ਰਾਜਪੁਰਾ (24 ਸਤੰਬਰ, 2014): ਭਾਈ ਜਗਤਾਰ ਸਿੰਘ ਹਵਾਰਾ ਅਤੇ ਸਾਥੀਆਂ ਨੂੰ ਚੰਡੀਗੜ੍ਹ ਦੀ ਬੁੜੈਲ ਜੇਲ ਵਿੱਚੋਂ ਸੁਰੰਘ ਪੁੱਟ ਕੇ ਫਰਾਰ ਕਰਵਾਉਣ ਦੇ ਮਾਮਲੇ ਵਿੱਚ ਅਦਾਲਤੀ ਕਾਰਵਾਈ ਦਾ ਸਾਹਮਣਾ ਕਰ ਰਹੇ ਭਾਈ ਗੁਰਦੀਪ ਸਿੰਘ ਰਾਣਾ ਨੇ ਅੱਜ ਰਾਜਪੁਰਾ ਦੀ ਅਦਾਲਤ ਵਿਚ ਆਤਮ-ਸਮਰਪਣ ਕਰ ਦਿਤਾ ਹੈ।
ਆਤਮ-ਸਮਰਪਣ ਦੀ ਸੂਚਨਾ ਮਿਲਦੇ ਹੀ ਬਨੂੜ ਪੁਲਿਸ ਦੀ ਟੀਮ ਰਾਜਪੁਰਾ ਪਹੁੰਚੀ ਅਤੇ ਖਾੜਕੂ ਗੁਰਦੀਪ ਸਿੰਘ ਰਾਣਾ ਦਾ ਪੁਲਿਸ ਰੀਮਾਂਡ ਮੰਗਿਆ ਪਰ ਜੱਜ ਜੱਜ ਕ੍ਰਿਸ਼ਨਾ ਨੂਜਾ ਮਿੱਤਲ ਨੇ ਉਸ ਨੂੰ 10 ਅਕੂਤਬਰ ਤਕ ਜੁਡੀਸੀਅਲ ਰੀਮਾਂਡ ‘ਤੇ ਪਟਿਆਲਾ ਜੇਲ ਭੇਜ ਦਿਤਾ।
ਬਨੂੜ ਦੇ ਥਾਣਾ ਮੁਖੀ ਦੀਵਿੰਦਰ ਅਤਰੀ ਨੇ ਦਸਿਆ ਕਿ ਗੁਰਦੀਪ ਸਿੰਘ ਰਾਣਾ ਨੇ ਜਗਤਾਰ ਸਿੰਘ ਹਵਾਰਾ ਜੇਲ ਤੋੜ ਕਾਂਡ ਵਿਚ ਵੀ ਮਦਦ ਕੀਤੀ ਸੀ ਅਤੇ ਉਹ ਅਖੌਤੀ ਸਾਧ ਪਿਆਰਾ ਸਿੰਘ ਭਨਿਆਰਾਂ ਵਾਲੇ ‘ਤੇ ਹਮਲੇ ਦੇ ਮਾਮਲੇ ਵਿਚ ਵੀ ਨਾਮਜ਼ਦ ਸੀ। ਬਨੂੜ ਪੁਲਿਸ ਨੇ ਉਸ ਵਿਰੁਧ ਧਾਰਾ 399,406,411 ਅਤੇ ਆਰਮਜ਼ ਐਕਟ 25/54/59 ਤਹਿਤ ਮਾਮਲਾ ਦਰਜ ਕੀਤਾ ਹੋਇਆ ਹੈ ਅਤੇ ਪੁਲਿਸ ਉਸ ਦੀ ਭਾਲ ਵਿਚ ਛਾਪੇ ਮਾਰ ਰਹੀ ਸੀ।
ਗੁਰਦੀਪ ਸਿੰਘ ਰਾਣਾ ਨੇ ਦਸਿਆ ਕਿ ਪੁਲਿਸ ਉਸ ਨੂੰ ਨਵੇਂ ਮਾਮਲੇ ਵਿਚ ਫਸਾਉਣਾ ਚਾਹੁੰਦੀ ਸੀ ਜਿਸ ਕਰ ਕੇ ਉਹ ਕੁੱਝ ਸਮੇਂ ਲਈ ਰੂਪੋਸ਼ ਹੋ ਗਿਆ ਸੀ। ਉਸ ਨੇ ਦੋਸ਼ ਲਾਇਆ ਕਿ ਪੁਲਿਸ ਉਸ ਦੇ ਪਰਵਾਰਕ ਜੀਆਂ ਅਤੇ ਉਸ ਦੇ ਰਿਸ਼ਤੇਦਾਰਾਂ ਨੂੰ ਜਾਣ-ਬੁਝ ਕੇ ਪ੍ਰੇਸ਼ਾਨ ਕਰ ਰਹੀ ਸੀ। ਉਸ ਨੇ ਕਿਹਾ, ”ਮੈਂ ਅਪਣੇ ਆਪ ਰਾਜਪੁਰਾ ਅਦਾਲਤ ਵਿਚ ਆਤਮ-ਸਮਰਪਣ ਕੀਤਾ ਹੈ।”
