ਲੁਧਿਆਣਾ: ਆਮ ਆਦਮੀ ਪਾਰਟੀ ਵੱਲੋਂ ਨਸ਼ੇ ਦੇ ਮੁੱਦੇ ’ਤੇ ਕੈਬਨਿਟ ਮੰਤਰੀ ਬਿਕਰਮ ਮਜੀਠੀਆ ਦੇ ਖ਼ਿਲਾਫ਼ ਲਗਾਏ ਗਏ ਪੋਸਟਰਾਂ ’ਤੇ ਬਾਦਲ ਦਲ ਦੇ ਵਰਕਰਾਂ ਨੇ ਆਪਣਾ ਗੁੱਸਾ ਉਤਾਰਿਆ।
ਅੰਮ੍ਰਿਤਸਰ ਵਿੱਚ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਦੀ ਪੇਸ਼ੀ ਦੌਰਾਨ ਆਪ ਅਤੇ ਅਕਾਲੀ ਦਲ ਨੇ ਸ਼ਕਤੀ ਪ੍ਰਦਰਸ਼ਨ ਕੀਤਾ। ਜਿਸ ਤੋਂ ਬਾਅਦ ਲੁਧਿਆਣਾ ਦੇ ਵੱਖ ਵੱਖ ਇਲਾਕਿਆਂ ਵਿੱਚ ਬਾਦਲ ਦਲ ਦੇ ਵਰਕਰਾਂ ਨੇ ‘ਆਪ’ ਵੱਲੋਂ ਲਾਏ ਗਏ ਪੋਸਟਰ ਪਾੜੇ ਅਤੇ ‘ਆਪ’ ਖ਼ਿਲਾਫ਼ ਨਾਅਰੇਬਾਜ਼ੀ ਕੀਤੀ। ਪੋਸਟਰ ਉਤਾਰਣ ਤੋਂ ਬਾਅਦ ਇਨ੍ਹਾਂ ਪੋਸਟਰਾਂ ਦੇ ਫਾੜਨ ਅਤੇ ਉਤਾਰਨ ਦੀਆਂ ਫੋਟੋਆਂ ਅਤੇ ਵੀਡੀਓ ਬਣਾ ਕੇ ਦਲ ਦੇ ਵਰਕਰ ਸ਼ੋਸਲ ਮੀਡੀਆ, ਫੇਸਬੁੱਕ ਅਤੇ ਵਾਟਸਐਪ ’ਤੇ ਵਾਇਰਲ ਕਰ ਰਹੇ ਹਨ।
ਸ਼੍ਰੋਮਣੀ ਅਕਾਲੀ ਦਲ ਦੇ ਆਈਟੀ ਵਿੰਗ ਦੇ ਲੁਧਿਆਣਾ ਦੇ ਪ੍ਰਧਾਨ ਜਸਮੀਤ ਸਿੰਘ ਮੱਕੜ ਅਤੇ ਮਨਪ੍ਰੀਤ ਸਿੰਘ ਬੰਟੀ ਆਪਣੀ ਟੀਮ ਦੇ ਨਾਲ ਪੋਸਟਰ ਫਾੜਨ ਦੀ ਮੁਹਿੰਮ ’ਤੇ ਨਿਕਲੇ। ਦੋਵਾਂ ਆਗੂਆਂ ਨੇ ਪਹਿਲਾਂ ਚੌੜਾ ਬਾਜ਼ਾਰ, ਅਕਾਲ ਗੜ੍ਹ ਮਾਰਕੀਟ ਦੇ ਸਾਹਮਣੇ ਲੱਗੇ ਪੋਸਟਰ ਫਾੜੇ। ਉਸ ਤੋਂ ਬਾਅਦ ਘੰਟਾ ਘਰ ਰੋਡ, ਰੇਖੀ ਸਿਨੇਮਾ ਚੌਂਕ, ਮਾਤਾ ਰਾਣੀ ਚੌਂਕ, ਜਗਰਾਉਂ ਪੁੱਲ, ਲੋਕਲ ਅੱਡਾ, ਸੀਐਮਸੀ ਚੌਂਕ, ਛਾਉਣੀ ਮੁਹੱਲੇ ਦੇ ਨੇੜੇ ਲੱਗੇ ਸਾਰੇ ਪੋਸਟਰਾਂ ਨੂੰ ਫਾੜ ਦਿੱਤਾ।
ਪੋਸਟਰ ਫਾੜਨ ਦੌਰਾਨ ਮੱਕੜ ਨੇ ਦੱਸਿਆ ਕਿ ‘ਆਪ’ ਵੱਲੋਂ ਬਿਨ੍ਹਾਂ ਸਬੂਤਾਂ ’ਤੇ ਸੀਨੀਅਰ ਮੰਤਰੀ ਮਜੀਠੀਆ ਦੇ ਖ਼ਿਲਾਫ਼ ਪੋਸਟਰ ਲਗਾਏ ਹਨ, ਜੋ ਸਿੱਧੇ ਤੌਰ ’ਤੇ ਗਲਤ ਹੈ, ਬਿਨ੍ਹਾਂ ਸਬੂਤਾਂ ’ਤੇ ਕਿਸੇ ਦੀ ਛਵੀ ਨੂੰ ਖ਼ਰਾਬ ਕਰਨ ਦਾ ਕਿਸੇ ਕੋਲ ਕੋਈ ਅਧਿਕਾਰ ਨਹੀਂ ਹੈ। ਇਸ ਕਾਰਨ ਉਨ੍ਹਾਂ ਨੇ ਪੋਸਟਰ ਫਾੜੇ ਹਨ। ਅਕਾਲੀ ਵਰਕਰਾਂ ਨੇ ਸ਼ਹਿਰ ਵਿੱਚ ਤਕਰੀਬਨ 50 ਤੋਂ 60 ਪੋਸਟਰ ਫਾੜੇ। ਉਧਰ, ਇਸ ਸਾਰੇ ਮੁੱਦੇ ’ਤੇ ਆਪ ਦੇ ਸੀਨੀਅਰ ਆਗੂ ਸੰਜੈ ਸਿੰਘ ਦਾ ਇਹ ਬਿਆਨ ਕਿ ਇਹ ਅਕਾਲੀਆਂ ਦੀ ਸਿੱਧੇ ਤੌਰ ’ਤੇ ਬੌਖਲਾਹਟ ਦੀ ਨਿਸ਼ਾਨੀ ਹੈ। ਇਨ੍ਹਾਂ ਕੋਲ ਛੇ ਮਹੀਨੇ ਹਨ, ਇਹ ਕੁੱਝ ਵੀ ਕਰ ਲੈਣ, ਆਪ ਦੀ ਸਰਕਾਰ ਆਉਣ ’ਤੇ ਹਰ ਕਾਰੇ ਦਾ ਜਵਾਬ ਲਿੱਤਾ ਜਾਏਗਾ।
