ਹੁਸ਼ਿਆਰਪੁਰ( 7 ਜੁਲਾਈ, 2015): ਅੱਜ ਸਿੱਖ ਜੱਥੇਬੰਦੀ ਦਲ ਖਾਲਸਾ ਨੇ ਪੰਜਾਬ ਦੇ ਮੌਜੂਦਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਅਤੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੂੰ ਵੱਡਾ ਮੌਕਾ ਪ੍ਰਸਤ ਗਰਦਾਨਦਿਆਂ ਕਿਹਾ ਕਿ ਇਨ੍ਹਾਂ ਦੋਹਾਂ ਆਗੂਆਂ ਨੇ ਸਿੱਖ ਦੁਸ਼ਮਣ ਜਮਾਤ ਦੀਆਂ ਅੱਖਾਂ ਦੇ ਤਾਰੇ ਬਨਣ ਲਈ ਸਿੱਖ ਅਜ਼ਾਦੀ ਦੇ ਮੁੱਦੇ ਨੂੰ ਵਿਸਾਰ ਦਿੱਤਾ ਹੈ।
ਦਲ ਖਾਲਸਾ ਦੇ ਬੁਲਾਰੇ ਕੰਵਰਪਾਲ ਸਿੰਘ ਅਤੇ ਸਕੱਤਰ ਡਾ. ਮਨਜਿੰਦਰ ਸਿੰਘ ਨੇ ਕਿਹਾ ਕਿ ਪੰਜਾਬ ਵਿੱਚ ਖਾੜਕੂ ਲਹਿਰ ਦੇ ਸਿਖਰ ਦੌਰਾਨ ਪੰਜਾਬ ਅਤੇ ਸਿੱਖਾਂ ਦੇ ਉਕਤ ਦੋਹੇ ਆਗੂ ਸਿੱਖ ਅਜ਼ਾਦੀ ਦੀ ਲਹਿਰ ਨਾਲ ਨੇੜਿਉਂ ਜੁੜੇ ਰਹੇ ਸਨ।ਵੱਖਰੇ ਸਿੱਖ ਰਾਜ ਦੀ ਮੰਗ ਲਈ ਸੰਯੁਕਤ ਰਾਸ਼ਟਰ ਨੂੰ ਦਿੱਤੇ ਯਾਦ ਪੱਤਰ ‘ਤੇ ਬਾਦਲ ਨੇ ਦਸਤਖਤ ਕੀਤੇ ਸਨ, ਜਦਕਿ ਕੈਪਟਨ ਅਮਰਿੰਦਰ ਸਿੰਘ ਨੇ ਸੰਘੀ ਢਾਂਚੇ ਲਈ ਅੰਮ੍ਰਿਤਸਰ ਐਲਾਨਨਾਮੇ ‘ਤੇ ਆਪਣੀ ਸਹੀ ਪਾਈ ਸੀ।ਪਰ ਜਿਉਂ ਹੀ ਖਾੜਕੂ ਲਹਿਰ ਦਾ ਪ੍ਰਭਾਵ ਘਟਣ ਲੱਗਿਆ ਤਾਂ ਦੋਹਾਂ ਆਗੂਆਂ ਨੇ ਆਪਣੇ ਆਪ ਨੂੰ ਦਿੱਲੀ ਦੇ ਵੱਡੇ ਭਗਤ ਸਿੱਧ ਕਰਨ ਲਈ ਇੱਕ ਦੂਜੇ ਤੋਂ ਅੱਗੇ ਨਿਕਲਣ ਦੀ ਕੋਸ਼ਿਸ਼ ਵਿੱਚ ਹਨ।
ਪੰਜਾਬ ਦੇ ਲੋਕ ਕਿਵੇਂ ਇਸ ਤਰਾਂ ਦੇ ਖੁਦਗਰਜ਼ ਅਤੇ ਬੇਸ਼ਰਮ ਲੋਕਾਂ ‘ਤੇ ਯਕੀਨ ਕਰ ਸਕਦੇ ਹਨ, ਜੋ ਸਮੇਂ ਬਦਲਣ ਦੇ ਨਾਲ ਆਪਣੀ ਵਿਚਾਰਧਾਰਾ ਹੀ ਬਦਲ ਜਾਂਦੇ ਹਨ।
ਉਨ੍ਹਾਂ ਕਿਹਾ ਕਿ ਸਾਨੂੰ ਇਸ ਗੱਲ ਦਾ ਪੂਰਾ ਵਿਸ਼ਵਾਸ਼ ਹੈ ਅਤੇ ਵਾਪਰੀਆਂ ਘਟਨਾਵਾਂ ਇਹ ਸਿੱਧ ਕਰਦੀਆਂ ਹਨ ਕਿ ਇਹ ਦੋਵੇਂ ਆਗੂ ਸਿੱਖ ਅਜ਼ਾਦੀ ਦੇ ਕਾਜ਼ ਪ੍ਰਤੀ ਕਦੇ ਵੀ ਸੁਹਿਰਦ ਨਹੀਂ ਹੋਏ। ਭਾਂਵੇਂ ਕਿ ਇਨ੍ਹਾਂ ਦੋਹਾਂ ਆਗੂਆਂ ਨੇ ਸਿੱਖ ਅਜ਼ਾਦੀ ਦੇ ਕਾਜ਼ ਲਈ ਇਤਿਹਾਸਕ ਦਸਤਾਵੇਜ਼ਾਂ ‘ਤੇ ਵੱਖਰੇ- ਵੱਖਰੇ ਦਸਤਖਤ ਕੀਤੇ ਸਨ।
ਦਲ ਖਾਲਸਾ ਦੇ ਆਗੂਆਂ ਨੇ ਵਿਚਾਰਾਂ ਦਾ ਪ੍ਰਗਾਟਾਵਾ ਕਰਦਿਆਂ ਕਿਹਾ ਕਿ ਸੰਘਰਸ਼ਸ਼ੀਲ ਲੋਕ ਕਦੇ ਵੀ ਆਪਣਾ ਨਿਸ਼ਾਨਾ ਨਹੀਂ ਬਦਲਦੇ ਭਾਂਵੇ ਕਿ ਉਨ੍ਹਾਂ ਦੇ ਆਗੂ ਕਿਸੇ ਵੀ ਕਾਰਣ ਸੰਘਰਸ਼ ਤੋਂ ਪਾਸਾ ਵੱਟ ਲੈਣ।
ਉਨ੍ਹਾਂ ਕਿਹਾ ਕਿ ਖਾਲਿਸਤਾਨ ਦੀ ਪ੍ਰਾਪਤੀ ਲਈ ਸੈਕੜੇ ਸਿੱਖਾਂ ਨੇ ਕੁਰਬਾਨੀਆਂ ਕੀਤੀਆਂ ਅਤੇ ਅਜੇ ਕਈ ਜੇਲਾਂ ਵਿੱਚ ਬੰਦ ਹਨ।ਇਸ ਲਈ “ਖਾਲਿਸਤਾਨ ਦੇ ਮੁੱਦੇ” ‘ਤੇ ਇੱਕ ਦੂਜੇ ਨੂੰ ਤੋਹਮਤਾ ਲਾਉਣ ਅਤੇ ਸਿੱਖੀ ਦੇ ਇਸ ਪਵਿੱਤਰ ਕਾਜ਼ ਦਾ ਮਜ਼ਾਕ ਬਣਾਉਣ ਦੀ ਬਜ਼ਾਏ ਦੋਵੇਂ ਆਗੂ ਦਿੱਲੀ ਭਗਤੀ ਛੱਡ ਕੇ ਆਪਣੀ ਕੌਮ ਨਾਲ ਇਮਾਨਦਾਰੀ ਨਾਲ ਖੜੇ ਹੋਣ।
ਉਨ੍ਹਾਂ ਕਿਹਾ ਕਿ ਇਸ ਵਿੱਚ ਕੋਈ ਹੈਰਾਨੀ ਨਹੀਂ ਹੋਵੇਗੀ ਕਿ ਜੇਕਰ ਸਿੱਖ ਅਜ਼ਾਦੀ ਲਹਿਰ ਦੁਬਾਰਾ ਤਾਕਤ ਵਿੱਚ ਆਉਦੀ ਹੈ ਤਾਂ ਇਹ ਲੋਕ ਖਾਲਿਸਤਾਨੀ ਆਗੂਆਂ ਦੀ ਕਤਾਰ ਵਿੱਚ ਖੜੇ ਹੋਣ।
