ਨਵੀਂ ਦਿੱਲੀ (21 ਜਨਵਰੀ, 2015): ਕਦੇ ਭਾਜਪਾ ਦੇ ਫਿਰਕੂ ਏਜੰਡੇ ਅਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਗੁਜਰਾਤ ਦੇ ਮੁੱਖ ਮੰਤਰੀ ਵਜੋਂ ਅਲੋਚਕ ਰਹੀ ਦਿੱਲੀ ਵਿੱਚ ਮੁੱਖ ਮੰਤਰੀ ਦੇ ਅਹੁਦੇ ਲਈ ਭਾਜਪਾ ਦੀ ਉਮੀਦਵਾਰ ਕਿਰਨ ਬੇਦੀ ਨੇ ਰਾਸ਼ਟਰੀ ਸਵੈਮ ਸੇਵਕ ਸੰਘ ਦੀ ਪ੍ਰਸੰਸਾ ਕਰਦਿਆਂ ਇਸਨੂੰ ‘ਧੁਰ ਅੰਦਰ ਤੱਕ ਕੌਮਪ੍ਰਸਤ’ ਕਰਾਰ ਦਿੰਦਿਆਂ ਇਸ ਨੂੰ ਦੇਸ਼ ਨੂੰ ਇਕਜੁੱਟ ਰੱਖਣ ਵਾਲਾ ਦੱਸਿਆ।
ਸਾਬਕਾ ਆਈਪੀਐੱਸ ਅਫਸਰ ਨੇ ਇੱਕ ਟੀ ਵੀ ਚੈਨਲ ਨਾਲ ਇੰਟਰਵਿਊ ਦੌਰਾਨ ਉਸਨੇ ਕਿਹਾ ਕਿ ਆਰ. ਐੱਸ. ਐੱਸ ਭਾਜਪਾ ਦੀ ਵਿਚਾਰਧਾਰਕ ਮਾ-ਪਿਉ ਹੈ। ਇਹ ਇੱਕ ਵਿਸ਼ਾਲ ਰਾਸ਼ਟਰੀ ਸੰਗਠਨ ਹੈ ਅਤੇ ਇੱਕ ਸਭ ਤੋਂ ਵੱਢੇ ਸਮਾਜਿੱਕ ਸੰਗਠਨ ਹੋਣ ਦੇ ਨਾਤੇ ਇਸਦਾ ਨਾਮ ਗਿਨੀਜ਼ ਬੱਕ ਵਿੱਚ ਦਰਜ਼ ਕੀਤਾ ਜਾਣਾ ਚਾਹੀਦਾ ਹੈ।
ਇੱਕ ਸਵਾਲ ਦੇ ਜੁਆਬ ਵਿੱਚ ਬੇਦੀ ਨੇ ਕਿਹਾ ਕਿ ਉਹ ਭਾਜਪਾ ਅਤੇ ਆਰ. ਐੱਸ. ਐੱਸ ਦੋਹਾਂ ਨੂੰ ਪਵਿੱਤਰ ਸੰਸਥਾਵਾਂ ਵਜੋਂ ਦੇਖਦੀ ਹੈ।
ਜ਼ਿਕਰਯੋਗ ਹੈ ਕਿ ਪਿਛਲੇ ਸਮੇਂ ਦੌਰਾਨ ਕਿਰਨ ਬੇਦੀ ਭਾਜਪਾ ਦੇ ਫਿਰਕੂ ਏਜ਼ੰਡੇ ਦੀ ਦੀ ਅਲੋਚਕ ਰਹੀ ਹੈ, ਇਤੌਂ ਤੱਕ ਕਿ ਗੁਜਰਾਤ ਵਿੱਚ ਹੋਏ ਸਾਲ 2002 ਵਿੱਚ ਮੁਸਲਮਾਨਾਂ ਦੇ ਹੋਏ ਕਤਲੇਆਮ ਵਿੱਚ ਮੋਦੀ ਦੀ ਭੁਮਿਕਾ ਦੀ ਵੀ ਉਸਨੇ ਆਲੋਚਨਾ ਕੀਤੀ ਸੀ।
ਭਾਜਪਾ ਵਿੱਚ ਸ਼ਾਮਲ ਹੋਣ ਤੋਂ ਬਾਅਦ ਆਲੋਚਨਾ ਦੇ ਘੇਰੇ ਵਿੱਚ ਆਈ 65 ਸਾਲਾ ਕਿਰਨ ਬੇਦੀ ਨੇ ਕਿਹਾ ਹੈ ਕਿ ਸੰਘ ਬਹੁਤ ਜ਼ਿਆਦਾ ਅਨੁਸ਼ਾਸਤ ਜਥੇਬੰਦੀ ਹੈ, ਜਿਹੜੀ ਰਾਸ਼ਟਰ ਨਿਰਮਾਣ ਵਿੱਚ ਅਹਿਮ ਭੂਮਿਕਾ ਨਿਭਾਅ ਰਹੀ ਹੈ।
ਇੰਟਰਵਿਊ ਵਿੱਚ ਉਨ੍ਹਾਂ ਕਿਹਾ ਕਿ ਸੰਘ ਧੁਰ ਤੱਕ ਕੌਮਪ੍ਰਸਤ ਹੈ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਇਸ ਜਥੇਬੰਦੀ ਨੇ ਭਾਰਤ ਨੂੰ ਇਕਜੁੱਟ ਅਤੇ ਸਾਫ਼ ਰੱਖਿਆ।
