ਲਾਹੌਰ( 9 ਅਪ੍ਰੈਲ, 2015): ਪਾਕਿਸਤਾਨ ‘ਚ ਲਾਹੌਰ ਹਾਈਕੋਰਟ ਨੇ ਭਾਰਤ ਵੱਲੋਂ 2008 ਮੁੰਬਈ ਹਮਲਿਆਂ ਦੇ ਦੋਸ਼ੀ ਦੱਸੇ ਜਾਂਦੇ ਜ਼ਾਕੀਉਰ ਰਹਿਮਾਨ ਲਖਵੀ ਨੂੰ ਤੁਰੰਤ ਰਿਹਾਅ ਕਰਨ ਦੇ ਹੁਕਮ ਦਿੱਤੇ ਹਨ । ਅਦਾਲਤ ਨੇ ਪੰਜਾਬ(ਪਾਕਿਸਤਾਨ) ਸਰਕਾਰ ਦੇ ਲਖਵੀ ਨੂੰ ਹਿਰਾਸਤ ‘ਚ ਰੱਖਣ ਦੇ ਹੁਕਮਾਂ ਨੂੰ ਰੱਦ ਕਰ ਦਿੱਤਾ ।
ਪੰਜਾਬੀ ਅਖਬਾਰ ਅਜ਼ੀਤ ਵਿੱਚ ਨਸ਼ਰ ਖਬਰ ਅਨੁਸਾਰ ਲਾਹੌਰ ਹਾਈਕੋਰਟ ਦੇ ਜੱਜ ਮੁਹੰਮਦ ਅਨਵਰ ਹੱਕ ਨੇ 55 ਸਾਲਾ ਲਖਵੀ ਨੂੰ ਹਿਰਾਸਤ ‘ਚ ਰੱਖੇ ਜਾਣ ਦੇ ਹੁਕਮਾਂ ਨੂੰ ਰੱਦ ਕਰ ਦਿੱਤਾ । ਪੰਜਾਬ (ਪਾਕਿਸਤਾਨ) ਸਰਕਾਰ ਲਖਵੀ ਖਿਲਾਫ਼ ਸੰਵੇਦਨਸ਼ੀਲ ਰਿਕਾਰਡ ਪੇਸ਼ ਕਰਨ ‘ਚ ਅਸਫਲ ਰਹੀ ।
ਜੱਜ ਨੇ ਲਖਵੀ ਨੂੰ ਰਿਹਾਈ ਲਈ 10-10 ਲੱਖ ਰੁਪਏ ਦੇ ਦੋ ਮੁਚੱਲਕੇ ਭਰਨ ਦੇ ਹੁਕਮ ਦਿੱਤੇ ਹਨ । ਜੱਜ ਮੁਹੰਮਦ ਅਨਵਰ ਹੱਕ ਨੇ ਪਿਛਲੀ 7 ਅਪ੍ਰੈਲ ਦੀ ਸੁਣਵਾਈ ‘ਤੇ ਸਰਕਾਰ ਦੇ ਵਕੀਲ ਨੂੰ ਅੱਜ ਲਖਵੀ ਦੀਆਂ ਕਾਰਵਾਈਆਂ ਬਾਰੇ ਗੁਪਤ ਦਸਤਾਵੇਜ਼ ਪੇਸ਼ ਕਰਨ ਲਈ ਕਿਹਾ ਸੀ । ਲਖਵੀ ਨੇ 14 ਮਾਰਚ ਨੂੰ ਪੰਜਾਬ ਸਰਕਾਰ ਦੇ ਜ਼ਿਲ੍ਹਾ ਕੋਆਰਡੀਨੇਸ਼ਨ ਅਧਿਕਾਰੀ ਵਲੋਂ ਉਸ ਨੂੰ 30 ਦਿਨਾਂ ਲਈ ਹਿਰਾਸਤ ‘ਚ ਰੱਖੇ ਜਾਣ ਦੇ ਹੁਕਮਾਂ ਨੂੰ ਚੁਣੌਤੀ ਦਿੱਤੀ ਸੀ ।
ਲਖਵੀ ਦੇ ਵਕੀਲ ਰਾਜਾ ਰਿਜ਼ਵਾਨ ਅੱਬਾਸੀ ਨੇ ਦਲੀਲ ਦਿੱਤੀ ਕਿ ਲਾਹੌਰ ਹਾਈਕੋਰਟ ਦੇ ਪਹਿਲੇ ਹੁਕਮਾਂ ਦੇ ਬਾਅਦ ਉਸ ਨੇ ਲਖਵੀ ਦੀ ਗੈਰ ਕਾਨੂੰਨੀ ਹਿਰਾਸਤ ਖਿਲਾਫ਼ ਗ੍ਰਹਿ ਸਕੱਤਰ ਕੋਲ ਮੁੱਦਾ ਰੱਖਿਆ ਸੀ ਪਰ ਉਨ੍ਹਾਂ ਨੇ ਉਸ ਨੂੰ ਰੱਦ ਕਰ ਦਿੱਤਾ ਅਤੇ ਜ਼ਿਲ੍ਹਾ ਕੋਆਰਡੀਨੇਸ਼ਨ ਅਧਿਕਾਰੀ ਦੇ ਲਖਵੀ ਨੂੰ 30 ਦਿਨਾਂ ਲਈ ਹਿਰਾਸਤ ‘ਚ ਰੱਖਣ ਦੇ ਹੁਕਮਾਂ ਨੂੰ ਬਰਕਰਾਰ ਰੱਖਿਆ ।
ਅੱਬਾਸੀ ਨੇ ਕਿਹਾ ਕਿ ਇਕ ਵਿਅਕਤੀ ਨੂੰ ਨਜ਼ਰਸਾਨੀ ਬੋਰਡ ਦੇ ਹੁਕਮ ਪ੍ਰਾਪਤ ਕੀਤੇ ਬਿਨਾਂ 90 ਦਿਨਾਂ ਬਾਅਦ ਹਿਰਾਸਤ ‘ਚ ਨਹੀਂ ਰੱਖਿਆ ਜਾ ਸਕਦਾ ਅਤੇ ਉਸ ਦੇ ਮੁਵੱਕਲ ਨੂੰ ਹਿਰਾਸਤ ‘ਚ 90 ਦਿਨ ਤੋਂ ਜ਼ਿਆਦਾ ਦਾ ਸਮਾਂ ਹੋ ਗਿਆ ਹੈ ।
