ਜਲੰਧਰ (6 ਦਸੰਬਰ,2014): ਪ੍ਰਾਪਤ ਜਾਣਕਾਰੀ ਅਨੁਸਾਰ ਨੂਰਮਹਿਲ ਡੇਰੇ ਵਿਚ 600 ਤੋਂ ਵੱਧ ਮੁੰਡਿਆਂ ਨੂੰ ਤਿੰਨ ਸਾਬਕਾ ਡੀ. ਐਸ. ਪੀ. ਹਥਿਆਰਾਂ ਦੀ ਸਪਲਾਈ ਦੇਣ ਵਿਚ ਰੁੱਝੇ ਹੋਏ ਹਨ। ਸਿਖਲਾਈ ਪ੍ਰਾਪਤ ਕਰਨ ਵਾਲਿਆਂ ’ਚ ਬਹੁਗਿਣਤੀ ਦਲਿਤ ਭਾਈਚਾਰੇ ਨਾਲ ਸਬੰਧਿਤ ਨੌਜਵਾਨਾਂ ਦੀ ਜਿਸ ਤੋਂ ਜਾਪਦਾ ਹੈ ਕਿ ਡੇਰਾ ਪੰਜਾਬ ਵਿਚ ਇਕ ਖਤਰਨਾਕ ਸਾਜ਼ਿਸ਼ ਨਾਲ ਦਲਿਤ ਭਾਈਚਾਰੇ ਦੀ ਵਰਤੋਂ ਕਰਕੇ ਪੰਜਾਬ ਵਿਚ ਜਾਤ ਪਾਤ ਦੀ ਅੱਗ ਨੂੰ ਭੜਕਾਉਣਾ ਚਾਹੁੰਦਾ ਹੈ।
ਦੱਸਿਆ ਜਾ ਰਿਹਾ ਹੈ ਕਿ ਡੇਰੇ ਵਿਚ ਰਾਈਫਲਾਂ , ਗੰਡਾਸੇ ਅਤੇ ਡਾਂਗਾ ਆਦਿ ਵੱਡੀ ਗਿਣਤੀ ਵਿਚ ਇਕੱਠੇ ਕੀਤੇ ਜਾ ਰਹੇ ਹਨ। ਇਸ ਤੋਂ ਇਲਾਵਾ ਇੱਟਾ ਰੋਡਿਆਂ, ਅਤੇ ਮੋਟੀ ਬਜ਼ਰ ਦੇ ਕਈ ਟਰੱਕ ਵੀ ਡੇਰੇ ਵਿਚ ਜਾਂਦੇ ਦੇਖੇ ਹਨ।
ਜਿਵੇਂ ਜਿਵੇਂ ਨੂਰਮਹਿਲੀਏ ਸਾਧ ਆਸ਼ੂਤੋਸ਼ ਦੀ ਮਿ੍ਰਤਕ ਦੇਹ ਦੇ ਸਸਕਾਰ ਲਈ ਅਦਾਲਤ ਵਲੋਂ ਦਿੱਤੀ ਮਿਆਦ ਪੁਗਦੀ ਜਾ ਰਹੀ ਹੈ ਉਵੇਂ ਉਵੇਂ ਨੂਰਮਹਿਲੀਏ ਦੇ ਡੇਰੇ ਵਲੋਂ ਟਕਰਾਅ ਦੀਆਂ ਤਿਆਰੀਆਂ ਵੀ ਮੁਕੰਮਲ ਕੀਤੀਆ ਜਾ ਰਹੀਆ ਹਨ। ਜਦੋਂ ਕਿ ਸਰਕਾਰ ਡੇਰੇ ਦੀਆਂ ਖ਼ਤਰਨਾਕ ਗਤੀਵਿਧੀਆਂ ਵੇਖਦਿਆਂ ਹੋਇਆ ਵੀ ਅੱਖਾਂ ਬੰਦ ਕਰੀ ਬੈਠੀ ਹੈ।
ਡੇਰੇ ਵਲੋਂ ਸਰਕਾਰ ਉੱਤੇ ਦਬਾਅ ਪਾਉਣ ਲਈ ਆਪਣੀਆਂ ਦਬਾਅ ਪਾਉਣ ਵਾਲੀਆਂ ਕਾਰਵਾਈਆਂ ਨੂੰ ਤੇਜ਼ ਕਰ ਦਿੱਤਾ ਗਿਆ ਹੈ। ਅਦਾਲਤ ਵਲੋਂ ਡੇਰੇ ਦੀ ਪਟੀਸ਼ਨ ਖਾਰਜ ਕਰਨ ਤੋਂ ਬਾਅਦ ਭਾਵੇਂ ਡੇਰੇ ਵਲੋਂ ਸੁਪਰੀਮ ਕੋਰਟ ਵਿਚ ਜਾਣ ਦੀਆਂ ਤਿਆਰੀਆਂ ਵੀ ਕੀਤੀਆ ਜਾ ਰਹੀਆਂ ਹਨ ਪਰੰਤੂ ਬਹੁਤਾ ਜ਼ੋਰ ਟਕਰਾਅ ਦੀਆਂ ਤਿਆਰੀਆਂ ’ਤੇ ਦਿੱਤਾ ਜਾ ਰਿਹਾ ਦੱਸਿਆ ਜਾ ਰਿਹਾ ਹੈ।
ਜਦੋਂ ਕਿ ਪੰਜਾਬ ਸਰਕਾਰ ਇਸ ਸਥਿਤੀ ਤੇ ਨਜ਼ਰ ਰੱਖਣ ਦਾ ਦਾਅਵਾ ਤਾ ਕਰ ਰਹੀ ਹੈ। ਪਰੰਤੂ ਡੇਰੇ ਨੂੰ ਹਰ ਤਰਾਂ ਦੀ ਖੁੱਲ ਦਿੱਤੀ ਸਾਫ਼ ਦਿਖਾਈ ਦਿੰਦੀ ਹੈ।
