ਵੈਨਕੂਵਰ (21 ਨਵੰਬਰ, 2014): ਕੈਨੇਡਾ ‘ਚ ਵਸਦੇ ਸਿੱਖਾਂ ਵੱਲੋਂ ਅੱਜ ਤੋਂ 30 ਸਾਲ ਪਹਿਲਾਂ ਭਾਰਤ ਦੀ ਰਾਜਧਾਨੀ ਦਿੱਲੀ ਸਮੇਤ ਭਾਰਤ ਦੇ ਵੱਖ-ਵੱਖ ਸ਼ਹਿਰਾਂ ਵਿੱਚ 1984 ‘ਚ ਭਾਰਤ ਅੰਦਰ ਹਜ਼ਾਰਾਂ ਸਿੱਖ ਮਰਦਾਂ, ਔਰਤਾਂ ਅਤੇ ਬੱਚਿਆਂ ਦੀ ਹੋਈ ਨਸਲਕੁਸ਼ੀ ਦੇ ਦੁਖਾਂਤ ਨੂੰ ਯਾਦ ਕਰਦਿਆਂ ਕੌਮੀ ਪੱਧਰ ‘ਤੇ ਖੂਨਦਾਨ ਕੈਂਪ ਲਾਏ ਗਏ।
ਬ੍ਰਿਟਿਸ਼ ਕੋਲੰਬੀਆ ਦੇ ਸ਼ਹਿਰਾਂ ਵੈਨਕੂਵਰ, ਸਰੀ, ਐਬਟਸਫੋਰਡ, ਵਿਕਟੋਰੀਆ, ਪ੍ਰਿੰਸ ਜੌਰਜ, ਕਲੋਨਾ, ਕੈਮਲੂਪਸ, ਵਿਲੀਅਮਜ਼ ਲੇਕ, ਨਿਊਵੈਸਟ ਮਿਨਿਸਰ, ਮਿਸ਼ਨ, ਔਲੀਵਰ ਅਤੇ ਪੰਟਿੰਕਟਨ ਸਮੇਤ ਸਾਰੇ ਪ੍ਰਮੁੱਖ ਸ਼ਹਿਰਾਂ ‘ਚ ਹਜ਼ਾਰਾਂ ਕੈਨੇਡੀਅਨ ਸਿੱਖਾਂ ਨੇ ਖੂਨਦਾਨ ਕੀਤਾ ਅਤੇ ਨਿਰਦੋਸ਼ ਸਿੱਖਾਂ ਦੀ ਹੋਈ ਨਸਲਕੁਸ਼ੀ ਨੂੰ ਅੰਤਰਰਾਸ਼ਟਰੀ ਪੱਧਰ ‘ਤੇ ਉਭਾਰਨ ਦਾ ਪ੍ਰਣ ਕੀਤਾ।
ਸਿੱਖ ਕੌਮ ਦੇ ਕੈਨੇਡੀਅਨ ਜੰਮਪਲ ਬੱਚਿਆਂ ਨੇ ਇਸ ਵਾਰ ਰਿਕਾਰਡਤੋੜ ਪੱਧਰ ‘ਤੇ ਖੂਨਦਾਨ ਕੈਂਪਾਂ ‘ਚ ਹਿੱਸਾ ਲੈ ਕੇ ਇਨਸਾਫ਼ ਲਈ ਦ੍ਰਿੜ੍ਹਤਾ ਦਾ ਸਬੂਤ ਪੇਸ਼ ਕੀਤਾ।
ਗ਼ੈਰ-ਸਿੱਖ ਕੈਨੇਡੀਅਨ ਲੋਕਾਂ ਨੂੰ ਇਨ੍ਹਾਂ ਲੜੀਵਾਰ ਕੈਂਪਾਂ ਬਾਰੇ ਜਾਣਕਾਰੀ ਦਿੰਦਿਆਂ ਉਨ੍ਹਾਂ ਦੱਸਿਆ ਕਿ ਇਕ ਪਾਸੇ ਭਾਰਤ ਅੰਦਰ ਸਿੱਖ ਹੋਣ ਕਾਰਨ ਉਨ੍ਹਾਂ ਦਾ ਖੂਨ ਡੋਲ੍ਹਿਆ ਗਿਆ ਸੀ, ਦੂਜੇ ਪਾਸੇ ਉਹ ਦੁਨੀਆ ਭਰ ‘ਚ ਖੂਨ ਦੇ ਕੇ ਮਨੁੱਖੀ ਜਾਨਾਂ ਬਚਾਅ ਰਹੇ ਹਨ। ਕੈਨੇਡੀਅਨ ਬਲੱਡ ਸਰਵਸਿਜ਼ ਨੇ ਸਿੱਖਾਂ ਵੱਲੋਂ ਲਗਾਏ ਕੈਂਪਾਂ ਨੂੰ ਇਤਿਹਾਸਕ ਯੋਗਦਾਨ ਕਰਾਰ ਦਿੱਤਾ ਹੈ।
