ਲੰਡਨ: ਜੂਨ 1984 ਵਿੱਚ ਸ੍ਰੀ ਦਰਬਾਰ ਸਾਹਿਬ ਤੇ ਸ੍ਰੀ ਅਕਾਲ ਤਖਤ ਸਾਹਿਬ ਸਮੇਤ 65 ਤੋਂ ਵਧੀਕ ਹੋਰਨਾਂ ਗੁਰਦੁਆਰਾ ਸਾਹਿਬਾਨ ਉੱਪਰ ਇੰਡੀਆ ਦੀ ਫੌਜ ਵੱਲੋਂ ਕੀਤਾ ਗਿਆ ਹਮਲਾ ਸਿੱਖ ਇਤਿਹਾਸ ਵਿੱਚ ਤੀਜੇ ਘਲੂਕਾਰੇ ਦੇ ਤੌਰ ਉੱਤੇ ਅੰਕਿਤ ਹੋ ਚੁੱਕਾ ਹੈ।
ਇਸ ਵਸੀਹ ਹਮਲੇ ਦੇ ਕਈ ਪੱਖ ਹਕੂਮਤ ਵੱਲੋਂ ਦਬਾ ਲਏ ਗਏ ਸਨ। ਹੁਣ ਸਮੇਂ ਦੇ ਬੀਤਣ ਨਾਲ ਤੇ ਸਿੱਖਾਂ ਦੀ ਮਿਹਨਤ ਨਾਲ ਇਹ ਦਬਾਏ ਗਏ ਪੱਖ ਸੰਸਾਰ ਅੱਗੇ ਪ੍ਰਗਟ ਹੋ ਰਹੇ ਹਨ।
ਬੀਤੇ ਸਾਲਾਂ ਦੌਰਾਨ ਜੂਨ 1984 ਦੀ ਖੇਤਰੀ ਵਿਆਪਕਤਾ ਵਾਲਾ ਪੱਖ ਉਜਾਗਰ ਕਰਦੀ ਕਿਤਾਬ “ਘੱਲੂਘਾਰਾ ਜੂਨ 84: ਵੱਖ-ਵੱਖ ਗੁਰਦੁਆਰਿਆਂ ਉੱਤੇ ਹੋਏ ਫੌਜੀ ਹਮਲਿਆਂ ਦੀ ਵਿਥਿਆ (ਚਸ਼ਮਦੀਦ ਗਵਾਹਾਂ ਦੀ ਜ਼ੁਬਾਨੀ)” ਸਾਹਮਣੇ ਆਈ ਸੀ, ਜਿਸ ਵਿੱਚ ਸ੍ਰੀ ਦਰਬਾਰ ਸਾਹਿਬ ਅਤੇ ਅਕਾਲ ਤਖਤ ਸਾਹਿਬ ਤੋਂ ਇਲਾਵਾ 65 ਤੋਂ ਵੱਧ ਉਹਨਾਂ ਗੁਰਦੁਆਰਾ ਸਾਹਿਬਾਨ ਦੀ ਨਿਸ਼ਾਨਦੇਹੀ ਕੀਤੀ ਗਈ ਸੀ ਜਿੰਨਾ ਉੱਪਰ ਭਾਰਤੀ ਫੌਜ ਵੱਲੋਂ ਜੂਨ 1984 ਵਿੱਚ ਹਮਲਾ ਕੀਤਾ ਗਿਆ ਸੀ।
ਜੂਨ 1984 ਦੇ ਘੱਲਘਾਰੇ ਤੋਂ ਬਾਅਦ ਸਿੱਖਾਂ ਦੀ ਅਗਲੀ ਪੀੜੀ ਦੇ ਨੌਜਵਾਨਾਂ ਵੱਲੋਂ ਕੀਤੀ ਗਈ ਇਸ ਖੋਜ ਨੂੰ ਭਾਈ ਮਲਕੀਤ ਸਿੰਘ ਭਵਾਨੀਗੜ੍ਹ ਨੇ ਕਲਮਬੰਦ ਕੀਤਾ ਸੀ। ਚਸ਼ਮਦੀਦ ਗਵਾਹਾਂ ਤੇ ਬਿਆਨਾਂ ਉੱਪਰ ਅਧਾਰਤ ਇਸ ਖੋਜ ਨੂੰ ਬਿਬੇਕਗੜ੍ਹ ਪ੍ਰਕਾਸ਼ਨ ਵੱਲੋਂ ਕਿਤਾਬ ਰੂਪ ਵਿੱਚ ਛਾਪਿਆ ਗਿਆ।
ਵਿਦੇਸ਼ਾਂ ਵਿੱਚ ਰਹਿੰਦੇ ਸਿੱਖਾਂ ਦੀ ਅਗਲੀ ਪੀੜੀ ਅਤੇ ਹੋਰ ਵਿਆਪਕ ਘੇਰੇ ਦੇ ਪਾਠਕਾਂ ਦੀ ਸਹੂਲਤ ਵਾਸਤੇ ਖਾਲਿਸ ਹਾਊਸ ਵੱਲੋਂ ਇਸ ਕਿਤਾਬ ਨੂੰ ਹੁਣ ਅੰਗਰੇਜ਼ੀ ਵਿੱਚ ਪ੍ਰਕਾਸ਼ਿਤ ਕੀਤਾ ਗਿਆ ਹੈ। ਇਸ ਕਿਤਾਬ ਦਾ ਅੰਗਰੇਜ਼ੀ ਉਲੱਥਾ ਇੰਗਲੈਂਡ ਵਾਸੀ ਨੌਜਵਾਨ ਸਿੱਖ ਲੇਖਕ ਭਾਈ ਰਣਬੀਰ ਸਿੰਘ ਵੱਲੋਂ ਕੀਤਾ ਗਿਆ ਹੈ।
“ਪੰਜਾਬ ਅੰਡਰ ਸੀਜ਼” (ਭਾਵ ਪੰਜਾਬ ਦੀ ਘੇਰਾਬੰਦੀ) ਸਿਰਲੇਖ ਵਾਲੀ ਇਹ ਕਿਤਾਬ 6 ਜੂਨ 2026 ਨੂੰ ਸੰਸਾਰ ਭਰ ਦੇ ਪਾਠਕਾਂ ਲਈ ਜਾਰੀ ਕਰ ਦਿੱਤੀ।
ਚਾਹਵਾਨ ਪਾਠਕ ਇੰਗਲੈਂਡ ਅਧਾਰਿਤ ਖਾਲਿਸ ਹਾਊਸ ਪ੍ਰਕਾਸ਼ਨ ਕੋਲੋਂ ਇਹ ਕਿਤਾਬ ਦੁਨੀਆ ਭਰ ਵਿੱਚ ਕਿਤੇ ਵੀ ਮੰਗਵਾ ਸਕਦੇ ਹਨ।
