ਅੰਮ੍ਰਿਤਸਰ, (ਨਰਿੰਦਰ ਪਾਲ ਸਿੰਘ): ਬੀਤੇ ਦਿਨੀ ਬਿਛੋਰਾ ਵਿਖੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀ ਬੇਅਦਬੀ ਕਰਨ ਵਾਲੇ ਨੂੰ ਲੁਧਿਆਣਾ ਜੇਲ੍ਹ ਵਿੱਚ ਸਬਕ ਸਿਖਾਉਣ ਵਾਲੇ ਹਰਸਿਮਰਨਦੀਪ ਸਿੰਘ (ਸਿੰਮੀ ਸੇਖੋਂ) ਦੀ ਮਾਤਾ ਅਤੇ ਦਾਦੀ ਜੀ ਨੇ ਚੜਦੀਕਲਾ ਦਾ ਸੰਦੇਸ਼ ਦਿੰਦਿਆ ਕਿਹਾ ਹੈ ਕਿ “ਸਾਡਾ ਪੁੱਤ 2, 3 ਸਾਲ ਤੋਂ ਹੋਰ ਰਾਹਾਂ ਤੇ ਤੁਰ ਗਿਆ ਸੀ। ਪਰ ਸਾਨੂੰ ਮਾਣ ਹੈ ਕਿ ਸਾਡੇ ਪੁੱਤ ਨੇ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਹੋਈ ਬੇਅਦਬੀ ਦਾ ਬਦਲਾ ਲਿਆ।”
ਇਹ ਜਾਣਕਾਰੀ ਸਾਂਝੀ ਕਰਦਿਆਂ ਗੁਰਸੇਵਕ ਸਿੰਘ ਭਾਣਾ, ਭਾਈ ਬਾਜ ਸਿੰਘ, ਭਾਈ ਸੁਖਚੈਨ ਸਿੰਘ ਸਿੱਖਾਵਾਲਾ, ਭਾਈ ਸਿਮਰਜੋਤ ਸਿੰਘ ਖਾਲਸਾ, ਭਾਈ ਬਲਵੰਤ ਸਿੰਘ ਸੰਗਰੂਰ ਅਤੇ ਭਾਈ ਬਲਜਿੰਦਰ ਸਿੰਘ ਫਾਜ਼ਿਲਕਾ ਨੇ ਦੱਸਿਆ ਕਿ ਉਹ ਸਿੰਮੀ ਸੇਖੋਂ ਦੇ ਘਰ ਪੁਜੇ ਅਤੇ ਪਰਿਵਾਰ ਨਾਲ ਹਮਦਰਦੀ ਪ੍ਰਗਟਾਈ। ਪਰਿਵਾਰ ਨੂੰ ਦੱਸਿਆ ਗਿਆ ਕਿ ਪੂਰੀ ਕੌਮ ਤੁਹਾਡੇ ਨਾਲ ਹੈ। ਜੋ ਬਰਗਾੜੀ ਇਨਸਾਫ ਮੋਰਚਾ ਜਥੇਦਾਰ ਧਿਆਨ ਸਿੰਘ ਜੀ ਮੰਡ ਵੱਲੋਂ ਲਗਾਇਆ ਗਿਆ ਹੈ ਉਸ ਵਿੱਚ ਸਿੰਮੀ ਦੇ ਕੀਤੇ ਕਾਰਨਾਮੇ ਦੇ ਹੀ ਚਰਚੇ ਨੇ। ਤੁਹਾਡੇ ਪੁੱਤਰ ਤੇ ਹੁਣ ਪੂਰੀ ਕੌਮ ਨੂੰ ਵੀ ਮਾਣ ਹੈ।
ਭਾਈ ਭਾਣਾ ਨੇ ਦੱਸਿਆ ਕਿ ਪਰਿਵਾਰ ਪਾਸ ਪੁਜਣ ਵਾਲੇ ਪਿੰਡ ਦੇ ਬਜੁਰਗ ਵੀ ਸਿੰਮੀ ਸੇਖੋਂ ਦੀ ਸ਼ਲਾਘਾ ਕਰ ਰਹੇ ਸਨ। ਪਰਿਵਾਰ ਚਿੰਤਤ ਸੀ ਕਿ ਉਸਦੇ ਪੁਤਰ ਤੇ ਅੰਨ੍ਹਾ ਤਸ਼ੱਦਦ ਢਾਹਿਆ ਜਾ ਰਿਹਾ ਹੈ। ਨੌਜੁਆਨਾਂ ਨੇ ਯਕੀਨ ਦਿਵਾਇਆ ਹੈ ਕਿ ਪਰਿਵਾਰ ਦੇ ਫਿਕਰ ਤੋਂ ਸਮੁਚੀ ਕੌਮ ਨੂੰ ਜਾਣੂ ਕਰਵਾਇਆ ਜਾਵੇਗਾ।
