ਬਠਿੰਡਾ (12 ਨਵੰਬਰ, 2015): ਦਿੱਲੀ ਸਿੱਖ ਕਤਲੇਆਮ ਦੇ ਕੇਸਾਂ ਦੀ ਲੰਮੇ ਸਮੇਂ ਤੋਂ ਪੈਰਵੀ ਕਰਦੇ ਆ ਰਹੇ ਪ੍ਰਸਿੱਧ ਵਕੀਲ ਹਰਵਿੰਦਰ ਸਿੰਘ ਫੂਲਕਾ ਨੇ ਐਲਾਨ ਕੀਤਾ ਕਿ ਉਹ ਬਠਿੰਡਾ ਤੋਂ ਬਾਦਲ ਦਲ ਦੀ ਐੱਮਪੀ ਅਤੇ ਕੇਂਦਰੀ ਮੰਤਰੀ ਬੀਬੀ ਹਰਸਿਮਰਤ ਕੌਰ ਬਾਦਲ ਖਿਲਾਫ ਮਾਣਹਾਨੀ ਦਾ ਕੇਸ ਦਰਜ਼ ਕਰਵਾਉਣਗੇ।
ਐਡਵੋਕੇਟ ਸ. ਐਚ. ਐਸ ਫ਼ੂਲਕਾ ਨੇ ਅੱਜ ਇਥੇ ਪ੍ਰੈਸ ਕਾਨਫ਼ਰੰਸ ਕਰਕੇ ਕੇਂਦਰੀ ਮੰਤਰੀ ਬੀਬਾ ਹਰਸਿਮਰਤ ਕੌਰ ਬਾਦਲ ਵੱਲੋਂ ਉਨ੍ਹਾਂ ਤੇ ਆਪਣੇ ਹੇਠਲੇ ਵਕੀਲਾਂ ਰਾਹੀਂ ਸਿੱਖ ਨਸਲਕੁਸ਼ੀ ਦੇ ਪੀੜਤਾਂ ਦੇ ਕੇਸਾਂ ਦੀਆਂ ਫੀਸਾਂ ਲੈਣ ਤੇ ਅਦਾਲਤ ਵਿਚ ਪੀੜਤਾਂ ਦੇ ਕੇਸਾਂ ਦੀ ਯੋਗ ਪੈਰਵੀ ਕਰਨ ਦੀ ਥਾਂ ‘ਤੇ ਅਦਾਲਤ ਦੇ ਬਾਹਰ ਆ ਕੇ ਕੇਵਲ ਮੀਡੀਆ ਵਿਚ ਬਿਆਨਬਾਜ਼ੀ ਕਰਨ ਦੇ ਲਾਏ ਦੋਸ਼ਾਂ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਕੇਂਦਰੀ ਮੰਤਰੀ ਬੀਬਾ ਹਰਸਿਮਰਤ ਕੌਰ ਬਾਦਲ ‘ਤੇ ਦਿੱਲੀ ਦੀ ਅਦਾਲਤ ਵਿਚ ਬੀਬਾ ਬਾਦਲ ਤੇ ਮਾਣਹਾਨੀ ਕੇਸ ਦਾਇਰ ਕਰਨ ਦਾ ਐਲਾਨ ਕੀਤਾ ।
ਉਨ੍ਹਾਂ ਸਿੱਖ ਨਸਲਕੁਸ਼ੀ ਦੇ ਲਈ ਕੀਤੇ ਕੰਮਾਂ ਦੇ ਮਾਮਲੇ ਵਿਚ ਬੀਬਾ ਬਾਦਲ ਨੂੰ ਖੁੱਲੀ ਬਹਿਸ ਦੀ ਚੁਣੌਤੀ ਤੱਕ ਦਿੱਤੀ ।ਸ. ਫ਼ੂਲਕਾ ਨੇ ਕਿਹਾ ਕਿ ਬੀਬਾ ਬਾਦਲ ਵੱਲੋਂ ਜੋ ਇਹ ਦੁਰਪ੍ਰਚਾਰ ਕੀਤਾ ਜਾ ਰਿਹਾ ਹੈ ਕਿ ਫ਼ੂਲਕਾ ਆਪਣੇ ਜੂਨੀਅਰਾਂ ਰਾਹੀਂ ਫੀਸ ਲੈਂਦੇ ਹਨ ਤਾਂ ਉਹ ਇਹ ਐਲਾਨ ਕਰਦੇ ਹਨ ਕਿ ਜਿਨ੍ਹਾਂ ਨੂੰ ਫੀਸਾਂ ਦੇਣ ਬਾਰੇ ਕਿਹਾ ਜਾ ਰਿਹਾ ਹੈ ਉਨ੍ਹਾਂ ਦੇ ਜੂਨੀਅਰ ਵਕੀਲਾਂ ਦਾ ਨਾਂਅ ਨਸ਼ਰ ਕੀਤੇ ਜਾਣ ।
ਸ. ਫ਼ੂਲਕਾ ਨੇ ਐਲਾਨ ਕੀਤਾ ਕਿ ਅਗਰ ਕੋਈ ਵੀ ਇਹ ਸਾਬਤ ਕਰ ਦੇਵੇ ਕਿ ਉਸ ਨੇ ਪਿਛਲੇ 30 ਸਾਲਾਂ ਵਿਚ ਕਿਸੇ ਵੀ ਪੀੜਤ ਜਾਂ ਐਸ. ਜੀ. ਪੀ. ਸੀ. ਤੋਂ ਫ਼ੀਸ ਲਈ ਹੈ ਤਾਂ ਉਹ ਵਕਾਲਤ ਤੱਕ ਛੱਡ ਦੇਣਗੇ ।ਸ: ਫ਼ੂਲਕਾ ਨੇ ਕਿਹਾ ਕਿ ਉਹ 14 ਨਵੰਬਰ ਨੂੰ ਬਰਗਾੜੀ ਤੋਂ ਬਠਿੰਡਾ ਕੇਂਦਰੀ ਮੰਤਰੀ ਬੀਬਾ ਹਰਸਿਮਰਤ ਕੌਰ ਬਾਦਲ ਦੇ ਦਫ਼ਤਰ ਤੱਕ ਸਾਈਕਲ ਮਾਰਚ ਕਰਕੇ ਸ਼ਾਂਤਮਈ ਤਰੀਕੇ ਨਾਲ ਆਪਣੇ ਸਾਥੀਆਂ ਸਮੇਤ ਸਾਈਕਲ ਰੈਲੀ ਕੱਢਣਗੇ ।
