ਨਵੀਂ ਦਿੱਲੀ: ਭਾਈ ਮਤੀ ਦਾਸ ਛਬੀਲ ਨੁੰ ਮੁੜ ਉਸਾਰਣ ਦੇ ਮਾਮਲੇ ਵਿੱਚ ਦਿੱਲੀ ਹਾਈ ਕੋਰਟ ਨੇ ਇਕ ਪਟੀਸ਼ਨ ਦੀ ਸੁਣਵਾਈ ਕਰਦਿਆਂ ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਮਨਜੀਤ ਸਿੰਘ ਜੀ.ਕੇ. ਤੇ ਜਨਰਲ ਸਕੱਤਰ ਮਨਜਿੰਦਰ ਸਿੰਘ ਸਿਰਸਾ ਖਿਲਾਫ ਅਦਾਲਤ ਦੀ ਮਾਨਹਾਨੀ ਦੇ ਹੁਕਮ ਜਾਰੀ ਕੀਤੇ ਹਨ।
ਇਥੋਂ ਦੇ ‘ਮਾਨੁਸ਼ੀ ਸੰਗਠਨ’ ਅਤੇ ‘ਚਾਂਦਨੀ ਚੌਕ ਵਪਾਰ ਮੰਡਲ’ ਦੀ ਉਕਤ ਪਟੀਸ਼ਨ ‘ਤੇ ਸੁਣਵਾਈ ਕਰਦਿਆਂ ਜਸਟਿਸ ਐਸ. ਮੁਰਲੀਧਰ ਅਤੇ ਜਸਟਿਸ ਵਿਭੂ ਬਖਰੂ ਦੀ ਬੈਂਚ ਨੇ ਕਿਹਾ ਕਿ ਦਿੱਲੀ ਪੁਲਿਸ ਵੱਲੋਂ ਜੋ ਪਿਆਊ ਢਾਹਿਆ ਗਿਆ ਸੀ ।ਉਸ ਪਿਆਊ ਦੀ ਰਾਤੋ-ਰਾਤ ਮੁੜ ਉਸਾਰੀ ਕਰ ਦਿੱਤੀ ਗਈ ।ਸਥਾਨਕ ਥਾਣੇ ਦੇ ਮੁਖੀ ਨੇ ਦਿੱਲੀ ਪੁਲਿਸ ਦੇ ਵਕੀਲ ਮਾਰਫਤ ਅਦਾਲਤ ਨੂੰ ਦੱਸਿਆ ਕਿ ਪਿਆਊ ਦੀ ਮੁੜ ਉਸਾਰੀ ਕਰਨ ਵਾਲੇ ਲੋਕਾਂ ਵਿਚ ਹੋਰਨਾਂ ਤੋਂ ਇਲਾਵਾ ਮਨਜੀਤ ਸਿੰਘ ਜੀ.ਕੇ. ਤੇ ਮਨਜਿੰਦਰ ਸਿੰਘ ਸਿਰਸਾ ਵੀ ਸ਼ਾਮਿਲ ਸਨ ।
ਉਨ੍ਹਾਂ ਦੱਸਿਆ ਕਿ ਪਿਆਊ ਤੋੜੇ ਜਾਣ ਸਮੇਂ ਪੁਲਿਸ ਤੇ ਦੂਜੀ ਧਿਰ ਵਿਚਕਾਰ ਝਗੜਾ ਵੀ ਹੋਇਆ, ਜਿਸਦੇ ਸਬੰਧ ‘ਚ ਥਾਣਾ ਕੋਤਵਾਲੀ ਵਿਖੇ ਐਫ.ਆਈ.ਆਰ. ਨੰਬਰ 321 ਵੀ ਰਜਿਸਟਰ ਕੀਤੀ ਗਈ ਹੈ ।ਅਦਾਲਤ ਨੇ ਇਸਨੂੰ ਗੰਭੀਰਤਾ ਨਾਲ ਲੈਂਦਿਆਂ ਟਿੱਪਣੀ ਕੀਤੀ ਕਿ ਕਿਸੇ ਵੀ ਵਿਅਕਤੀ ਨੂੰ ਅਦਾਲਤੀ ਹੁਕਮਾਂ ਦੇ ਅਮਲ ਵਿਚ ਦਖਲ-ਅੰਦਾਜ਼ੀ ਦੀ ਇਜਾਜ਼ਤ ਨਹੀਂ ਦਿੱਤੀ ਜਾ ਸਕਦੀ ।ਇਸ ਲਈ ਸ੍ਰੀ ਜੀ.ਕੇ. ਤੇ ਸਿਰਸਾ ਨੂੰ ਥਾਣਾ ਕੋਤਵਾਲੀ ਦੇ ਐਸ.ਐਚ.ਓ. ਦੇ ਮਾਧਿਅਮ ਨਾਲ ਅਦਾਲਤ ਦੀ ਹੁਕਮ-ਅਦੂਲੀ ਦੇ ਦੋਸ਼ਾਂ ਵਿਚ ਨੋਟਿਸ ਜਾਰੀ ਕੀਤਾ ਜਾਵੇ ।
ਅਦਾਲਤ ਨੇ ਛਬੀਲ ਵਾਲੀ ਥਾਂ ਤੋਂ ਤੁਰੰਤ ਮਲਬਾ ਹਟਾਉਣ ਤੇ ਅਗਲੇ ਹੁਕਮਾਂ ਤੱਕ ਛਬੀਲ ਦੇ ਉਪਯੋਗ ‘ਤੇ ਪਾਬੰਦੀ ਲਗਾਉਣ ਦੇ ਆਦੇਸ਼ ਵੀ ਦਿੱਤੇ ।ਅਦਾਲਤ ਨੇ ਪਿਆਊ ਤੋੜੇ ਜਾਣ ਦੀ ਕਾਰਵਾਈ ਦੀ ਵੀਡੀਓ ਸੀ.ਡੀ. ਅਦਾਲਤ ਵਿਚ ਜਮ੍ਹਾਂ ਕਰਵਾਉਣ ਦਾ ਆਦੇਸ਼ ਜਾਰੀ ਕਰਦਿਆਂ, ਮਾਮਲੇ ਦੀ ਅਗਲੀ ਸੁਣਵਾਈ 8 ਅਪ੍ਰੈਲ ‘ਤੇ ਪਾ ਦਿੱਤੀ ।
