ਅੰਮ੍ਰਿਤਸਰ (4 ਅਪਰੈਲ, 2016): ਸਿੱਖ ਸੰਘਰਸ਼ ਨਾਲ ਸਬੰਧਿਤ ਰਾਜਸੀ ਕੈਦੀ ਪ੍ਰੋ. ਦਵਿੰਦਰਪਾਲ ਸਿੰਘ ਭੁੱਲਰ ਖਿਲਾਫ 23 ਸਾਲ ਪੁਰਾਣਾ ਟਾਡਾ ਮਾਮਲਾ ਅੰਮ੍ਰਿਤਸਰ ਦੀ ਟਾਡਾ ਅਦਾਲਤ ਨੇ ਖ਼ਾਰਜ਼ ਕਰ ਦਿੱਤਾ ਹੈ।
ਪੰਜਾਬ ਪੁਲਿਸ ਵੱਲੋਂ 1 ਅਪ੍ਰੈਲ ਨੂੰ ਬਟਾਲਾ ਪੁਲਿਸ ਥਾਣੇ ਵਿੱਚ ਦਰਜ਼ ਟਾਡਾ ਮਾਮਲੇ ਵਿੱਚ ਪ੍ਰੋ: ਭੁੱਲਰ ਖਿਲਾਫ ਪੇਸ਼ ਕੀਤੇ ਦੋਸ਼ ਪੱਤਰ ‘ਤੇ ਅਦਾਲਤ ਨੇ ਸਰਕਾਰੀ ਅਤੇ ਬਚਾਅ ਪੱਖੀ ਧਿਰ ਦੀਆਂ ਦਲੀਲਾਂ ਸੁਨਣ ਉਪਰੰਤ ਮਾਮਲਾ ਕਾਰਜ਼ ਕਰ ਦਿੱਤਾ।
ਸਿੱਖਾਂ ਹਿੱਤਾਂ ਦੀ ਪੈਰਵੀ ਕਰਨ ਵਾਲੇ ਐਡਵੋਕੇਟ ਜਸਪਾਲ ਸਿੰਘ ਮੰਝਪੁਰ ਨੇ ਸਿੱਖ ਸਿਆਸਤ ਨਾਲ ਫੋਨ ‘ਤੇ ਗੱਲ ਕਰਦਿਆਂ ਦੱਸਿਆ ਕਿ ਇਸ ਮਾਲੇ ਵਿੱਚ ਅਦਾਲਤ ਨੇ ਪੁਲਿਸ ਵੱਲੋਂ ਪ੍ਰੋ. ਭੁੱਲਰ ਖਿਲਾਫ ਪੇਸ਼ ਕੀਤਾ ਦੋਸ਼ ਪੱਤਰ ਸਵੀਕਾਰ ਕਰਨ ਤੋਂ ਨਾਂਹ ਕਰ ਦਿੱਤੀ।
ਉਨ੍ਹਾਂ ਨੇ ਦੱਸਿਆ ਕਿ ਮਾਮਲੇ ਨਾਲ ਸਬੰਧਿਤ ਕਾਗਜਾਤ ਦੱਸਦੇ ਹਨ ਇਹ ਕੇਸ ਝੂਠੇ ਪੁਲਿਸ ਮੁਕਾਬਲੇ ਨਾਲ ਸਬੰਧਿਤ ਹੈ, ਜਿਸ ਵਿੱਚ ਪੁਲਿਸ ਵੱਲੋਂ ਪਿੰਡ ਵੈਰੋ ਨੰਗਲ ਦੇ ਦੋ ਸਿੱਖਾਂ ਗੁਰਮੇਜ ਸਿੰਘ ਗੇਜਾ ਅਤੇ ਜੋਗਾ ਸਿੰਘ ਨੂੰ ਝੂਠੇ ਪੁਲਿਸ ਮੁਕਾਬਲੇ ਵਿੱਚ ਮਾਰ ਮੁਕਾਇਆ ਸੀ।
ਇਹ ਮਾਮਲਾ ਪੁਲਿਸ ਥਾਣਾ ਬਟਾਲਾ ਵਿੱਚ ਅਧੀਨ ਧਾਰਾ 307, 34 ਆਈਪੀਸੀ, 25/54/59 ਅਸਲਾ ਕਾਨੂੰਨ, 3,4,5 ਟਾਡਾ ਕਾਨੂੰਨ ਅਤੇ 4,5 ਬਾਰੂਦ ਕਾਨੂੰਨ 1992 ਵਿੱਚ ਦਰਜ਼ ਕੀਤਾ ਗਿਆ ਸੀ।
ਉਨ੍ਹਾਂ ਦੱਸਿਆ ਕਿ ਪ੍ਰੋ. ਦਵਿੰਦਰਪਾਲ ਸਿੰਘ ਭੁੱਲਰ ਦਾ ਨਾਮ ਇਸ ਮਾਮਲੇ ਵਿੱਚ ਫਰਵਰੀ 1995 ਵਿੱਚ ਸ਼ਾਮਲ ਕੀਤਾ ਗਿਆ ਸੀ।ਇਸ ਸਮੇ ਉਹ ਦਿੱਲੀ ਪੁਲਿਸ ਦੀ ਹਿਰਾਸਤ ਵਿੱਚ ਸਨ।ਪ੍ਰੋ. ਭੁੱਲਰ ਖਿਲਾਫ ਕੋਈ ਸਿੱਧੀ ਗਵਾਹੀ ਜਾਂ ਕੋਈ ਚਸ਼ਮਦੀਦ ਗਵਾਹ ਨਹੀਂ ਹੈ।
ਪੁਲਿਸ ਦੇ ਕਾਗਜ਼ਾਂ ਅਨੁਸਾਰ ਪੁਲਿਸ ਨੂੰ ਇੱਕ ਬੰਦੇ ਨੇ ਦੱਸਿਆ ਕਿ ਸਿੱਖ ਖਾੜਕੂ ਉਸਦੇ ਘਰ ਰੋਟੀ ਖਾਣ ਆਉਂਦੇ ਸਨ ਅਤੇ 1992 ਵਿੱਚ ਉਕਤ ਘਟਨਾ ਦੇ ਦਿਨ ਪ੍ਰੋ. ਭੁੱਲਰ ਉਸਦੇ ਘਰ ਰੋਟੀ ਖਾਣ ਆਇਆ ਸੀ ਅਤੇ ਇਸ ਬਿਆਨ ਦੇ ਆਧਾਰ ‘ਤੇ ਪੁਲਿਸ ਨੇ ਪ੍ਰੋ: ਭੁੱਲਰ ਦਾ ਨਾਮ ਇਸ ਮਾਮਲੇ ਵਿੱਚ ਸ਼ਾਮਲ ਕੀਤਾ ਸੀ।
