ਲੁਧਿਆਣਾ: ਲੁਧਿਆਣਾ ਦੇ ਐਡੀਸ਼ਨਲ ਸੈਸ਼ਨਜ਼ ਜੱਜ ਸਰਬਜੀਤ ਸਿੰਘ ਧਾਲੀਵਾਲ ਦੀ ਅਦਾਲਤ ਵਲੋਂ ਭਾਈ ਸੁਬੇਗ ਸਿੰਘ ਨੂੰ ਐਨ.ਡੀ.ਪੀ.ਐੱਸ 2012 ਦੇ ਕੇਸ ਵਿਚੋਂ ਬਰੀ ਕਰ ਦਿੱਤਾ ਗਿਆ। ਡਵੀਜ਼ਨ ਨੰਬਰ 7 ਦੀ ਪੁਲਿਸ ਵਲੋਂ 6/4/2012 ਨੂੰ ਮੁਕੱਦਮਾ ਨੰਬਰ 147 ਦੇ ਤਹਿਤ ਇਹ ਕੇਸ ਦਾਇਰ ਕੀਤਾ ਗਿਆ ਸੀ। ਪੁਲਿਸ ਕੇਸ ਮੁਤਾਬਕ ਜੇਲ੍ਹ ਦੀ ਇਕ ਬੈਰਕ ਦੀ ਤਲਾਸ਼ੀ ਦੌਰਾਨ 7 ਗਰਾਮ ਹੈਰੋਇਨ ਬਾਥਰੂਮ ਦੀ ਕੰਧ ਵਿਚੋਂ ਮਿਲੀ ਸੀ।
ਭਾਈ ਸੁਬੇਗ ਸਿੰਘ ਦੇ ਵਕੀਲ ਜਸਪਾਲ ਸਿੰਘ ਮੰਝਪੁਰ ਨੇ ਦੱਸਿਆ ਕਿ ਸਰਕਾਰੀ ਪੱਖ ਚਲਾਨ ਵਿਚ ਲੱਗੇ ਇਲਜ਼ਾਮ ਸਾਬਤ ਕਰਨ ਵਿਚ ਨਾਕਾਮ ਰਹੇ ਕਿਉਂਕਿ ਕੇਸ ਨਿਰ-ਆਧਾਰ ਤੇ ਬਿਲਕੁਲ ਝੂਠਾ ਸੀ। ਅੱਜ ਸੁਬੇਗ ਸਿੰਘ 42 ਦਿਨਾਂ ਦੀ ਪੈਰੋਲ ਛੁੱਟੀ ਦੌਰਾਨ ਆਪ ਤਰੀਕ ਭੁਗਤਣ ਆਇਆ ਸੀ।
ਉਹਨਾਂ ਅੱਗੇ ਦੱਸਿਆ ਕਿ ਸੁਬੇਗ ਸਿੰਘ ਦਾ ਨਾਮ ਬੰਦੀ ਸਿੰਘਾਂ ਦੀ ਸੂਚੀ ਵਿਚ ਸੀ ਅਤੇ ਉਹ 1995 ਤੋਂ ਕਤਲ ਦੇ ਇਕ ਕੇਸ ਵਿਚ ਜੇਲ੍ਹ ਵਿਚ ਨਜ਼ਰਬੰਦ ਸੀ ਅਤੇ ਉਸ ਉਪਰ ਭਾਈ ਜਗਤਾਰ ਸਿੰਘ ਹਵਾਰਾ ਹੁਰਾਂ ਵਾਲਾ ਬੁੜ੍ਹੈਲ ਜੇਲ੍ਹ ਬਰੇਕ ਕੇਸ ਪਾ ਦੇਣ ਕਾਰਨ ਉਸਦੀ ਪੱਕੀ ਰਿਹਾਈ ਰੁਕ ਗਈ ਸੀ ਅਤੇ ਬਾਅਦ ਵਿਚ ਇਹ ਹੈਰੋਇਨ ਦਾ ਝੂਠਾ ਕੇਸ ਪਾ ਦਿੱਤਾ ਗਿਆ ਸੀ ਅਤੇ ਇਹ ਦੋਵੇ ਕੇਸ ਬਰੀ ਹੋਣ ਨਾਲ ਸੁਬੇਗ ਸਿੰਘ ਦੀ ਪੱਕੀ ਰਿਹਾਈ ਦਾ ਰਾਹ ਖੁੱਲ੍ਹ ਗਿਆ ਹੈ ਕਿਉਂਕਿ ਉਹ 42 ਦਿਨਾਂ ਦੀਆਂ ਕਰੀਬ 20 ਪੈਰੋਲ ਛੁੱਟੀਆਂ ਵੀ ਕੱਟ ਚੁੱਕਾ ਹੈ।
