ਬਰਮਿੰਘਮ (15 ਮਈ, 2015): ਨੇਪਾਲ ਭੁਚਾਲ ਪੀੜਤਾਂ ਦੀ ਸਹਾਇਤਾ ਲਈ ਸਿੱਖ ਕੌਮ ਗੁਰੂ ਸਹਿਬਾਨਾਂ ਦੇ ਦਰਸਾਏ ਮਾਰਗ ‘ਤੇ ਚੱਲਦੀ ਹੋਈ ਆਪਣਾ ਯੋਗਦਾਨ ਪਾ ਰਹੀ ਹੈ।ਇਸ ਸੇਵਾ ਵਿੱਚ ਜਿੱਥੇ ਸ਼੍ਰੌਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਅਤੇ ਦਿੱਲੀ ਸਿੱਖ ਗੁਰਦੂਆਰਾ ਪ੍ਰਬੰਧਕ ਕਮੇਟੀ ਸਿੱਖ ਕੌਮ ਵੱਲੋਂ ਸੇਵਾ ਨਿਭਾ ਰਹੀਆਂ ਹਨ, ਉੱਥੇ ਭਾਰਤ ਅਤੇ ਭਾਰਤ ਤੋਂ ਬਾਹਰਲੀਆਂ ਹੋਰ ਸਿੱਖ ਸੰਸਥਾਵਾਂ ਵੀ ਇਸ ਕਰਜ ਲਈ ਸੰਗਤਾਂ ਨੂੰ ਪ੍ਰੇਰਤ ਕਰਕੇ ਪੀੜਤਾਂ ਦੀ ਸਹਾਇਤਾ ਲਈ ਸੇਵਾ ਨਿਭਾਅ ਰਹੀਆਂ ਹਨ।
ਭੂਚਾਲ ਤੋਂ ਪ੍ਰਭਾਵਿਤ ਲੋਕਾਂ ਦੀ ਮੱਦਦ ਲਈ ਸਿੱਖ ਚੈਨਲ ਏਡ ਵਲੋਂ ਵੀ ਵਿਸ਼ੇਸ਼ ਉਪਰਾਲਾ ਕੀਤਾ ਗਿਆ, ਜਿਨ੍ਹਾਂ ਨੇ ਸਿੱਖ ਚੈਨਲ ਰਾਹੀਂ ਸੰਗਤ ਨੂੰ ਅਪੀਲ ਕਰਕੇ 29,500 ਪੌਂਡ ਫੰਡ ਇਕੱਤਰ ਕੀਤਾ। ਇਸ ਰਕਮ ਰਾਹੀਂ ਭੂਚਾਲ ਪੀੜਤਾਂ ਲਈ ਲੋੜੀਂਦੇ 50 ਸ਼ੈਲਟਰ ਬਾਕਸ ਨਿਪਾਲ ਭੇਜੇ ਗਏ।
ਸਿੱਖ ਚੈਨਲ ਦੇ ਸੀ. ਈ. ਓ. ਗੁਰਦੀਪ ਸਿੰਘ ਅਤੇ ਟੀਮ ਵੱਲੋਂ ਕੌਰਨਵੈਲ ਜਾ ਕੇ ਚੈਕ ਪ੍ਰਦਾਨ ਕੀਤਾ ਗਿਆ ਤਾਕਿ 50 ਸ਼ੈਲਟਰ ਬਾਕਸਾਂ ਦੀ ਅਦਾਇਗੀ ਕੀਤੀ ਜਾ ਸਕੇ। ਜ਼ਿਕਰਯੋਗ ਹੈ ਕਿ ਇਕ ਸ਼ੈਲਟਰ ਬਾਕਸ ‘ਚ ਇਕ ਪਰਿਵਾਰ ਲਈ ਟੈਂਟ, ਕੰਬਲ, ਜ਼ਮੀਨ ‘ਤੇ ਵਿਛਾਉਣ ਲਈ ਚਾਦਰਾਂ, ਪਾਣੀ ਦੀ ਸਟੋਰੇਜ ਅਤੇ ਸਾਫ ਰੱਖਣ ਦੇ ਉਪਕਰਣ, ਸੂਰਜ ਨਾਲ ਚੱਲਣ ਵਾਲੀ ਰੌਸ਼ਨੀ, ਖਾਣਾ ਪਕਾਉਣ ਦੇ ਭਾਂਡੇ, ਬੁਨਿਆਦੀ ਸੰਦਾਂ ਦੀ ਕਿੱਟ, ਮੱਛਰਦਾਨੀ ਅਤੇ ਬੱਚਿਆਂ ਲਈ ਖੇਡਾਂ ਦਾ ਸਾਮਾਨ ਸ਼ਾਮਿਲ ਹਨ।
ਇਸ ਤੋਂ ਪਹਿਲਾਂ ਵੀ 500 ਸ਼ੈਲਟਰ ਕਿੱਟਾਂ ਕਾਠਮੰਡੂ ਭੇਜੀਆਂ ਜਾ ਚੁੱਕੀਆਂ ਹਨ। ਇਸ ਸਬੰਧੀ ਚੈਨਲ ਦੇ ਪ੍ਰਬੰਧਕ ਚਰਨਦੀਪ ਸਿੰਘ ਨੇ ਕਿਹਾ ਕਿ ਨਿਪਾਲ ਦੀ ਤ੍ਰਾਸਦੀ ਸਬੰਧੀ ਸਿੱਖ ਚੈਨਲ ਵਲੋਂ ਕੀਤੇ ਗਏ ਪ੍ਰਸਾਰਣ ਤੋਂ ਬਾਅਦ ਵਿਸ਼ਵ ਭਰ ਦੇ ਲੋਕ ਮੱਦਦ ਲਈ ਅੱਗੇ ਆਏ ਹਨ ਜਿਨ੍ਹਾਂ ਤੋਂ ਮਿਲੇ ਹੁੰਗਾਰੇ ਤੋਂ ਉਹ ਬਹੁਤ ਖੁਸ਼ ਹਨ, ਲੋਕਾਂ ਦੀ ਮਦਦ ਤੋਂ ਬਗੈਰ ਸਿੱਖ ਚੈਨਲ ਏਡ ਵਲੋਂ ਮਾਨਵਤਾ ਦੇ ਭਲੇ ਦਾ ਕਾਰਜ ਸੰਭਵ ਨਹੀਂ ਹੋ ਸਕਦਾ ਸੀ।
