ਜੈਤੋ: ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਅਤੇ ਯੂਨਾਇਟਿਡ ਅਕਾਲੀ ਦਲ ਦੇ ਸੱਦੇ ‘ਤੇ ਭਗਤਾ ਭਾਈ ਤੋਂ ਬਰਗਾੜੀ ਦਰਮਿਆਨ ਕੀਤੇ ਜਾਣ ਵਾਲੇ ਰੋਸ ਮਾਰਚ ਨੂੰ ਪੰਜਾਬ ਪੁਲਿਸ ਨੇ ਹੋਣ ਨਹੀਂ ਦਿੱਤਾ। ਪੁਲੀਸ ਨੇ 40 ਕਿਲੋਮੀਟਰ ਦੇ ਇਸ ਰਸਤੇ ’ਤੇ ਸੁਰੱਖਿਆ ਕਵਚ ਬਣਾ ਕੇ ਕਿਸੇ ਪ੍ਰਦਰਸ਼ਨਕਾਰੀ ਨੂੰ ਨੇੜੇ ਨਹੀਂ ਫਟਕਣ ਦਿੱਤਾ।
ਬਰਗਾੜੀ ਦੇ ਗੁਰਦੁਆਰੇ ਵਿਚ ਪਸ਼ਚਾਤਾਪ ਸਮਾਗਮ ਵਿਚ ਹਿੱਸਾ ਲੈਣ ਆਏ ਅਕਾਲੀ ਦਲ (ਮਾਨ) ਦੇ ਪੰਜ ਆਗੂਆਂ ਨੂੰ ਪੁਲੀਸ ਨੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀ ਹਜ਼ੂਰੀ ਵਿਚੋਂ ਗ੍ਰਿਫ਼ਤਾਰ ਕਰ ਲਿਆ ਗਿਆ। ਇਹ ਦਾਅਵਾ ਬੰਦੀ ਬਣਾ ਕੇ ਜੈਤੋ ਥਾਣੇ ਵਿਚ ਲਿਆਂਦੇ ਗਏ ਪਾਰਟੀ ਦੇ ਕੌਮੀ ਜਨਰਲ ਸਕੱਤਰ ਤੇ ਪਾਰਟੀ ਦੇ ਕਿਸਾਨ ਵਿੰਗ ਦੇ ਸੂਬਾ ਪ੍ਰਧਾਨ ਜਥੇਦਾਰ ਜਸਕਰਨ ਸਿੰਘ ਕਾਹਨ ਸਿੰਘ ਵਾਲਾ, ਜ਼ਿਲ੍ਹਾ ਫ਼ਰੀਦਕੋਟ ਦੇ ਪ੍ਰਧਾਨ ਜਥੇਦਾਰ ਸੁਰਜੀਤ ਸਿੰਘ ਅਰਾਈਆਂ ਵਾਲਾ, ਕਿਸਾਨ ਵਿੰਗ ਦੇ ਫ਼ਿਰੋਜ਼ਪੁਰ ਜ਼ਿਲ੍ਹੇ ਦੇ ਪ੍ਰਧਾਨ ਪ੍ਰਗਟ ਸਿੰਘ ਮੱਖੂ ਤੇ ਜ਼ਿਲ੍ਹਾ ਜਨਰਲ ਸਕੱਤਰ ਬਲਵੀਰ ਸਿੰਘ ਲੋਹਗੜ੍ਹ ਤੋਂ ਇਲਾਵਾ ਲਾਲਦੀਪ ਸਿੰਘ ਨੇ ਇਥੇ ਪੱਤਰਕਾਰਾਂ ਨਾਲ ਗੱਲਬਾਤ ਦੌਰਾਨ ਕੀਤਾ। ਉਨ੍ਹਾਂ ਕਿਹਾ ਕਿ ਖਿੱਚ ਧੂਹ ਸਮੇਂ ਉਨ੍ਹਾਂ ਦਾ ਕੈਮਰਾ ਪੁਲੀਸ ਨੇ ਖੋਹ ਲਿਆ। ਉਨ੍ਹਾਂ ਕਿਹਾ ਕਿ ਮੋਦੀ ਸਰਕਾਰ ਦੇ ਸਿਰ ’ਤੇ ਬੈਠੇ ਆਰਐਸਐਸ ਦੇ ਆਗੂਆਂ ਕੋਲ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦਾ ਰਿਮੋਟ ਕੰਟਰੋਲ ਹੈ ਅਤੇ ਉਹ ਜਿਵੇਂ ਕਰਵਾਈ ਜਾ ਰਹੇ ਹਨ ਬਾਦਲ ਚੁੱਪ ਚਾਪ ਕਰੀ ਜਾ ਰਿਹਾ ਹੈ। ਉਨ੍ਹਾਂ ਆਈ.ਜੀ. ਜੈਨ ’ਤੇ ਸਰਕਾਰ ਦੇ ਇਸ਼ਾਰੇ ’ਤੇ ਜਬਰ ਕਰਨ ਦੇ ਦੋਸ਼ ਵੀ ਲਾਉਂਦਿਆਂ ਕਿਹਾ ਕਿ ਸਿੱਖ ਕੌਮ ਨੂੰ ਤਬਾਹ ਕਰਨ ਵਿਚ ਸਭ ਤੋਂ ਵੱਡਾ ਰੋਲ ਬਾਦਲ ਦਲੀਆਂ ਦਾ ਹੈ।
ਇਨ੍ਹਾਂ ਤੋਂ ਇਲਾਵਾ 9 ਜਣਿਆਂ ਨੂੰ ਜੈਤੋ ਤੋਂ ਭਗਤਾ ਭਾਈ ਕਾ ਜਾਂਦਿਆਂ ਪੁਲੀਸ ਨੇ ਡੋਡ ਪਿੰਡ ਕੋਲ ਨਾਕੇ ’ਤੇ ਗ੍ਰਿਫ਼ਤਾਰ ਕਰ ਲਿਆ। ਇਨ੍ਹਾਂ ਵਿਚ ਸਿੱਖ ਤਾਲਮੇਲ ਸੇਵਾ ਸੰਗਠਨ ਦੇ ਸੇਵਾਦਾਰ ਕੁਲਦੀਪ ਸਿੰਘ ਖਾਲਸਾ, ਸਰਦਾਰੀਆਂ ਟਰਸਟ ਦੇ ਜ਼ਿਲ੍ਹਾ ਪ੍ਰਧਾਨ ਗੁਰਸੇਵਕ ਸਿੰਘ ਭਾਣਾ, ਕੁਲਵਿੰਦਰ ਸਿੰਘ ਫਰੀਦਕੋਟ, ਸੁਖਪ੍ਰੀਤ ਸਿੰਘ ਜੈਤੋ, ਹਰਵਿੰਦਰ ਸਿੰਘ ਜੈਤੋ, ਪ੍ਰੀਤ ਸਿੰਘ ਭਾਣਾ, ਨਵਜੋਤ ਸਿੰਘ ਭਾਣਾ, ਕਰਮਜੀਤ ਸਿੰਘ ਫ਼ਰੀਦਕੋਟ ਆਦਿ ਸ਼ਾਮਿਲ ਸਨ। ਗ੍ਰਿਫ਼ਤਾਰ ਕੀਤੇ ਗਏ ਸਮੁੱਚੇ ਵਿਅਕਤੀਆਂ ’ਤੇ ਧਾਰਾ 107/51 ਤਹਿਤ ਕੇਸ ਰਜਿਸਟਰਡ ਕੀਤੇ ਗਏ। ਸ਼ਾਮ ਨੂੰ ਪੁਲੀਸ ਨੇ ਸਥਾਨਕ ਐਸਡੀਐਮ ਦੀ ਗੈਰ ਮੌਜੂਦਗੀ ਵਿਚ ਨਾਇਬ ਤਹਿਸੀਲਦਾਰ ਮੈਡਮ ਈਰਾ ਵੰਤੀ ਦੀ ਅਦਾਲਤ ਵਿਚ ਉਨ੍ਹਾਂ ਨੂੰ ਪੇਸ਼ ਕੀਤਾ ਤਾਂ ਸਾਰਿਆਂ ਨੂੰ 21 ਜੁਲਾਈ ਤੱਕ ਨਿਆਂਇਕ ਹਿਰਾਸਤ ਵਿਚ ਭੇਜ ਦਿੱਤਾ ਗਿਆ।
