ਚੰਡੀਗੜ੍ਹ: ਪੰਜਾਬ ‘ਚ ਨਸ਼ਿਆਂ ਦੀ ਸਮੱਸਿਆ ਨੂੰ ਅੱਖੋਂ ਪਰੋਖੇ ਕਰਨ ਵਾਲੇ ਬਾਦਲਾਂ ਦੀ ਨਿਖੇਧੀ ਕਰਦਿਆਂ ਆਮ ਆਦਮੀ ਪਾਰਟੀ ਦੇ ਸੰਸਦ ਮੈਂਬਰ ਭਗਵੰਤ ਮਾਨ ਨੇ ਅੱਜ ਕਿਹਾ ਕਿ ਲੁਧਿਆਣਾ ਤੇ ਪਠਾਨਕੋਟ ‘ਚ ਨਸ਼ਿਆਂ ਕਾਰਣ ਦੋ ਨੌਜਵਾਨਾਂ ਦੀਆਂ ਹੋਈਆਂ ਤਾਜ਼ਾ ਮੌਤਾਂ ਨਾਲ ਤਾਂ ਹੁਣ ‘ਅੰਨ੍ਹੇ’ ਅਕਾਲੀਆਂ ਦੀਆਂ ਅੱਖਾਂ ਖੁੱਲ੍ਹ ਜਾਣੀਆਂ ਚਾਹੀਦੀਆਂ ਹਨ।
![Bhawant Mann (L), Prof. Sadhu Singh (C) and Himmat Shergill (R) [File Photo]](http://sikhsiyasat.net/wp-content/uploads/2016/04/Bhawant-Mann-L-Prof.-Sadhu-Singh-C-and-Himmat-Shergill-R-File-Photo.png)
ਭਗਵੰਤ ਮਾਨ ਨੇ ਕਿਹਾ ਕਿ ਅਕਾਲੀਆਂ ਲਈ ਇਹ ਸ਼ਰਮ ਵਾਲੀ ਗੱਲ ਹੈ ਕਿ ਉਹ ਸੂਬੇ ਵਿਚ ਨਸ਼ਿਆਂ ਦੀ ਕੋਈ ਸਮੱਸਿਆ ਹੋਣ ਤੋਂ ਹੀ ਇਨਕਾਰ ਕਰ ਰਹੇ ਹਨ। ਇਨ੍ਹਾਂ ਦੋ ਨੌਜਵਾਨਾਂ ਦੀ ਮੌਤ ਸ਼ੁੱਕਰਵਾਰ ਨੂੰ ਵਧੇਰੇ ਨਸ਼ੇ ਲੈਣ ਕਾਰਨ ਹੋਈ ਸੀ।
ਮਾਨ ਨੇ ਕਿਹਾ ਕਿ ਜੇ ਬਾਦਲਾਂ ਨੇ ਸਹੀ ਸਮੇਂ ‘ਤੇ ਇਸ ਸਮੱਸਿਆ ਦਾ ਖਾਤਮਾ ਕਰਨ ਲਈ ਢੁਕਵੇਂ ਕਦਮ ਚੁੱਕੇ ਹੁੰਦੇ ਤਾਂ ਹਜ਼ਾਰਾਂ ਨੌਜਵਾਨਾਂ ਦੀਆਂ ਜਾਨਾਂ ਬਚ ਸਕਦੀਆਂ ਸਨ, ਪਰ ਮੰਦੇਭਾਗੀਂ ਅਕਾਲੀਆਂ ਨੇ ਤਾਂ ਕੇਵਲ ‘ਨਸ਼ਿਆਂ ਦੇ ਵਪਾਰੀਆਂ’ ਨੂੰ ਹੀ ਬਚਾਉਣ ਨੂੰ ਪਹਿਲ ਦਿੱਤੀ, ਜਿਸ ਕਰਕੇ ਨੌਜਵਾਨ ਨਸ਼ਿਆਂ ਦੇ ਅਜਗਰ ਦੇ ਸ਼ਿਕੰਜੇ ਵਿਚ ਫਸ ਕੇ ਹੌਲੀ-ਹੌਲੀ ਮਰਦੇ ਰਹੇ।
ਇਥੇ ਇਹ ਵਰਣਨਯੋਗ ਹੈ ਕਿ ਬਲਾਚੌਰ ਲਾਗਲੇ ਪਿੰਡ ਮੱਲੇਵਾਲ ਦੇ 21 ਸਾਲਾ ਗੁੱਜਰ ਨੌਜਵਾਨ ਦੀ ਮੌਤ ਨਸ਼ਿਆਂ ਦੀ ਵਧੇਰੇ ਵਰਤੋਂ ਕਾਰਣ ਹੋਈ ਸੀ। ਮ੍ਰਿਤਕ ਮਨਜਿੰਦਰ ਦਸਵੀਂ ਜਮਾਤ ਪਾਸ ਸੀ ਅਤੇ ਸਾਲ ਕੁ ਪਹਿਲਾਂ ਨਸ਼ੇ ਛੱਡ ਚੁੱਕਾ ਸੀ ਅਤੇ ਇਸ ਵੇਲੇ ਲੁਧਿਆਣਾ ‘ਚ ਮਕੈਨਿਕ ਵਜੋਂ ਕੰਮ ਕਰ ਰਿਹਾ ਸੀ।
ਪਠਾਨਕੋਟ ‘ਚ ਵਾਪਰੀ ਅਜਿਹੀ ਇਕ ਹੋਰ ਘਟਨਾ ਦੌਰਾਨ ਨੀਸ਼ੂ ਨਾਂ ਦੇ ਇਕ ਗੱਭਰੂ ਦੀ ਮੌਤ ਹੋ ਗਈ ਹੈ। ਇਹ ਮਾਮਲਾ ਵੀ ਵੱਧ ਨਸ਼ਾ ਲੈਣ ਦਾ ਹੀ ਹੈ।
ਦੋ ਨੌਜਵਾਨਾਂ ਦੀਆਂ ਤਾਜ਼ਾ ਮੌਤਾਂ ਨਾਲ ਤਾਂ ਅਕਾਲੀਆਂ ਦੀਆਂ ਅੱਖਾਂ ਖੁੱਲ੍ਹ ਜਾਣੀਆਂ ਚਾਹੀਦੀਆਂ ਹਨ: ਭਗਵੰਤ ਮਾਨ
ਭਗਵੰਤ ਮਾਨ ਨੇ ਵਿਅੰਗਾਤਮਕ ਲਹਿਜੇ ਵਿਚ ਸੁਆਲ ਕੀਤਾ, ” ਇਨ੍ਹਾਂ ਮੌਤਾਂ ਲਈ ਕੋਣ ਜ਼ਿੰਮੇਵਾਰ ਹੈ? ਸੂਬੇ ਦੇ ਹਰੇਕ ਕੋਣੇ ਵਿਚ ਨਸ਼ਿਆਂ ਦੀ ਬੇਖੌਫ ਸਪਲਾਈ ਦੀ ਇਜਾਜ਼ਤ ਕਿਸ ਨੇ ਦਿੱਤੀ ਹੋਈ ਹੈ? ਉਨ੍ਹਾਂ ਕਿਹਾ ਕਿ ਜੇ ਬਾਦਲ ਹਾਲੇ ਵੀ ‘ਸੁੱਤੇ ਰਹੇ’ ਤਾਂ ਪੰਜਾਬ ਅਗਲੇ ਕੁਝ ਮਹੀਨਿਆਂ ਵਿਚ ‘ਮੈਕਸੀਕੋ’ ‘ਚ ਤਬਦੀਲ ਹੋ ਜਾਵੇਗਾ।
ਮਾਨ ਨੇ ਫਿਰ ਵਿਅੰਗ ਕਰਦਿਆਂ ਕਿਹਾ ਕਿ ਅਕਾਲੀਆਂ ਨੇ ‘ਉੜਤਾ ਪੰਜਾਬ’ ਦਾ ਇਹ ਆਖ ਕੇ ਵਿਰੋਧ ਕੀਤਾ ਕਿ ਇਸ ਫਿਲਮ ਵਿਚ ਪੰਜਾਬ ਦਾ ਅਕਸ ਵਿਗਾੜ ਕੇ ਪੇਸ਼ ਕੀਤਾ ਗਿਆ ਹੈ। “ਕੀ ਇਹ ਸੱਚ ਨਹੀਂ ਹੈ ਕਿ ਪੰਜਾਬ ਦੇ ਨੌਜਵਾਨਾਂ ਨੂੰ ਇਸ ਵੇਲੇ ਨਸ਼ਿਆਂ ਦਾ ਅਜਗਰ ਨਿਗਲਦਾ ਜਾ ਰਿਹਾ ਹੈ?”
ਭਗਵੰਤ ਮਾਨ ਨੇ ਕਿਹਾ ਕਿ ਜਦੋਂ ਤਕ ਪੰਜਾਬ ‘ਚ ‘ਨਸ਼ਿਆਂ ਦਾ ਕਾਰੋਬਾਰ ਕਰਨ ਵਾਲੇ ਸਿਆਸੀ ਪ੍ਰਭੂਆਂ’ ਨੂੰ ਕਾਬੂ ਨਹੀਂ ਕੀਤਾ ਜਾਂਦਾ, ਤਦ ਤਕ ਇਹ ਸਮੱਸਿਆ ਹੱਲ ਨਹੀਂ ਹੋ ਸਕਦੀ? ਉਨ੍ਹਾਂ ਕਿਹਾ ਕਿ ਹਰੇਕ ਪੰਜਾਬੀ ਨੂੰ ਪਤਾ ਹੈ ਕਿ ਪੰਜਾਬ ‘ਚ “ਨਸ਼ਿਆਂ ਦਾ ਕਾਰੋਬਾਰ ਕਰਨ ਵਾਲਾ ਉਹ ਪ੍ਰਭੂ” ਕੌਣ ਹੈ।
