ਵਾਸ਼ਿੰਗਟਨ (3 ਜੁਲਾਈ 2014): ਅਮਰੀਕਾ ’ਚ ਸਿੱਖਾਂ ਵੱਲੋਂ ਅਮਰੀਕਾ ਦੀ ਤਰੱਕੀ ਵਿੱਚ ਪਾਏ ਯੋਗਦਾਨ ਅਤੇ ਪਛਾਣ ਅਤੇ ਸਿੱਖ ਦਸਤਾਰ ਪ੍ਰਤੀ ਅਮਰੀਕੀਆਂ ਨੂੰ ਜਾਣੂ ਕਰਵਾਉਣ ਲਈ ਉੱਥੋਂ ਦੇ ਸਿੱਖਾਂ ਵੱਲੋਂ ਇੱਕ ਵਿਸ਼ੇਸ ਪ੍ਰਚਾਰ ਮੁਹਿੰਮ ਸ਼ੁਰੂ ਕੀਤੀ ਗਈ ਹੈ।ਪਿਛਲੇ ਕਾਫੀ ਸਮੇਂ ਤੋਂ ਸਿੱਖ ਪਛਾਣ ਪ੍ਰਤੀ ਅਨਜਾਣਤਾ ਕਾਰਣ, ਸਿੱਖਾ ‘ਤੇ ਹੁੰਦੇ ਨਸਲੀ ਹਮਲਿਆਂ ਨੂੰ ਰੋਕਣ ਲਈ ਇਹ ਉਪਰਾਲਾ ਕੀਤਾ ਗਿਆ ਹੈ।
ਅਮਰੀਕਾ ਦੇ ਕੇਬਲ ਚੈਨਲ ’ਤੇ 30 ਸਕਿੰਟਾਂ ਦਾ ਇਸ਼ਤਿਹਾਰ ਪ੍ਰਸਾਰਤ ਕੀਤਾ ਜਾ ਰਿਹਾ ਹੈ ਜਿਸ ’ਚ ਸਿੱਖ ਅਦਾਕਾਰ ਵਾਰਿਸ ਆਹਲੂਵਾਲੀਆ ਅਮਰੀਕਾ ’ਚ ਵਸਦੇ ਹੋਰਨਾਂ ਸਿੱਖਾਂ ਦੀਆਂ ਤਸਵੀਰਾਂ ਨਾਲ ਦੇਸ਼ ਦੀ ਤਰੱਕੀ ’ਚ ਪਾਏ ਯੋਗਦਾਨ ਬਾਰੇ ਜਾਣਕਾਰੀ ਦੇ ਰਿਹਾ ਹੈ। ਇਹ ਇਸ਼ਤਿਹਾਰ ਅਮਰੀਕਾ ਦੇ 39 ਸੂਬਿਆਂ ’ਚ 27 ਜੁਲਾਈ ਤੱਕ ਦਿਖਾਇਆ ਜਾਏਗਾ।
ਪ੍ਰਸਾਰਨ ਕੰਪਨੀ ਕੋਮਕਾਸਟ ਕੇਬਲ ਚੈਨਲਾਂ ’ਤੇ ਪ੍ਰਸਾਰਨ ਲਈ 10 ਲੱਖ ਅਮਰੀਕੀ ਡਾਲਰ ਦਾ ਯੋਗਦਾਨ ਪਾਏਗੀ। ਸਿੱਖ ਅਮਰੀਕਨ ਲੀਗਲ ਡਿਫੈਂਸ ਐਂਡ ਐਜੂਕੇਸ਼ਨ ਫੰਡ ਜਥੇਬੰਦੀ ਵੱਲੋਂ ਇਸ਼ਤਿਹਾਰ ਦੀ ਪਟਕਥਾ ਮੁਹੱਈਆ ਕਰਵਾਈ ਗਈ ਹੈ।
ਸਾਲ 2001 ’ਚ ਦਹਿਸ਼ਤੀ ਹਮਲਿਆਂ ਤੋਂ ਬਾਅਦ ਅਮਰੀਕਾ ਦੇ ਸਿੱਖਾਂ ’ਤੇ ਕਈ ਹਮਲੇ ਇਸ ਭੁਲੇਖੇ ਨਾਲ ਕੀਤੇ ਗਏ ਕਿ ਉਹ ਦਾਹੜੀ ਅਤੇ ਦਸਤਾਰ ਕਾਰਨ ਮੁਸਲਮਾਨ ਜਾਪਦੇ ਸਨ। 2012 ’ਚ ਵਿਸਕਾਨਸਿਨ ਗੁਰਦੁਆਰੇ ’ਚ ਇਕ ਗੋਰੇ ਨੇ ਹਮਲਾ ਕਰਕੇ ਛੇ ਸਿੱਖਾਂ ਨੂੰ ਹਲਾਕ ਕਰ ਦਿੱਤਾ ਸੀ।
ਜਥੇਬੰਦੀ ਦੇ ਕਾਰਜਕਾਰੀ ਨਿਰਦੇਸ਼ਕ ਜਸਜੀਤ ਸਿੰਘ ਨੇ ਕਿਹਾ, ‘‘ਸਿੱਖਾਂ ਨੇ ਪਿਛਲੇ 125 ਸਾਲਾਂ ਦੌਰਾਨ ਅਮਰੀਕਾ ਦੇ ਸਭਿਆਚਾਰ ’ਚ ਵੱਡਾ ਯੋਗਦਾਨ ਪਾਇਆ ਹੈ ਅਤੇ ਪਨਾਮਾ ਨਹਿਰ ਤੇ ਕੈਲੀਫੋਰਨੀਆ ’ਚ ਰੇਲ ਪਟੜੀਆਂ ਤੇ ਸੜਕਾਂ ਦੀ ਉਸਾਰੀ ’ਚ ਸਹਾਇਤਾ ਕੀਤੀ ਹੈ।“
