ਘਨੌਰ(16 ਮਾਰਚ , 2016): ਪੰਜਾਬ ਦੇ ਪਾਣੀਆਂ ‘ਤੇ ਡਾਕਾ ਮਾਰਦੀ ਸਤਲੁਜ਼ ਜਮੁਨਾ ਲਿੰਕ ਨਹਿਰ ਦੀ ਉਸਾਰੀ ਨੂੰ ਲੈਕੇ ਭਾਰਤੀ ਸੁਪਰੀਮ ਕੋਰਟ ਵਿੱਚ ਸੁਣਵਾਈ ਸ਼ੁਰੂ ਹੋਣ ਤੋਂ ਬਾਅਦ ਪਾਣੀਆਂ ਦਾ ਮੁੱਦਾ ਪੰਜਾਬ ਦੀ ਸਿਆਸਤ ਦਾ ਕੇਂਦਰੀ ਮੁੱਦਾ ਬਣ ਗਿਆ ਹੈ। ਪੰਜਾਬ ਦੀ ਸਤਾਧਾਰੀ ਪਾਰਟੀ ਬਾਦਲ ਦਲ ਨੇ ਜਿੱਥੇ ਇਸ ਮਾਮਲੇ ‘ਤੇ ਨਹਿਰ ਦੀ ਜ਼ਮੀਨ ਕਿਸਾਨਾਂ ਨੂੰ ਵਾਪਸ ਕਰਨ ਲਈ ਕਾਨੂੰਨ ਦਾ ਖਰੜਾ ਪਾਸ ਕਰ ਦਿੱਤਾ ਹੈ, ਉੱਥੇ ਪੰਜਾਬ ਦੀ ਕਾਂਗਰਸ ਪਾਰਟੀ ਨੂੰ ਪਾਣੀਆਂ ਦੇ ਮਾਮਲੇ ‘ਤੇ ਬਾਦਲ ਦਲ ਦਾ ਵਾਹ-ਵਾਹ ਖੱਟਣਾ ਹਜ਼ਮ ਨਹੀਂ ਹੋ ਰਿਹਾ ।
ਕਾਂਗਰਸ ਨੇ ਵੀ ਇਸ ਮਾਮਲੇ ‘ਤੇ ਆਪਣੀ ਭੱਲ ਬਣਾਉਣ ਲਈ ਵਿਧਾਇਕ ਦਲ ਦੇ ਮੁਖੀ ਨਾਲ ਵਿਧਾਨ ਸਭਾ ਹਲਕਾ ਘਨੌਰ ਦੇ ਪਿੰਡ ਕਪੂਰੀ ਪਹੁੰਚ ਕੇ ਨਹਿਰ ਨੂੰ ਕਹੀਆਂ ਨਾਲ ਆਪਣੇ ਹੱਥੀ ਪੂਰਨਾਂ ਸ਼ੁਰੂ ਕਰ ਦਿੱਤਾ।
ਕਾਂਗਰਸੀ ਵਿਧਾਇਕ ਦਲ ਹਲਕਾ ਘਨੌਰ ਦੇ ਉਸ ਚਰਚਿਤ ਪਿੰਡ ਕਪੂਰੀ ਪਹੁੰਚੇ ਜਿਥੋ ਉਕਤ ਨਹਿਰ ਨੂੰ ਪੁੱਟਣ ਦਾ ਕੰਮ ਭਾਰਤ ਦੀ ਸਾਬਕਾ ਪ੍ਰਧਾਨ ਮੰਤਰੀ ਗਾਂਧੀ ਵਲੋਂ ਸ਼ੁਰੂ ਹੋਇਆ ਸੀ। ਊਸੇ ਥਾਂ ਤੇ ਸਮੁੱਚੀ ਕਾਂਗਰਸ ਦੀ ਹਾਜਰੀ ‘ਚ ਇਸ ਮੁੱਦੇ ਤੇ ਵਿਰੋਧੀ ਧਿਰ ਦੇ ਨੇਤਾ ਚਰਨਜੀਤ ਸਿੰਘ ਚੰਨੀ ਦੀ ਅਗਵਾਈ ਹੇਠ ਕਾਂਗਰਸ ਦੇ ਸਾਰੇ ਵਿਧਾਇਕਾਂ ਵੱਲੋ ਮੋਰਚਾ ਨੰਬਰ ਦੋ ਸ਼ੁਰੂ ਕਰਕੇ ਐਸ ਵਾਈ ਐਲ ਨਹਿਰ ਨੂੰ ਆਪ ਕਸੀ ਨਾਲ ਮਿੱਟੀ ਪਾ ਕੇ ਪੁਰਨ ਦਾ ਕੰਮ ਸ਼ੁਰੂ ਕਰ ਦਿਤਾ ਗਿਆ।
ਅੱਜ ਨਹਿਰ ਮਾਮਲੇ ‘ਤੇ ਗਰਮਾਈ ਪੰਜਾਬ ਦੀ ਰਾਜਨੀਤੀ ਤਹਿਤ ਐਸ ਵਾਈ ਐਲ ਦੀ ਨਹਿਰੀ ਜਮੀਨ ਕਿਸਾਨਾਂ ਨੂੰ ਵਾਪਸ ਦੇਣ ਸੰਬਧੀ ਪੰਜਾਬ ਸਰਕਾਰ ਵੱਲੋ ਸਰਭਸੰਮਤੀ ਨਾਲ ਪਾਸ ਕੀਤੇ ਗਏ ਬਿਲ ਦੇ ਬਾਵਜੂਦ ਹੁਣ ਤਕ ਬਿਲ ਪੰਜਾਬ ਦੇ ਰਾਜਪਾਲ ਪ੍ਰ. ਕਪਤਾਨ ਸਿੰਘ ਸੋਲੰਕੀ ਕੋਲ ਨਾ ਪੁਹੰਚਾਉਣ ਤੇ ਖਫਾ ਹੋਈ ਕਾਂਗਰਸ ਵੱਲੋ ਵਿੱਧਾਨ ਸਭਾ ਦੇ ਸੈਸ਼ਨ ਦਾ ਬਾਈਕਾਟ ਵੀ ਕੀਤਾ ਗਿਆ।
ਪੰਜਾਬ ਸਰਕਾਰ ਵੱਲੋਂ ਨਹਿਰ ਦੀ ਜ਼ਮੀਨ ਕਿਸਾਨਾਂ ਨੂੰ ਵਾਪਸ ਕਰਨ ਦੇ ਕਾਨੂੰਨ ਦੇ ਖਰੜੇ ਨੂੰ ਪਾਸ ਕਰਨ ਤੋਂ ਬਾਅਦ ਕਿਸਾਨਾਂ ਨੇ ਵੀ ਆਪੋ ਆਪਣੇ ਖੇਤਾਂ ਵਿੱਚੋਂ ਲੰਘਦੀ ਨਹਿਰ ਨੂੰ ਜੇਸੀਬੀ ਮਸ਼ੀਨਾਂ ਲਾ ਕੇ ਢਾਹੁਣਾ ਸ਼ੁਰੂ ਕਰ ਦਿੱਤਾ ਹੈ।
