ਵੀਨਸ, ਇਟਲੀ (15 ਮਾਰਚ, 2015): ਇਟਲੀ ਦੀ ਰਾਜਧਾਨੀ ਰੋਮ ਵਿਖੇ ਇਟਲੀ ਦੇ ਪੰਥਕ ਆਗੂਆਂ ਤੇ ਗੁਰਦੁਆਰਾ ਪ੍ਰਬੰਧਕ ਕਮੇਟੀਆਂ ਦੇ ਅਹੁਦੇਦਾਰਾਂ ਦੁਆਰਾ ਧਾਰਮਿਕ ਮਾਮਲਿਆਂ ਦੀ ਮੁਖੀ ਮੈਡਮ ਮਾਰੀਆ ਜੁਵਾਨਾ ਨਾਲ਼ ਰੋਮ ਵਿਖੇ ਇਕ ਵਿਸ਼ੇਸ਼ ਬੈਠਕ ਕਰਕੇ ਵਿਚਾਰ-ਵਟਾਂਦਰੇ ਕੀਤੇ ਗਏ।ਜਿਸ ਦੌਰਾਨ ਇਹ ਪੱਖ ਉੱਭਰ ਕਿ ਸਾਹਮਣੇ ਆਇਆ ਕਿ ਇਤਾਲਵੀ ਸਰਕਾਰ ਇੱਥੇ ਰਹਿੰਦੇ ਸਿੱਖਾਂ ਲਈ 6 ਸੈਂਟੀਮੀਟਰ ਦੇ ਅਕਾਰ ਵਾਲੀ ਕਿਰਪਾਨ ਪਹਿਨਣ ਨੂੰ ਕਾਨੂੰਨੀ ਤੌਰ ਤੇ ਇਜਾਜ਼ਤ ਦੇ ਸਕਦੀ ਹੈ।
ਇਟਲੀ ਵਿੱਚ ਸਿੱਖ ਧਰਮ ਦੀ ਮਾਨਤਾ ਸਬੰਧੀ ਮਾਮਲੇ ਦੇ ਦੋ ਸਾਲ ਪਹਿਲਾ ਹਾਰ ਜਾਣ ਮਗਰੋਂ ਹੁਣ ਇਟਲੀ ਦੇ ਸਿੱਖ ਆਗੂ ਇੱਥੇ ਰਹਿੰਦੇ ਸਿੱਖ ਭਾਈਚਾਰੇ ਦੇ ਮਸਲਿਆਂ ਨੂੰ ਇਕ ਵਾਰੀ ਫੇਰ ਇਤਾਲਵੀ ਸਰਕਾਰ ਸਾਹਮਣੇ ਪ੍ਰਭਾਵਸ਼ਾਲੀ ਢੰਗ ਦੇ ਨਾਲ਼ ਉਠਾਉਣ ਲਈ ਯਤਨਸ਼ੀਲ ਹਨ।
ਇਸ ਵਫਦ ਦੀ ਅਗਵਾਈ ਕਰਨ ਵਾਲੇ ਉੱਘੇ ਆਗੂ ਕਰਮਜੀਤ ਸਿੰਘ ਢਿੱਲੋਂ ਅਤੇ ਬਲਬੀਰ ਸਿੰਘ ਲੱਲ੍ਹ ਦੇ ਅਨੁਸਾਰ ਇਹ ਸਮੁੱਚੀ ਸਿੱਖ ਕੌਮ ਦਾ ਸਾਂਝਾ ਮਸਲਾ ਹੈ।ਇਸ ਲਈ ਇਟਲੀ ਦੀਆਂ ਸਮੁੱਚੀਆਂ ਗੁਰਦੁਆਰਾ ਪ੍ਰਬੰਧਕ ਕਮੇਟੀਆਂ ਨਾਲ ਸਲਾਹ-ਮਸ਼ਵਰਾ ਕਰਨ ਮਗਰੋਂ ਹੀ ਕਿਰਪਾਨ ਦਾ ਅਕਾਰ ਨਿਰਧਾਰਤ ਕਰਨ ਸਬੰਧੀ ਅੰਤ੍ਰਿਮ ਫੈਸਲਾ ਲਿਆ ਜਾਵੇਗਾ ਜਿਸ ਨੂੰ ਲੈ ਕੇ ਇਟਲੀ ਦੀਆਂ ਸਮੁੱਚੀਆਂ ਗੁਰਦੁਆਰਾ ਪ੍ਰਬੰਧਕ ਕਮੇਟੀਆਂ ਅਤੇ ਪੰਥਕ ਜਥੇਬੰਦੀਆਂ ਦੀ ਅਹਿਮ ਬੈਠਕ 20 ਅਪ੍ਰੈਲ ਨੂੰ ਰੋਮ ਵਿਖੇ ਰੱਖੀ ਜਾ ਰਹੀ ਹੈ।
ਇਤਾਲਵੀ ਅਧਿਕਾਰੀਆਂ ਨਾਲ਼ ਅੱਜ ਹੋਈ ਬੈਠਕ ਦੌਰਾਨ ਭਾਈ ਰਤਨ ਸਿੰਘ ਸਬੋਧੀਆ (ਮੀਤ ਪ੍ਰਧਾਨ ਗੁਰਦੁਆਰਾ ਸਿੰਘ ਸਭਾ ਸਬੋਧੀਆ), ਭਾਈ ਜੁਪਿੰਦਰ ਸਿੰਘ ਜੋਗਾ (ਪ੍ਰਧਾਨ ਗੁਰਦੁਆਰਾ ਗੋਬਿੰਦਸਰ ਸਾਹਿਬ ਲਵੀਨੀਓ), ਭਾਈ ਮਨਜੀਤ ਸਿੰਘ ਜੱਸੋਮਾਜਰਾ, ਤਜਿੰਦਰ ਸਿੰਘ ਬੱਬੀ, ਜਸਪਾਲ ਸਿੰਘ ਪੋਰਦੀਨੋਨੇ, ਅਮਰੀਕ ਸਿੰਘ ਆਰੇਸੋ, ਪਰਮਜੀਤ ਸਿੰਘ ਟਾਂਡਾ, ਭਾਈ ਸੁਰਿੰਦਰ ਸਿੰਘ, ਕੁਲਵਿੰਦਰ ਸਿੰਘ ਸਮੇਤ ਅਨੇਕਾਂ ਪ੍ਰਮੁੱਖ ਸਖਸ਼ੀਅਤਾਂ ਹਾਜ਼ਰ ਸਨ।
