ਜਲੰਧਰ (20 ਅਕਤੂਬਰ, 2014 ): ਲੰਘੀਆਂ ਹਰਿਆਣਾ ਵਿਧਾਨ ਸਭਾ ਚੋਣਾਂ ਵਿੱਚ ਭਾਂਵੇਂ ਬਾਜਪਾ ਨੂੰ ਸਪੱਸ਼ਟ ਬਹੁਮਤ ਪ੍ਰਾਪਤ ਹੋਇਆ ਹੈ, ਪਰ ਡੇਰਾ ਸਾਧ ਵੱਲੋਂ ਭਾਜਪਾ ਦੀ ਕੀਤੀ ਹਮਾਇਤ ਦਾ ਭਾਜਪਾ ਨੂੰ ਕੋਈ ਵਿਸ਼ੇਸ਼ ਲਾਭ ਨਹੀਂ ਮਿਲਿਆ।ਭਾਜਪਾ ਦੇ ਕੇਂਦਰੀ ਨੇਤਾਵਾਂ ਨੇ ਚੋਣਾਂ ਵਿੱਚ ਸੌਦਾ ਡੇਰੇ ਦੀ ਹਮਾਇਤ ਹਾਸਲ ਕਰਨ ਲਈ ਸੌਦਾ ਸਾਧ ਨਾਲ ਵਿਸ਼ੇਸ ਮੀਟਿੰਗਾਂ ਕੀਤੀਆਂ ਸਨ।
ਕੇਂਦਰੀ ਵਿਦੇਸ਼ ਮੰਤਰੀ ਸ਼ੁਸ਼ਮਾ ਸਵਰਾਜ ਵੱਲੋਂ ਸੌਦਾ ਸਾਧ ਨਾਲ ਸੌਦਾ ਦੇਰੇ ਵਿੱਚ ਭਾਜਪਾ ਲਈ ਹਮਾਇਤ ਹਾਸਲ ਕਰਨ ਲਈ ਵਿਸੇਸ਼ ਮੁਲਾਕਾਤ ਕੀਤੀ ਗਈ ਅਤੇ ਭਾਰਤ ਦੇ ਪ੍ਰਧਾਨ ਮੰਤਰੀ ਵੱਲੋਂ ਵੀ ਹਰਿਆਣਾ ਵਿੱਚ ਅਯੋਜਿਤ ਭਾਜਪਾ ਦੀਆਂ ਰੈਲੀਆਂ ਵਿੱਚ ਸੌਦਾ ਸਾਧ ਦੇ ਵਿਸ਼ੇਸ਼ ਗੁਣ ਗਾਏ ਗਏ।
ਪਰ ਸਾਹਮਣੇ ਆਏ ਨਤੀਜੇ ਦੱਸਦੇ ਹਨ ਕਿ ਆਪਣੇ ਸਭ ਤੋਂ ਵਧੇਰੇ ਗੜ੍ਹ ਵਾਲੇ ਜ਼ਿਲ੍ਹਾ ਸਿਰਸਾ ਵਿਚ ਵੀ ਭਾਜਪਾ ਨੂੰ ਕੋਈ ਲਾਭ ਨਹੀਂ ਮਿਲਿਆ, ਸਗੋਂ ਡੇਰੇ ਦੇ ਹੈੱਡਕੁਆਰਟਰ ਵਾਲੇ ਸਿਰਸਾ ਜ਼ਿਲ੍ਹੇ ਵਿਚ ਹੀ ਪੰਜੇ ਹਲਕਿਆਂ ‘ਚ ਇਨੈਲੋ ਤੇ ਅਕਾਲੀ ਦਲ ਦੇ ਉਮੀਦਵਾਰ ਜੇਤੂ ਰਹੇ ਹਨ।
ਹਰਿਆਣਾ ਵਿਚ ਸਿਰਸਾ, ਫਤਿਹਾਬਾਦ, ਜੀਂਦ ਵਧੇਰੇ ਪੰਜਾਬੀ ਵਸੋਂ ਵਾਲੇ ਜ਼ਿਲ੍ਹੇ ਹਨ ਤੇ ਇਨ੍ਹਾਂ ਜ਼ਿਲਿ੍ਹਆਂ ਵਿਚ ਡੇਰੇ ਦਾ ਕਾਫੀ ਪ੍ਰਭਾਵ ਸਮਝਿਆ ਜਾਂਦਾ ਰਿਹਾ ਹੈ।
ਭਾਜਪਾ ਨੇਤਾਵਾਂ ਦਾ ਸਾਰਾ ਜ਼ੋਰ ਇਨੈਲੋ ਦੇ ਗੜ੍ਹ ਨੂੰ ਤੋੜਨ ਉਪਰ ਲੱਗਾ ਹੋਇਆ ਸੀ ਪਰ ਵਧੇਰੇ ਪੰਜਾਬੀ ਵਸੋਂ ਵਾਲੇ ਤਿੰਨ ਜ਼ਿਲਿ੍ਹਆਂ ਸਿਰਸਾ, ਜੀਂਦ ਅਤੇ ਫਤਿਹਾਬਾਦ ਵਿਚ ਇਨੈਲੋ ਵੱਡੀ ਪੱਧਰ ‘ਤੇ ਬਾਜ਼ੀ ਮਾਰ ਗਈ ਹੈ। ਤਿੰਨ ਜ਼ਿਲਿ੍ਹਆਂ ਦੀਆਂ 12 ਸੀਟਾਂ ਵਿਚੋਂ 10 ਇਨੈਲੋ ਦੇ ਹੱਕ ‘ਚ ਗਈਆਂ ਹਨ ਜਦਕਿ ਟੋਹਾਣਾ ਤੇ ਉਚਾਣਾ ਹਲਕਿਆਂ ‘ਚ ਭਾਜਪਾ ਉਮੀਦਵਾਰ ਜੇਤੂ ਰਹੇ ਹਨ। ਰਾਜਸੀ ਹਲਕਿਆਂ ਵਿਚ ਇਹ ਆਮ ਚਰਚਾ ਹੈ ਕਿ ਡੇਰੇ ਦੀ ਵੋਟ ਸਿਆਸੀ ਸਮੀਕਰਨ ਬਦਲਣ ‘ਚ ਅਸਫ਼ਲ ਰਹੀ ਹੈ।
