ਲੰਡਨ (28 ਫਰਵਰੀ, 2015): ਪਿੱਛਲੇ ਦਿਨੀ ਲੰਦਨ ਵਿੱਚ ਇੱਕ ਸਿੱਖ ਨੌਜਵਾਨ ਨਵਜੋਤ ਸਿੰਘ ‘ਤੇ ਨਸਲੀ ਟਿੱਪਣੀਆਂ ਕਰਨ ਵਾਲੇ ਵਿਅਕਤੀ ਨੂੰ ਜਿਲਾ ਜੱਜ ਨੇ ਸਜ਼ਾ ਸੁਣਾਉਦਿਆਂ ਜ਼ੁਰਮਾਨਾ ਕਰ ਦਿੱਤਾ ਹੈ।ਚੰਗੇ ਕੰਮਾਂ ਲਈ ਜਦੋਂ ਕੋਈ ਤੁਰਦਾ ਹੈ ਤਾਂ ਕਈ ਵਾਰ ਉਸ ਇਨਸਾਨ ਨੂੰ ਕਈ ਤਰ੍ਹਾਂ ਦੀਆਂ ਔਕੜਾਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ।
24 ਸਾਲਾ ਸਿੱਖ ਨੌਜਵਾਨ ‘ਤੇ 27 ਜਨਵਰੀ ਨੂੰ ਹੀਲਸ ਚੈਰਿਟੀ ਸੈਂਟਰ ਦੇ ਬਾਹਰ ਮਾਲਸਬਰੀ ਹਾਈ ਸਟਰੀਟ ‘ਤੇ 22 ਸਾਲਾ ਡੀਨ ਕੈਂਟ ਨੇ ਵਾਰ-ਵਾਰ ਨਸਲੀ ਟਿੱਪਣੀਆਂ ਕੀਤੀਆਂ ਅਤੇ ਕਾਫੀ ਤੰਗ ਪ੍ਰੇਸ਼ਾਨ ਕੀਤਾ ।ਉਸ ਨੂੰ ਰੋਡ ਤੋਂ ਚਲੇ ਜਾਣ ਲਈ ਕਿਹਾ।
ਨਵਜੋਤ ਨੇ ਕਿਹਾ ਕਿ ਇਸ ਵਰਤਾਰੇ ਨੇ ਉਸ ਨੂੰ ਬਹੁਤ ਵੱਡਾ ਸਦਮਾ ਦਿੱਤਾ ਹੈ, ਪਰ ਮੈਂ ਮਹਿਸੂਸ ਕਰਦਾ ਹਾਂ ਕਿ ਇਕ ਸਿੱਖ ਹੋਣ ਦੇ ਨਾਤੇ ਮੇਰੀ ਜ਼ਿੰਮੇਵਾਰੀ ਹੈ ਕਿ ਮੈਂ ਲੋਕਾਂ ਨੂੰ ਮਿਲਾਂ, ਉਨ੍ਹਾਂ ਨੂੰ ਆਪਣੀ ਪਹਿਚਾਣ, ਪਿਛੋਕੜ ਅਤੇ ਇਤਿਹਾਸ ਬਾਰੇ ਦੱਸਾਂ।
ਡੀਨ ਕੈਂਟ ਨੂੰ ਸਜ਼ਾ ਸੁਣਾਉਂਦੇ ਹੋਏ ਜ਼ਿਲ੍ਹਾ ਜੱਜ ਸੀਮਨ ਕੂਪਰ ਨੇ ਕਿਹਾ ਕਿ ਇਹ ਬਹੁਤ ਗੰਭੀਰ ਮਾਮਲਾ ਹੈ।
ਉਹ (ਨਵਜੋਤ) ਇਕ ਲੋਕ ਭਲਾਈ ਕਰਨ ਵਾਲੀ ਸੰਸਥਾ ਲਈ ਮਸ਼ਹੂਰੀ ਕਰਨ ਵਾਲੀਆਂ ਤਸਵੀਰਾਂ ਲੈ ਰਿਹਾ ਸੀ। ਕੈਂਟ ਨੂੰ ਇਸ ਮੌਕੇ 50 ਪੌਾਡ ਮੁਆਵਜ਼ਾ, 100 ਪੌਾਡ ਜੁਰਮਾਨਾ ਅਤੇ 20 ਪੌਾਡ ਖਰਚਾ ਅਦਾ ਕਰਨ ਦੇ ਹੁਕਮ ਸੁਣਾਏ ਗਏ।
ਨਵਜੋਤ ਨੇ ਇਸ ਫੈਸਲੇ ਦਾ ਸਵਾਗਤ ਕਰਦਿਆਂ ਕਿਹਾ ਕਿ ਇਸ ਕੇਸ ਦਾ ਫੈਸਲਾ ਆਸ ਹੈ ਮਾਪਿਆਂ ਨੂੰ ਆਪਣੇ ਬੱਚਿਆਂ ‘ਚ ਸਹਿਣਸ਼ੀਲਤਾ ਅਤੇ ਦੂਜਿਆਂ ਦੀ ਇੱਜ਼ਤ ਕਰਨਾ ਸਿਖਾਉਣ ਵਿਚ ਮਦਦ ਕਰੇਗਾ।
