ਚੰਡੀਗੜ੍ਹ (12 ਦਸੰਬਰ,2014): ਅੱਜ ਚੰਡੀਗੜ੍ਹ ਵਿੱਚ ਇੱਕ ਬੇਰੁਜਗਾਰ ਲੜਕੀ ਨੇ ਪੰਜਾਬ ਦੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੀ ਇੱਥੇ ਸਥਿਤ ਰਿਹਾਇਸ਼ ਸਾਹਮਣੇ ਆਪਣੇ ਆਪ ਨੂੰ ਅੱਗ ਲਾਕੇ ਖੁਦਕੁਸ਼ੀ ਕਰਨ ਦੀ ਕੋਸ਼ਿਸ਼ ਕੀਤੀ। ਗੁਰਦਾਸਪੁਰ ਦੀ ਇਸ ਗੁਰਸਿੱਖ ਲੜਕੀ ਗੁਰਪ੍ਰੀਤ ਕੌਰ (38) ਨੇ ਬੇਰੁਜ਼ਗਾਰੀ ਤੋਂ ਤੰਗ ਆ ਕੇ ਪੰਜਾਬ ਦੇ ਮੁੱਖ ਮੰਤਰੀ ਨੂੰ ਵਾਰਵਾਰ ਮਿਲਜ਼ ਦੀ ਕੋਸ਼ਿਸ਼ ਕੀਤੀ ਪਰ ਉਹ ਉਨ੍ਹਾਂ ਨੂੰ ਮਿਲਜ਼ ਵਿੱਚ ਕਾਮਣਾਬ ਨਾ ਹੋ ਸਕੀ ‘ਤੇ ਆਖਰ ਨਿਰਾਸ਼ਾ ਵਿੱਚ ਆਕੇ ਉਸਨੇ ਇਹ ਸਖਤ ਕਦਮ ਪੁੱਟ ਲਿਆ।
ਪੁਲੀਸ ਕੰਟਰੋਲ ਰੂਮ ਦੀ ਜਿਪਸੀ ਨੇ ਉਸ ਨੂੰ ਸੈਕਟਰ-16 ਦੇ ਸਰਕਾਰੀ ਹਸਪਤਾਲ ਵਿਖੇ ਪਹੁੰਚਾਇਆ। ਉਹ 40 ਫ਼ੀਸਦ ਝੁਲਸ ਗਈ ਹੈ ਅਤੇ ਉਸ ਦੀਆਂ ਦੋਵੇਂ ਲੱਤਾਂ ਅਤੇ ਬਾਹਾਂ ਉਪਰ ਗੰਭੀਰ ਜ਼ਖ਼ਮ ਆਏ ਹਨ। ਉਂਜ ਡਾਕਟਰਾਂ ਨੇ ਉਸ ਦੀ ਹਾਲਤ ਖਤਰੇ ਤੋਂ ਬਾਹਰ ਦੱਸੀ ਹੈ।
ਲੜਕੀ ਨੇ ਦੋਸ਼ ਲਾਇਆ ਕਿ ਨੌਕਰੀ ਲਈ ਵਾਰ-ਵਾਰ ਮੁੱਖ ਮੰਤਰੀ ਕੋਲ ਪਹੁੰਚ ਕਰਨ ਅਤੇ ਓਵਰਏਜ ਹੋ ਜਾਣ ਕਾਰਨ ਉਸ ਨੇ ਇਹ ਕਦਮ ਚੁੱਕਿਆ। ਇਸ ਘਟਨਾ ਨਾਲ ਪੰਜਾਬ ਦੇ ਨੌਜਵਾਨਾਂ ਦੇ ਵਿਆਪਕ ਪੱਧਰ ‘ਤੇ ਬੇਰੁਜ਼ਗਾਰੀ ਵਿੱਚ ਝੁਲਸਣ ਦਾ ਖ਼ੁਲਾਸਾ ਹੋ ਗਿਆ ਹੈ।
ਸੈਕਟਰ-16 ਦੇ ਹਸਪਤਾਲ ਦੇ ਬੈਡ ਨੰਬਰ 9 ਉਪਰ ਤੜਪ ਰਹੀ ਗੁਰਪ੍ਰੀਤ ਕੌਰ ਨੇ ਇਸ ਪੱਤਰਕਾਰ ਨੂੰ ਭਰੀਆਂ ਅੱਖਾਂ ਨਾਲ ਦੱਸਿਆ ਕਿ ਜਨਮ ਸਮੇਂ ਹੀ ਉਸ ਦੀ ਮਾਂ ਦੀ ਮੌਤ ਹੋ ਗਈ ਸੀ ਜਦਕਿ ਪਿਤਾ ਉਸ ਦੇ ਜਨਮ ਤੋਂ ਇਕ ਮਹੀਨਾ ਪਹਿਲਾਂ ਹੀ ਚਲ ਵਸੇ ਸਨ। ਉਸ ਦਾ ਪਾਲਣ ਪੋਸ਼ਣ ਨਾਨੀ ਨੇ ਕੀਤਾ ਪਰ ਵੀ 1995 ਵਿੱਚ ਇਸ ਜਹਾਨ ਤੋਂ ਤੁਰ ਗਈ। ਉਸ ਨੇ ਖੁਦ ਸੰਘਰਸ਼ ਕਰਦਿਆਂ 10+2 ਅਤੇ ਕੰਪਿਊਟਰ ਦਾ ਕੋਰਸ ਕੀਤਾ। ਉਹ ਸਾਲਾਂ ਬੱਧੀ ਨੌਕਰੀ ਦੀ ਭਾਲ ਲਈ ਭਟਕਦੀ ਰਹੀ ਅਤੇ ਪਿਛਲੇ 15 ਸਾਲਾਂ ਤੋਂ ਅਨਾਥਾਂ ਵਾਂਗ ਸ੍ਰੀ ਹਰਿਮੰਦਰ ਸਾਹਿਬ ਅੰਮ੍ਰਿਤਸਰ ਵਿਖੇ ਰਹਿ ਰਹੀ ਹੈ।
ਗੁਰਪ੍ਰੀਤ ਅਨੁਸਾਰ ਉਸ ਨੇ ਡੇਢ ਸਾਲ ਪਹਿਲਾਂ ਅਧੀਨ ਸੇਵਾਵਾਂ ਚੋਣ ਬੋਰਡ (ਐਸਐਸਐਸ ਬੋਰਡ) ਵਿੱਚ ਲੈਬ ਅਟੈਂਡੈਂਟ ਦੀ ਅਸਾਮੀ ਲਈ ਅਰਜ਼ੀ ਦਿੱਤੀ ਸੀ। ਉਸ ਵੇਲੇ ਉਸ ਦੀ ਉਮਰ 37 ਸਾਲ ਸੀ। ਉਸ ਨੇ ਮੁੱਖ ਮੰਤਰੀ ਸ੍ਰੀ ਬਾਦਲ ਨੂੰ ਨੌਕਰੀ ਲਈ ਅਰਜ਼ੀ ਦਿੱਤੀ ਸੀ। ਇਸ ਤੋਂ ਬਾਅਦ ਉਸ ਨੇ ਸ੍ਰੀ ਹਰਿਮੰਦਰ ਸਾਹਿਬ ਵਿਖੇ ਆਏ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਕੋਲ ਵੀ ਫਰਿਆਦ ਕੀਤੀ ਸੀ ਜਿਨ੍ਹਾਂ ਨੌਕਰੀ ਦਿਵਾਉਣ ਦਾ ਭਰੋਸਾ ਦਿੱਤਾ ਸੀ। ਗੁਰਪ੍ਰੀਤ ਕੌਰ ਅਨੁਸਾਰ ਉਹ ਹੁਣ ਸਾਢੇ 38 ਸਾਲਾਂ ਦੀ ਹੋ ਗਈ ਹੈ ਅਤੇ ਨੌਕਰੀ ਹਾਸਲ ਕਰਨ ਦੀ ਉਮਰ ਨੂੰ ਵੀ ਪਾਰ ਕਰ ਚੁੱਕੀ ਹੈ।
ਇਸ ਦੌਰਾਨ ਉਸ ਨੇ ਕਈ ਵਾਰ ਮੁੱਖ ਮੰਤਰੀ ਨੂੰ ਮਿਲਣ ਦਾ ਯਤਨ ਕੀਤਾ ਪਰ ਮਿਲ ਨਹੀਂ ਸਕੀ। ਇਸੇ ਤਰ੍ਹਾਂ ਡਿਪਟੀ ਕਮਿਸ਼ਨਰਾਂ ਦੇ ਦਫ਼ਤਰਾਂ ਵੱਲੋਂ ਅਕਸਰ ਡਾਟਾ ਐਂਟਰੀ ਆਪਰੇਟਰ ਭਰਤੀ ਕੀਤੇ ਜਾਂਦੇ ਹਨ। ਉਸ ਨੇ ਟਾਈਪ ਦੀ ਸਪੀਡ ਬਣਾਉਣ ਲਈ ਕਈ ਵਾਰ ਟਾਈਪਿੰਗ ਸੈਂਟਰ ਵਿੱਚ 500 ਰੁਪਏ ਫੀਸ ਤਾਰ ਕੇ ਇਸ ਨੌਕਰੀ ਲਈ ਟੈਸਟ ਦਿੱਤੇ ਪਰ ਨੌਕਰੀ ਹਾਸਲ ਕਰਨ ਤੋਂ ਅਸਮਰੱਥ ਰਹੀ।
ਉਹ ਬੁੱਧਵਾਰ ਨੂੰ ਚੰਡੀਗੜ੍ਹ ‘ਚ ਮੁੱਖ ਮੰਤਰੀ ਨੂੰ ਮਿਲਣ ਲਈ ਆਈ ਸੀ ਅਤੇ ਨਵਾਂ ਗਾਓ ਸਥਿਤ ਗੁਰਦੁਆਰੇ ਵਿਖੇ ਰਹਿ ਰਹੀ ਸੀ। ਹੁਣ ਵੀ ਉਸ ਨੂੰ ਮੁੱਖ ਮੰਤਰੀ ਨੂੰ ਮਿਲਣ ਦੀ ਇਜਾਜ਼ਤ ਨਾ ਮਿਲੀ ਜਿਸ ਤੋਂ ਨਿਰਾਸ਼ ਹੋ ਕੇ ਉਸ ਨੇ 20 ਰੁਪਏ ਦਾ ਪੈਟਰੋਲ ਖ਼ਰੀਦ ਕੇ ਮੁੱਖ ਮੰਤਰੀ ਦੀ ਕੋਠੀ ਸਾਹਮਣੇ ਆਪਣੇ ਉਪਰ ਪੈਟਰੋਲ ਪਾ ਕੇ ਖ਼ੁਦ ਨੂੰ ਅੱਗ ਲਾ ਲਈ।
