ਈਪਰ, ਬੈਲਜ਼ੀਅਮ (19 ਅਕਤੂਬਰ, 2014 ): ਸਿੱਖ ਨਸਲਕੁਸ਼ੀ ਦੀ ਤੀਹਵੀਂ ਵਰੇਗੰਢ ਮੌਕੇ ਸਿੱਖ ਕੌਮ ਵੱਲੋਂ ਭਾਰਤੀ ਸਟੇਟ ਅਤੇ ਭਾਰਤੀ ਨਿਆਇਕ ਢਾਂਚੇ ਵੱਲੋਂ ਨਸਲਕੁਸ਼ੀ ਦੇ ਪੀੜਤਾਂ ਨੂੰ ਇਨਸਾਫ ਨਾ ਦੇਣ ਦੇ ਰੋਸ ਵੱਜੋਂ ਕੀਤੇ ਜਾ ਰਹੇ ਮੁਜ਼ਾਰਿਆਂ ਲਈ ਜਲਾਵਤਨ ਸਿੱਖ ਆਗੂਆਂ ਨੇ ਪੰਥਕ ਧਿਰਾਂ ਦੇ ਨਾਲ-ਨਾਲ ਹਰ ਸਿੱਖ ਨੂੰ ਅਪੀਲ ਕੀਤੀ ਹੈ ਕਿ ਉਹਨਾਂ ਤਿੰਨ ਦਿਨਾਂ ਵਿੱਚ ਵਹਿਸੀ ਢੰਗ ਨਾਲ ਜਿੰਦਾਂ ਸਾੜੇ ਗਏ ਮਾਸੂਮਾਂ ਅਤੇ ਬਜੁਰਗਾਂ, ਬੇਪੱਤ ਕੀਤੀਆਂ ਔਰਤਾਂ ਅਤੇ ਨਾਬਾਲਗ ਬੱਚੀਆਂ, ਕਾਨਪੁਰ ਦੀਆਂ ਭੱਠੀਆਂ ਵਿੱਚ ਸੁੱਟੇ ਕੁੱਝ ਮਹੀਨਿਆਂ ਦੇ ਬੱਚਿਆਂ ਦੀ ਯਾਦ ਨੂੰ ਸੀਨਿਆਂ ਵਿੱਚ ਸਾਂਭਦੇ ਹੋਏ ਇੱਕ ਜੋਰਦਾਰ ਰੋਸ ਪ੍ਰੋਗਰਾਮ ਉਲੀਕਿਆ ਜਾਵੇ ਤਾਂ ਜੋ ਪੂਰੀ ਦੁਨੀਆਂ ਅਖੌਤੀ ਲੋਕਤੰਤਰ ਦੀ ਸੱਚਾਈ ਜਾਣ ਸਕੇ।
ਉਨ੍ਹਾਂ ਕਿਹਾ ਕਿ ਨਵੰਬਰ 1984 ‘ਚ ਭਾਰਤ ਵਿੱਚ ਸਿੱਖ ਕੌਂਮ ਦੀ ਕੀਤੀ ਯੋਜਨਾਵੱਧ ਨਸਲਕੁਸ਼ੀ ਦੀ 30ਵੀਂ ਵਰੇਗੰਢ ਮੌਕੇ ਸਮੂਹ ਸਿੱਖ ਸੰਪਰਦਾਵਾਂ, ਜਥੇਬੰਦੀਆਂ ਅਤੇ ਸਰਗਰਮ ਨੌਜਵਾਨਾਂ ਨੂੰ ਸਾਂਝੇਂ ਤੌਰ ‘ਤੇ ਸਿਰਫ ਇੱਕ ਹੀ ਪਰ ਪ੍ਰਵਾਵਸ਼ਾਲੀ ਪ੍ਰੋਗਰਾਮ ਉਲੀਕ ਕੇ ਉਸ ਨੂੰ ਸਫਲ ਬਣਾਉਣਾਂ ਚਾਹੀਦਾਂ ਹੈ ।
ਕੌਮ ਨੂੰ ਅਪੀਲ ਕਰਦਿਆਂ ਜਥੇਦਾਰ ਰੇਸ਼ਮ ਸਿੰਘ ਬੱਬਰ, ਭਾਈ ਗੁਰਮੀਤ ਸਿੰਘ ਖਨਿਆਣ, ਭਾਈ ਸੁਰਿੰਦਰ ਸਿੰਘ ਸੇਖੋਂ, ਭਾਈ ਸੋਹਣ ਸਿੰਘ ਕੰਗ ਅਤੇ ਭਾਈ ਲਖਵਿੰਦਰ ਸਿੰਘ ਮੱਲ੍ਹੀ ਹੋਰਾਂ ਨੇ ਜਾਰੀ ਪ੍ਰੈਸ ਬਿਆਨ ਵਿੱਚ ਕਿਹਾ ਕਿ ਕੌਂਮ ਦੀ ਅਸਹਿ ਪੀੜ ਨੂੰ ਮਹਿਸੂਸ ਕਰਦੇ ਹੋਏ ਆਪੋ-ਅਪਣੇ ਦਲਾਂ ਜਾਂ ਜਥੇਬੰਦੀਆਂ ‘ਤੋ ਉੱਪਰ ਉੱਠ ਕੇ ਕੌਂਮੀ ਰੋਸ ਜਾਹਰ ਕਰਨ ਲਈ ਸਾਨੂੰ ਇੱਕਜੁਟਦਾ ਦਾ ਪ੍ਰਗਟਾਵਾ ਕਰਨਾ ਚਾਹੀਦਾਂ ਹੈ।
ਇਹਨਾਂ ਸਿੱਖ ਆਗੂਆਂ ਨੇ ਸਿੱਖ ਨਸਲਕੁਸ਼ੀ ਦੀ 30ਵੀਂ ਵਰੇਗੰਢ ਮੌਕੇ ਵੱਖਰੋ-ਵੱਖਰੇ ਤੌਰ ‘ਤੇ ਰੋਸ ਜਤਾਉਣ ਲਈ ਤਤਪਰ ਆਗੂਆਂ ਨੂੰ ਭਾਵੁਕ ਅਪੀਲ ਕਰਦਿਆਂ ਕਿਹਾ ਕਿ ਜਦ ਕਾਤਲਾਂ ਨੇ ਜੁਲਮ ਕਰਨ ਵੇਲੇ ਸਾਡੇ ਦਲ ਜਾਂ ਪਾਰਟੀਆਂ ਦਾ ਫਰਕ ਨਹੀ ਦੇਖਿਆਂ ਤਾਂ ਫਿਰ ਅਸੀਂ ਅਜਿਹੇ ਨਾਜੁਕ ਮੌਕਿਆਂ ‘ਤੇ ਵੀ ਕਿਉਂ ਵੱਖਰੋ-ਵੱਖਰੀ ਡਫਲੀ ਵਜਾਉਣ ‘ਤੋਂ ਪ੍ਰਹੇਜ਼ ਕਿਉਂ ਨਹੀ ਕਰ ਸਕਦੇ ?
