ਨਿਊਯਾਰਕ (1 ਮਾਰਚ, 2016): ਅਮਰੀਕੀ ਫੌਜ ਵਿੱਚ ਸੇਵਾ ਨਿਭਾਅ ਰਹੇ ਇੱਕ ਸਿੱਖ ਸਰਦਾਰ ਕੈਪਟਨ ਸਿਮਰਤਪਾਲ ਸਿੰਘ ਨੇ ਆਪਣੀ ਹੀ ਫੌਜ ਦੇ ਵਿਰੁੱਧ ਦਾੜੀ ਅਤੇ ਦਸਤਾਰ ਸਜ਼ਾਉਣ ਲਈ ਪੱਕੀ ਪ੍ਰਵਾਨਗੀ ਲੈਣ ਲਈ ਮਾਮਲਾ ਦਰਜ਼ ਕਰਵਾਇਆ ਹੈ।
ਕੈਪਟਨ ਸਿਮਰਤਪਾਲ ਸਿੰਘ ਸਿੱਖ ਧਰਮ ਅਨੁਸਾਰ ਲੰਮੀ ਦਾੜ੍ਹੀ ਤੇ ਲੰਮੇ ਵਾਲ ਰੱਖਣ ਦੀ ਆਗਿਆ ਚਾਹੁੰਦੇ ਸਨ ਪਰ ਇਸ ਦੇ ਲਈ ਉਨ੍ਹਾਂ ਦੇ ਕਈ ਟੈਸਟ ਕਰਵਾਏ ਗਏ । ਉਹ ਅਮਰੀਕਾ ਦੀ 349 ਇੰਜੀਨੀਅਰ ਬਟਾਲੀਅਨ ਵਿਚ ਕੈਪਟਨ ਹਨ । ਉਨ੍ਹਾਂ ਨੂੰ ਪਿਛਲੇ ਸਾਲ ਦਾੜ੍ਹੀ ਰੱਖਣ ਤੇ ਪੱਗੜੀ ਬੰਨ੍ਹਣ ਦੀ ਇਜਾਜਤ ਤਾਂ ਮਿਲ ਗਈ ਸੀ ਪਰ ਇਹ ਆਗਿਆ ਅਸਥਾਈ ਸੀ ।
ਪੰਜਾਬੀ ਅਖਬਾਰ ਅਜ਼ੀਤ ਵਿੱਚ ਨਸ਼ਰ ਖਬਰ ਅਨੁਸਾਰ ਸਹਾਇਕ ਫੌਜ ਸਕੱਤਰ ਡੇਬਰਾ ਵਾਡਾ ਨੇ ਕੈਪਟਨ ਸਿਮਰਤਪਾਲ ਸਿੰਘ ਨੂੰ ਸਥਾਈ ਇਜਾਜਤ ਲਈ ਹਾਲ ਹੀ ਵਿਚ ਕੁਝ ਟੈਸਟ ਕਰਾਉਣ ਲਈ ਕਿਹਾ ਸੀ । ਵਾਡਾ ਇਹ ਪੱਕਾ ਕਰਨਾ ਚਾਹੁੰਦੀ ਸੀ ਕਿ ਕੈਪਟਨ ਦਾੜ੍ਹੀ ਤੇ ਪੱਗੜੀ ਪਹਿਨਣ ਤੋਂ ਬਾਅਦ ਗੈਸ ਮਾਸਕ ਤੇ ਹੈਲਮੇਟ ਪਾ ਸਕਦੇ ਹਨ ਜਾਂ ਨਹੀਂ ।
ਇਸ ਖ਼ਬਰ ਨੂੰ ਅੰਗਰੇਜ਼ੀ ਵਿੱਚ ਪੜ੍ਹਨ ਲਈ ਵੇਖੋ:
Decorated Sikh Soldier Files Lawsuit After Military Denies Religious Freedom
ਕੈਪਟਨ ਸਿਮਰਤਪਾਲ ਸਿੰਘ ਦੇ ਸਮਰਥਕਾਂ ਨੇ ਦੱਸਿਆ ਕਿ ਉਨ੍ਹਾਂ ਨੇ ਆਪਣੀ ਯੂਨਿਟ ਦੇ ਬਾਕੀ ਮੈਂਬਰਾਂ ਨਾਲ ਗੈਸ ਮਾਸਕ ਟੈਸਟ ਪਾਸ ਕਰ ਲਿਆ ਸੀ । ਉਨ੍ਹਾਂ ਨੂੰ ਅਫਗਾਨਿਸਤਾਨ ਦੇ ਕੰਧਾਰ ਵਿਚ ਇਕ ਸੜਕ ਤੋਂ ਧਮਾਕਾਖੇਜ਼ ਸਮੱਗਰੀ ਹਟਾਉਣ ਲਈ ਕਾਂਸੀ ਦੀ ਤਗਮਾ ਵੀ ਮਿਲ ਚੁੱਕਾ ਹੈ । ਇਸ ਸਿੱਖ ਕੈਪਟਨ ਨੂੰ 2006 ਵਿਚ ਯੂ. ਐੱਸ. ਮਿਲਟਰੀ ਅਕੈਡਮੀ ਵਿਚ ਪਹਿਲੇ ਦਿਨ ਆਪਣੇ ਵਾਲ ਤੇ ਦਾੜ੍ਹੀ ਕਰਵਾਉਣੀ ਪਈ ਸੀ ।
2014 ਵਿਚ ਅਮਰੀਕੀ ਫੌਜ ਨੇ ਆਪਣੇ ਜਵਾਨਾਂ ਨੂੰ ਗਰਮੀ ਵਾਲੇ ਇਲਾਕਿਆਂ ਵਿਚ ਆਪਣੇ ਧਰਮ ਅਨੁਸਾਰ ਪੱਗੜੀ, ਸਕਾਰਫ ਤੇ ਟੈਟੂ ਦੀ ਆਗਿਆ ਦਿੱਤੀ ਸੀ ਪਰ ਧਿਆਨ ਦੇਣ ਵਾਲੀ ਗੱਲ ਇਹ ਹੈ ਕਿ ਅਮਰੀਕਾ ਵਿਚ ਪਿਛਲੇ 6 ਸਾਲਾਂ ਵਿਚ ਸਿਰਫ 3 ਜਵਾਨਾਂ ਨੂੰ ਹੀ ਦਸਤਾਰ ਸਜ਼ਾਉਣ ਤੇ ਦਾੜ੍ਹੀ ਰੱਖਣ ਦੀ ਇਜਾਜਤ ਮਿਲੀ ਸੀ।
