ਸਲੋਹ, ਲੰਡਨ ( 18 ਅਪ੍ਰੈਲ, 2015): ਵਿਵਾਦਤ ਫਿਲਮ ਨਾਨਕ ਸ਼ਾਹ ਫਕੀਰ ਨੂੰ ਸਿਨੇਮਾਂ ਘਰਾਂ ਵਿੱਚ ਵਿਖਾਉਣ ਖਿਲ਼ਾਫ ਸਿੱਖਾਂ ਵੱਲੋਂ ਸਲੋਹ ਵਿੱਚ ਵਿਰੋਧ ਕੀਤਾ ਗਿਆ।ਇਹ ਫਿਲਮ ਐਮਪਾਇਰ ਸਿਨੇਮਾ ਹਾਲ ਵਿੱਚ ਵਿਖਾਈ ਜਾਣੀ ਸੀ।ਸਿੱਖਾਂ ਦੇ ਇੱਕ ਗਰੁੱਪ ਨੇ ਸਿੱਖ ਸਿਧਾਂਤਾਂ ਨਾਲ ਖਿਲਵਾੜ ਕਰਦੀ ਇਸ ਫਿਲਮ ਖਿਲਾਫ ਸ਼ਾਤਮਈ ਰੋਸ ਪ੍ਰਗਟਾਵਾ ਕੀਤਾ।
ਐਮਪਾਇਰ ਸਿਨੇਮਾ ਹਾਲ ਦੇ ਪ੍ਰਬੰਧਕਾਂ ਨੇ ਇਸ ਫਿਲਮ 17 ਅਪ੍ਰੈਲ਼ ਨੂੰ ਸਥਨਿਕ ਸਮੇਂ 19:50 ਵਜੇ ਵਿਖਾਉਣੀ ਸੀ।ਫਿਲਮ ਦਾ ਵਿਰੋਧ ਕਰ ਰਹੀ ਸਿੱਖ ਸੰਗਤ 19:00 ਵਜੇ ਸਿਨੇਮਾ ਹਾਲ ਦੇ ਬਾਹਰ ਇਕੱਠੀ ਹੋ ਗਈ ਸੀ।ਉਨ੍ਹਾਂ ਨੇ ਰੋਸ ਵਜੋਂ ਕਾਲੇ ਝੰਡੇ ਲੈਕੇ ਵਿਖਾਵਾ ਕੀਤਾ।
ਸਥਾਨਿਕ ਸੂਤਰਾਂ ਨੇ ਸਿੱਖ ਸਿਆਸਤ ਨੂੰ ਫੋਨ ‘ਤੇ ਦੱਸਿਆ ਕਿ ਫਿਲਮ ਦਰਸ਼ਕਾਂ ਦੀ ਖਿੱਚ ਦਾ ਕੇਂਦਰ ਬਨਣ ਵਿੱਚ ਬੂਰੀ ਤਰਾਂ ਅਸਫਲ ਰਹੀ।ਫਿਲਮ ਦੇ ਪਹਿਲੇ ਸ਼ੋਅ ਦੌਰਾਨ ਕੇਵਲ ਪੰਜ ਦਰਸ਼ਕਾਂ ਨੇ ਫਿਲਮ ਨੂੰ ਵੇਖਿਆ, ਜਦਕਿ ਦੂਸਰੇ ਸ਼ੋਅ ਦੌਰਾਨ ਸਿਰਫ ਦੋ ਦਰਸ਼ਕ ਹੀ ਫਿਲਮ ਵੇਖਣ ਆਏ।
ਅਜੇ ਤੱਕ ਐਮਪਾਇਰ ਸਿਨੇਮਾਂ ਨੇ ਇਸ ਫਿਲਮ ਨੂੰ ਵਿਖਾਇਆ ਜਾਣਾ ਬੰਦ ਨਹੀਂ ਕੀਤਾ, ਇਸ ਲਈ ਸਿੱਖ ਸੰਗਤ ਅੱਜ ਫਿਰ (18 ਅਪ੍ਰੈਲ) ਨੂੰ ਸ਼ਾਂਤਮਈ ਰੋਸ ਮੁਜ਼ਾਹਰਾ ਕਰੇਗੀ।
ਇਸੇ ਤਰਾਂ ਬਿਰਮਿੰਘਮ ਦੇ ਸਟਾਰ ਸਿਟੀ ਸਿਨੇਮਾ ਹਾਲ ਵਿੱਚ ਵੀ ਇਸ ਵਿਵਾਦਤ ਫਿਲਮ ਨਾਨਕ ਸ਼ਾਹ ਫਕੀਰ ਨੂੰ ਵਿਖਾਇਆ ਗਿਆ, ਜਿਸਦੇ ਰੋਸ ਵਜੋਂ ਸਿੱਖ ਸੰਗਤ ਨੇ ਸਿਨੇਮਾ ਹਾਲ ਦੇ ਬਾਹਰ ਸ਼ਾਂਤਮਈ ਰੋਸ ਮੁਜ਼ਾਹਰਾ ਕੀਤਾ, ਇੱਥੇ ਵੀ ਦਰਸ਼ਕਾਂ ਵੱਲੋਂ ਇਸ ਫਿਲਮ ਨੂੰ ਕੋਈ ਹੁੰਗਾਰਾ ਨਹੀਂ ਮਿਲਿਆ।
ਇਸੇ ਦੌਰਾਨ ਹੀ ਸਮੁੱਚੇ ਕੈਨੇਡਾ ਵਿੱਚ ਫਿਲਮ ਸਿਨੇਮੇ ਘਰਾਂ ਵਿੱਚ ਨਹੀਂ ਲੱਗ ਸਕੀ। ਇਸ ਫਿਲਮ ‘ਤੇ ਪਹਿਲਾਂ ਹੀ ਪੰਜਾਬ ਅਤੇ ਚੰਡੀਗੜ੍ਹ ਵਿੱਚ ਪਾਬੰਦੀ ਲੱਗ ਚੁੱਕੀ ਹੈ ਅਤੇ ਦਿੱਲੀ ਵਿੱਚ ਵੀ ਸਿੱਖ ਸੰਗਤਾਂ ਦੇ ਰੋਸ ਤੋਂ ਬਾਅਦ ਕਈ ਸਿਨੇਮਿਆਂ ਨੇ ਫਿਲਮ ਨੂੰ ਵਿਖਾਉਣਾ ਬੰਦ ਕਰ ਦਿੱਤਾ ਹੈ।
