ਨਵੀਂ ਦਿੱਲੀ: ਦਿੱਲੀ ਕਮੇਟੀ ਦੇ ਪ੍ਰਧਾਨ ਮਨਜੀਤ ਸਿੰਘ ਜੀ.ਕੇ. ਨੇ ਭਾਈ ਜਗਤਾਰ ਸਿੰਘ ਹਵਾਰਾ ਦੇ ਬਰੀ ਹੋਣ ’ਤੇ ਕਿਹਾ ਕਾਂਗਰਸ ਦੇ ਰਾਜ ਵਿਚ ਵੱਡੀ ਗਿਣਤੀ ਵਿਚ ਬੇਗੁਨਾਹਾਂ ਨੂੰ ਅਤਿਵਾਦੀ ਦੱਸ ਫਸਾਇਆ ਗਿਆ।
ਜੀ.ਕੇ. ਨੇ ਕਿਹਾ ਕਿ ਬੀਤੇ ਦਿਨੀਂ ਮਾਲੇਗਾਂਵ ਬੰਬ ਧਮਾਕੇ ਵਿਚ ਜੇਲ ਵਿਚ ਬੰਦ ਸਾਧਵੀ ਪ੍ਰਗਿਆ ਨੂੰ ਐਨ.ਆਈ.ਏ. ਵੱਲੋਂ ਕਲੀਨ ਚਿੱਟ ਦੇਣ ਦਾ ਮਾਮਲਾ ਸਾਹਮਣੇ ਆਇਆ ਸੀ ਤੇ ਹੁਣ ਭਾਈ ਹਵਾਰਾ ਦੇ ਬਰੀ ਹੋਣ ਨਾਲ ਪੁਲਿਸ ਦੀ ਕਾਰਜਪ੍ਰਣਾਲੀ ਤੇ ਸਵਾਲਿਆ ਨਿਸ਼ਾਨ ਖੜਾ ਹੋ ਗਿਆ ਹੈ। ਜੀ.ਕੇ. ਨੇ ਬੇਗੁਨਾਹਾਂ ਨੂੰ ਅੱਤਵਾਦੀ ਦੱਸਕੇ ਜੇਲਾਂ ਵਿਚ ਬੰਦ ਕਰਨ ਦੇ ਪੁਲਸਿਆ ਰੁਝਾਨ ਨਾਲ ਗੈਰ-ਮਨੁੱਖੀ ਤਸ਼ੱਦਦ ਦਾ ਪਹਾੜ ਪਰਿਵਾਰ ਦੇ ਸਿਰ ਤੇ ਡਿਗਣ ਦਾ ਵੀ ਦਾਅਵਾ ਕੀਤਾ।
ਜੀ.ਕੇ. ਨੇ ਅਜਿਹੇ ਕਾਰਜਾਂ ਦੇ ਦੋਸ਼ੀ ਪੁਲਿਸ ਅਧਿਕਾਰੀਆਂ ਦੇ ਖਿਲਾਫ਼ ਨਿਆਇਕ ਜਾਂਚ ਦੀ ਮੰਗ ਕਰਦੇ ਹੋਏ ਇਸ ਮਸਲੇ ਤੇ ਦਿੱਲੀ ਕਮੇਟੀ ਵੱਲੋਂ ਕਾਨੂੰਨੀ ਚਾਰਾਜੋਈ ਸ਼ੁਰੂ ਕਰਨ ਦਾ ਵੀ ਇਸ਼ਾਰਾ ਕੀਤਾ। ਜੀ.ਕੇ. ਨੇ ਕਿਹਾ ਕਿ ਭਾਈ ਹਵਾਰਾ ਤਾ ਵੈਸੇ ਹੀ ਬੇਅੰਤ ਕਤਲਕਾਂਡ ਵਿਚ ਜੇਲ ’ਚ ਸਜਾ ਕੱਟ ਰਹੇ ਹਨ ਇਸ ਕਰਕੇ ਭਾਈ ਹਵਾਰਾ ਦੇ ਬਰੀ ਹੋਣ ਨਾਲ ਮਨੁੱਖੀ ਅਧਿਕਾਰਾਂ ਦੀ ਆਵਾਜ਼ ਬੁਲੰਦ ਕਰਨ ਵਾਲੇ ਲੋਕਾਂ ਨੂੰ ਸ਼ਾਇਦ ਜਿਆਦਾ ਫ਼ਰਕ ਨਹੀਂ ਪਿਆ। ਪਰ ਜੇਕਰ ਬਿਨਾਂ ਤਥਾਂ ਅਤੇ ਸਬੂਤਾਂ ਦੇ ਕਿਸੇ ਹੋਰ ਬੇਗੁਨਾਹ ਨੂੰ ਅੱਤਵਾਦੀ ਦੱਸਿਆ ਗਿਆ ਹੁੰਦਾ ਤਾਂ ਉਸਦੇ ਪਰਿਵਾਰ ਨੂੰ ਜੋ ਤਸ਼ੱਦਦ ਬਰਦਾਸ਼ਤ ਕਰਨਾ ਪੈਂਦਾ ਤਾਂ ਉਸਦਾ ਜਵਾਬਦੇਹ ਕੌਣ ਹੁੰਦਾ।
