ਲਾਹੌਰ (15 ਮਾਰਚ, 2015): ਪਾਕਿਸਤਾਨੀ ਪੰਜਾਬ ਦੀ ਰਾਜਧਾਨੀ ਲਾਹੌਰ ਵਿਚ ਵੱਸੀ ਦੇਸ਼ ਦੀ ਸਭ ਤੋਂ ਵੱਡੀ ਇਸਾਈ ਕਲੋਨੀ ਯੋਹਾਨਾਬਾਦ ਦੇ ਦੋ ਗਿਰਜਾ ਘਰਾਂ ‘ਤੇ ਹੋਏ ਆਤਮ ਘਾਤੀ ਹਮਲਿਆਂ ਵਿਚ 15 ਵਿਅਕਤੀ ਮਾਰੇ ਗਏ ਤੇ 80 ਹੋਰ ਜ਼ਖਮੀ ਹੋ ਗਏ।ਹਮਲਾਵਰਾਂ ਨੇ ਯੋਹਾਨਾਬਾਦ ਖੇਤਰ ਵਿਚ ਐਤਵਾਰ ਦੀ ਪ੍ਰਾਰਥਨਾ ਸਭਾ ਵੇਲੇ ਰੋਮਨ ਕੈਥੋਲਿਕ ਚਰਚ ਤੇ ਕਰਾਈਸਟ ਚਰਚ ਦੇ ਗੇਟਾਂ ਅਗੇ ਆਪਣੇ ਆਪ ਨੂੰ ਬੰਬ ਨਾਲ ਉਡਾ ਲਿਆ ਜਿਸ ਕਾਰਨ ਭਗਦੜ ਮਚ ਗਈ ਤੇ ਸ਼ਰਧਾਲੂਆਂ ਨੇ ਜਾਨ ਬਚਾਉਣ ਲਈ ਇਧਰ ਉਧਰ ਭੱਜਣਾ ਸ਼ੁਰੂ ਕਰ ਦਿੱਤਾ।
ਇਨ੍ਹਾਂ ਹਮਲਿਆਂ ਵਿੱਚ ਘਟੋ ਘਟ 14 ਵਿਅਕਤੀ ਮਾਰੇ ਗਏ ਜਿਨ੍ਹਾਂ ਵਿਚ ਪੁਲਿਸ ਦੇ ਜਵਾਨ ਵੀ ਸ਼ਾਮਿਲ ਹਨ।ਹਮਲੇ ਦੀ ਜਿੰਮੇਵਾਰੀ ਤਹਿਰੀਕ-ਏ-ਤਾਲਿਬਾਨ ਨਾਲੋਂ ਵੱਖ ਹੋਏ ਸੰਗਠਨ ਜਮਾਤ-ਉਲ-ਅਹਰਾਰ ਨੇ ਲਈ ਹੈ।
ਇਸਾਈ ਆਗੂ ਅਸਲਾਮ ਪਰਵੇਜ਼ ਸਹੋਤਰਾ ਨੇ ਦੱਸਿਆ ਕਿ ਦੋਨਾਂ ਗਿਰਜਾ ਘਰਾਂ ਵਿਚ ਆਮ ਐਤਵਾਰ ਦੀ ਤਰਾਂ ਪ੍ਰਾਰਥਨਾ ਸਭਾਵਾਂ ਹੋ ਰਹੀਆਂ ਸਨ ਜਦੋਂ ਆਤਮ ਘਾਤੀ ਹਮਲਾਵਰਾਂ ਨੇ ਅੰਦਰ ਜਾਣ ਦਾ ਯਤਨ ਕੀਤਾ।ਗੇਟ ਅਗੇ ਤਾਇਨਾਤ ਸੁਰਖਿਆ ਜਵਾਨਾਂ ਨੇ ਉਨ੍ਹਾਂ ਨੂੰ ਰੋਕਿਆ ਤਾਂ ਉਨ੍ਹਾਂ ਨੇ ਆਪਣੇ ਆਪ ਨੂੰ ਬੰਬ ਨਾਲ ਉੱਡਾ ਦਿੱਤਾ।ਜਦੋਂ ਧਮਾਕੇ ਹੋਏ ਤਾਂ ਉਸ ਸਮੇਂ ਗਿਰਜਾ ਘਰਾਂ ਵਿਚ ਵੱਡੀ ਗਿਣਤੀ ਵਿਚ ਸ਼ਰਧਾਲੂ ਮੌਜੂਦ ਸਨ।
ਪੰਜਾਬ ਹੰਗਾਮੀ ਸੇਵਾ ਦੇ ਬੁਲਾਰੇ ਜਾਮ ਸਜਾਦ ਨੇ ਦਸਿਆ ਕਿ ਘਟਨਾ ਵਿਚ ਘਟੋ ਘਟ 50 ਵਿਅਕਤੀ ਜ਼ਖਮੀ ਹੋਏ ਹਨ ਜਿਨ੍ਹਾਂ ਵਿਚੋਂ 5 ਦੀ ਹਾਲਤ ਗੰਭੀਰ ਹੈ।ਘਟਨਾ ਤੋਂ ਬਾਅਦ ਗੁਸੇ ਵਿਚ ਆਏ ਲੋਕਾਂ ਨੇ ਦੋ ਸ਼ੱਕੀਆਂ ਨੂੰ ਬਹੁਤ ਬੁਰੀ ਤਰਾਂ ਕੁੱਟਿਆ ਤੇ ਬਾਅਦ ਵਿਚ ਉਨ੍ਹਾਂ ਨੂੰ ਅੱਗ ਲਾ ਦਿੱਤੀ।ਉਨ੍ਹਾਂ ਦੀਆਂ ਲਾਸ਼ਾਂ ਸੜਕੇ ਸਵਾਹ ਹੋ ਗਈਆਂ।
