ਪਟਿਆਲਾ (31 ਮਾਰਚ, 2015): 90ਵਿਆਂ ਦੇ ਪੁਲਿਸ ਜ਼ਬਰ ਦੇ ਦੌਰ ਦੌਰਾਨ ਪੰਜਾਬ ਪੁਲਿਸ ਵੱਲੋਂ ਆਪਣੇ ਹੀ ਮੁਲਾਜ਼ਮ ਸਿਪਾਹੀ ਬਲਜੀਤ ਸਿੰਘ ਨੂੰ ਝੂਠੇ ਪੁਲਿਸ ਮੁਕਾਬਲੇ ਵਿੱਚ ਮਾਰਨ ਦੇ ਕੇਸ ਵਿੱਚ ਸੀਬੀਆਈ ਅਦਾਲਤ ਨੇ ਇੱਕ ਸਾਬਕਾ ਐੱਸਪੀ ਸਮੇਤ ਹੋਰ ਪੁਲਿਸ ਮੁਲਾਜ਼ਮਾਂ ਨੂੰ ਉਮਰ ਕੈਦ ਦੀ ਸਜ਼ ਸੁਣਾਈ ਹੈ।
ਜਿਨ੍ਹਾਂ ਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ, ਉਨ੍ਹਾਂ ‘ਚ ਰਾਮ ਸਿੰਘ ਐਸ.ਪੀ. (ਸੇਵਾਮੁਕਤ) ਵਾਸੀ ਬੱਦਲ ਡੋਨਾ ਕਪੂਰਥਲਾ ਦੇ ਇਲਾਵਾ 3 ਸੇਵਾਮੁਕਤ ਇੰਸਪੈਕਟਰ ਅਜੀਤ ਸਿੰਘ, ਅਜੈਬ ਸਿੰਘ ਅਤੇ ਅਮਰੀਕ ਸਿੰਘ ਅਤੇ ਸਬ-ਇੰਸਪੈਕਟਰ ਹਰਭਜਨ ਸਿੰਘ, ਸੁਖਵੰਤ ਸਿੰਘ ਏ. ਐਸ. ਆਈ., ਨੰਦ ਸਿੰਘ ਅਤੇ ਰਾਜਿੰਦਰ ਕੁਮਾਰ ਕਾਂਸਟੇਬਲ ਸ਼ਾਮਿਲ ਹਨ ।
ਰਿਪੋਰਟ ਅਨੁਸਾਰ ਸੁਰਤਾ ਸਿੰਘ ਦਾ ਲੜਕਾ ਬਲਜੀਤ ਸਿੰਘ ਪੁਲਿਸ ‘ਚ ਸਿਪਾਹੀ ਸੀ ਅਤੇ ਉਸ ਨੂੰ 1 ਸਤੰਬਰ 1992 ਨੂੰ ਨਕੋਦਰ ‘ਚ ਝੂਠੇ ਮੁਕਾਬਲੇ ਵਿਚ ਮਾਰ ਦਿੱਤਾ ਗਿਆ ਸੀ ਅਤੇ ਦੋ ਹੋਰਾਂ ਰਾਜਿੰਦਰ ਸਿੰਘ ਅਤੇ ਮੁਖ਼ਤਿਆਰ ਸਿੰਘ ਨੂੰ ਭਗੌੜੇ ਕਰਾਰ ਦਿੱਤਾ ਸੀ । ਜਿਨ੍ਹਾਂ ਬਾਰੇ ਹਾਲਾਂ ਤੱਕ ਵੀ ਕੁਝ ਪਤਾ ਨਹੀਂ ਹੈ ।
ਰਾਮ ਸਿੰਘ ਅਤੇ ਉਸ ਦੇ ਸਾਥੀ ਪੁਲਿਸ ਮੁਲਾਜ਼ਮਾਂ ‘ਤੇ ਇਹ ਵੀ ਕਥਿਤ ਦੋਸ਼ ਸਨ ਕਿ ਉਨ੍ਹਾਂ ਨੇ ਦਿੱਲੀ ਤੋਂ ਵਿਜੇਪਾਲ ਨੂੰ ਅਗਵਾ ਕਰਕੇ ਅਤੇ ਇਕ ਹੋਰ ਅਣਪਛਾਤੇ ਵਿਅਕਤੀ ਦਾ 5-6 ਸਤੰਬਰ 1992 ਨੂੰ ਪਿੰਡ ਚਿੱਟੀ ਥਾਣਾ ਲਾਂਬੜਾ ਵਿਖੇ ਫ਼ਰਜ਼ੀ ਮੁਕਾਬਲਾ ਦਿਖਾ ਦਿੱਤਾ ਸੀ ।
ਰਿਪੋਰਟ ਅਨੁਸਾਰ ਇਸ ਸਾਰੇ ਮਾਮਲੇ ਦੀ ਜਾਂਚ ਹਾਈਕੋਰਟ ਦੇ ਆਦੇਸ਼ਾਂ ‘ਤੇ 1997 ‘ਚ ਸੀ.ਬੀ.ਆਈ. ਨੂੰ ਸੌਾਪੀ ਗਈ ਸੀ । 1997 ਵਿਚ ਧਾਰਾ 364, 342, 302, 201, 120ਬੀ ਤਹਿਤ ਸੀ.ਬੀ.ਆਈ. ਨਵੀਂ ਦਿੱਲੀ ਵੱਲੋਂ ਦੋ ਵੱਖ-ਵੱਖ ਕੇਸ ਇਨ੍ਹਾਂ ਿਖ਼ਲਾਫ਼ ਦਰਜ ਕੀਤੇ ਗਏ ਸਨ । ਅਦਾਲਤ ਨੇ ਇਹ ਸਜ਼ਾ ਸੀ. ਬੀ. ਆਈ ਦੇ ਵਕੀਲ ਹਰਿੰਦਰਪਾਲ ਸਿੰਘ ਵਰਮਾ ਦੀਆਂ ਦਲੀਲਾਂ ਨਾਲ ਸਹਿਮਤ ਹੁੰਦਿਆਂ ਸੁਣਾਈ ਹੈ ।
