ਕੈਨੇਡਾ – ਕੈਨੇਡਾ ਦੇ ਸੂਬੇ ਆਲਬਰਟਾ ਵਿੱਚ ਵਕੀਲ ਬਣਨ ਦੀ ਪ੍ਰਕਿਰਿਆ ਨਾਲ ਜੁੜੀ ਇੱਕ ਮਹੱਤਵਪੂਰਣ ਸ਼ਰਤ ਨੂੰ ਅਦਾਲਤ ਵੱਲੋਂ ਰੱਦ ਕਰ ਦਿੱਤਾ ਗਿਆ ਹੈ। ਆਲਬਰਟਾ ਦੀ ਅਪੀਲ ਕੋਰਟ ਨੇ ਫੈਸਲਾ ਦਿੱਤਾ ਹੈ ਕਿ ਵਕੀਲ ਬਣਨ ਤੋਂ ਪਹਿਲਾਂ ਬਰਤਾਨਵੀ ਮਨਾਰਕੀ (ਰਾਜਾ/ਰਾਣੀ) ਲਈ ਵਫ਼ਾਦਾਰੀ ਦੀ ਸਹੁੰ ਚੁੱਕਣਾ ਸੰਵਿਧਾਨਿਕ ਅਧਿਕਾਰਾਂ ਦੇ ਖਿਲਾਫ਼ ਹੈ।
ਕੋਰਟ ਨੇ ਕਿਹਾ ਕਿ ਇਹ ਸਹੁੰ ਕੈਨੇਡਾ ਦੇ ਚਾਰਟਰ ਆਫ਼ ਰਾਈਟਸ ਐਂਡ ਫ਼ਰੀਡਮਜ਼ ਹੇਠ ਦਿੱਤੀ ਗਈ ਧਾਰਮਿਕ ਆਜ਼ਾਦੀ ਦਾ ਉਲੰਘਣ ਕਰਦੀ ਹੈ। ਇਸ ਕਾਰਨ ਹੁਣ ਆਲਬਰਟਾ ਵਿੱਚ ਨਵੇਂ ਵਕੀਲਾਂ ਲਈ ਇਹ ਲਾਜ਼ਮੀ ਨਹੀਂ ਰਹੇਗਾ ਕਿ ਉਹ ਮਨਾਰਕੀ ਨੂੰ ਵਫ਼ਾਦਾਰੀ ਦਾ ਸਹੁੰ ਚੁੱਕਣ।
ਇਹ ਮਾਮਲਾ ਉਸ ਸਮੇਂ ਉੱਠਿਆ ਜਦੋਂ ਇੱਕ ਅਮ੍ਰਿਤਧਾਰੀ ਸਿੱਖ ਵਕੀਲ ਭਾਈ ਪ੍ਰਭਜੋਤ ਸਿੰਘ ਨੇ ਇਸ ਸਹੁੰ ਨੂੰ ਅਦਾਲਤ ਵਿੱਚ ਚੁਣੌਤੀ ਦਿੱਤੀ। ਉਹਨਾਂ ਇਸ ਸਹੁੰ ਨੂੰ 2022 ਵਿੱਚ ਚੁਣੌਤੀ ਦਿੱਤੀ ਸੀ। ਪ੍ਰਭਜੋਤ ਸਿੰਘ ਦਾ ਕਹਿਣਾ ਸੀ ਕਿ ਸਿੱਖ ਹੋਣ ਵਜੋਂ ਉਹਨਾਂ ਦਾ ਸਮਰਪਣ ਸਿਰਫ਼ ਅਕਾਲ ਪੁਰਖ ਨੂੰ ਹੈ ਅਤੇ ਵਫਾਦਾਰੀ ਸਿੱਖ ਪੰਥ ਪ੍ਰਤੀ ਹੈ। ਉਹ ਕਿਸੇ ਵੀ ਮਨੁੱਖੀ ਸੰਸਥਾ ਜਾਂ ਰਾਜ ਲਈ ਵਫ਼ਾਦਾਰੀ ਦੀ ਸਹੁੰ ਨਹੀਂ ਦੇ ਚੁੱਕਣਗੇ, । ਉਹਨਾਂ ਦਲੀਲ ਦਿੱਤੀ ਕਿ ਇਹ ਸ਼ਰਤ ਨਾਲ ਉਹਨਾਂ ਦੀ ਧਾਰਮਿਕ ਆਜ਼ਾਦੀ ‘ਤੇ ਸਿੱਧਾ ਅਸਰ ਪੈਂਦਾ ਹੈ।
ਅਪੀਲ ਕੋਰਟ ਨੇ ਆਪਣੇ ਫੈਸਲੇ ਵਿੱਚ ਕਿਹਾ ਕਿ ਰਾਜ ਪ੍ਰਤੀ ਵਫ਼ਾਦਾਰੀ ਦਾ ਸਹੁੰ ਲੈਣ ਦੀ ਸ਼ਰਤ ਲੋਕਾਂ ਨੂੰ ਉਨ੍ਹਾਂ ਦੇ ਧਾਰਮਿਕ ਵਿਸ਼ਵਾਸਾਂ ਦੇ ਕਾਰਨ ਵਕਾਲਤ ਦੇ ਪੇਸ਼ੇ ਵਿੱਚ ਦਾਖ਼ਲੇ ਤੋਂ ਰੋਕ ਸਕਦੀ ਹੈ, ਜੋ ਕਿ ਇੱਕ ਲੋਕਤੰਤਰਕ ਸਮਾਜ ਲਈ ਠੀਕ ਨਹੀਂ।
ਕੋਰਟ ਨੇ ਇਹ ਵੀ ਸਪਸ਼ਟ ਕੀਤਾ ਕਿ ਵਕੀਲ ਬਣਨ ਲਈ ਬਾਕੀ ਦੋ ਕਾਨੂੰਨੀ ਸਹੁੰ —ਜੋ ਕਾਨੂੰਨ ਦੀ ਪਾਲਣਾ ਅਤੇ ਇਮਾਨਦਾਰੀ ਨਾਲ ਪੇਸ਼ਾ ਨਿਭਾਉਣ ਨਾਲ ਸਬੰਧਿਤ ਹਨ—ਉਹ ਜਾਰੀ ਰਹਿਣਗੀਆਂ। ਸਿਰਫ਼ ਮਨਾਰਕੀ ਨਾਲ ਵਫ਼ਾਦਾਰੀ ( ਰਾਜੇ ਪ੍ਰਤੀ ਵਫ਼ਾਦਾਰ)ਵਾਲੀ ਸਹੁੰ ਨੂੰ ਹੀ ਹਟਾਇਆ ਗਿਆ ਹੈ।ਕੈਨੇਡਾ ਦੇ ਸੂਬੇ ਅਲਬਰਟਾ ਵਿੱਚ ਬਰਤਾਨਵੀ ਰਾਜ ਘਰਾਣੇ ਪ੍ਰਤੀ ਵਫਾਦਾਰੀ ਦੀ ਸਹੁੰ ਚੁੱਕਣ ਦੀ ਇਹ ਰਸਮ ਪਿਛਲੇ ਲਗਭਗ 100 ਸਾਲਾਂ ਤੋਂ ਚੱਲੀ ਆ ਰਹੀ ਸੀ। ਜੋਕਿ ਹੁਣ ਖ਼ਤਮ ਹੋ ਗਈ ਹੈ।
ਪ੍ਰਭਜੋਤ ਸਿੰਘ ਕੈਨੇਡਾ ਵਿੱਚ ਸਿੱਖ ਫੈਡਰੇਸ਼ਨ ਕੈਨੇਡਾ ਸਰਗਰਮ ਭੂਮਿਕਾ ਨਿਭਾ ਰਹੇ ਹਨ। ਪ੍ਰਭਜੋਤ ਸਿੰਘ ਦਾ ਪਿਛੋਕੜ ਪੰਜਾਬ ਦੇ ਮੁਕਤਸਰ ਸਾਹਿਬ ਜ਼ਿਲ੍ਹੇ ਵੜਿੰਗ ਪਿੰਡ ਤੋਂ ਹੈ। ਉਹ 2023 ਤੋਂ ਕੈਨੇਡਾ ਵਿੱਚ ਵਕਾਲਤ ਕਰ ਰਹੇ ਹਨ।
