹੈ। ਰਾਮ ਮੰਦਰ ਤਾਂ ਦੇਸ਼ ਦੇ ਏਜੰਡੇ ‘ਤੇ ਹੈ, ਦੇਸ਼ ਹਿਤ ‘ਚ ਹੈ। ਅਸੀਂ ਰਾਮ ਮੰਦਰ ਉਸਾਰੀ ਲਈ ਧਰਮ ਆਚਾਰੀਆਂ ਅਤੇ ਵਿਸ਼ਵ ਹਿੰਦੂ ਪਰਿਸ਼ਦ ਦੇ ਅੰਦੋਲਨ ਦੀ ਹਮਾਇਤ ਕਰਦੇ ਰਹੇ ਹਾਂ।”
ਇਹ ਪੁੱਛੇ ਜਾਣ ‘ਤੇ ਕਿ ਭਾਜਪਾ ਪੂਰਨ ਬਹੁਮਤ ਦੀ ਸਰਕਾਰ ਬਣਨ ‘ਤੇ ਮੰਦਰ ਉਸਾਰੀ ਦਾ ਰਾਹ ਸਾਫ਼ ਕਰਨ ਲਈ ਕਾਨੂੰਨ ਬਣਾਉਣ ਦੀ ਗੱਲ ਕਰਦੀ ਰਹੀ ਹੈ ਅਤੇ ਹੁਣ ਭਾਜਪਾ ਦੀ ਬਹੁਮਤ ਦੀ ਸਰਕਾਰ ਬਣਨ ‘ਤੇ ਕੀ ਸੰਘ ਇਸ ਬਾਬਤ ਕੋਈ ਮੰਗ ਕਰੇਗਾ, ਹੋਸਬਾਲੇ ਨੇ ਕਿਹਾ, ”ਸਰਕਾਰ ਦੀਆਂ ਅਪਣੀਆਂ ਪਹਿਲਾਂ ਹਨ, ਸਰਕਾਰ ਉਨ੍ਹਾਂ ਅਨੁਸਾਰ ਕੰਮ ਕਰੇਗੀ, ਅਜੇ ਉਸ ਕੋਲ 2019 ਤਕ ਦਾ ਸਮਾਂ ਹੈ।”
ਹੋਸਬਾਲੇ ਆਰ.ਐਸ.ਐਸ. ਦੀ ਅੱਜ ਇੱਥੇ ਸ਼ੁਰੂ ਹੋਈ ਤਿੰਨ ਦਿਨਾਂ ਦੀ ਕੁੱਲ ਭਾਰਤੀ ਕਾਰਜਕਾਰੀ ਮੰਡਲ ਦੀ ਬੈਠਕ ਬਾਰੇ ਜਾਣਕਾਰੀ ਦੇਣ ਲਈ ਪੱਤਰਕਾਰਾਂ ਨਾਲ ਗੱਲਬਾਤ ਕਰ ਰਹੇ ਸਨ। ਤਿੰਨ ਦਿਨਾਂ ਤਕ ਚੱਲਣ ਵਾਲੀ ਬੈਠਕ ਦੀ ਸ਼ੁਰੂਆਤ ਸੰਘ ਮੁਖੀ ਮੋਹਨ ਭਾਗਵਤ ਨੇ ਕੀਤੀ। ਇਸ ਬੈਠਕ ‘ਚ ਸ਼ਾਮਲ ਹੋਣ ਲਈ ਸੰਘ ਅਹੁਦੇਦਾਰਾਂ ਅਤੇ ਸਵੈਮਸੇਵਕਾਂ ਤੋਂ ਇਲਾਵਾ ਭਾਜਪਾ ਦੇ ਕੌਮੀ ਪ੍ਰਧਾਨ ਅਮਿਤ ਸ਼ਾਹ ਵੀ ਆਇਆ ਹੈ, ਜੋ ਵਿਸ਼ੇਸ਼ ਸੱਦੇ ‘ਤੇ ਅੱਜ ਬੈਠਕ ‘ਚ ਹਾਜ਼ਰ ਰਵੇਗਾ।
