ਪੈਰਿਸ (21 ਅਪ੍ਰੈਲ, 2015 ): ਫਰਾਂਸ ‘ਚ ਪੈਰਿਸ ਦੇ ਆਸ-ਪਾਸ ਸਮੂਹ ਗੁਰਦੁਆਰਿਆਂ ‘ਤੇ ਸਮੂਹ ਸੰਗਤ ਦੇ ਸਹਿਯੋਗ ਨਾਲ ਖਾਲਸੇ ਦਾ ਸਾਜਨਾ ਦਿਵਸ ਪੂਰੀ ਸ਼ਰਧਾ ਤੇ ਧੂਮ-ਧਾਮ ਨਾਲ ਮਨਾਇਆ ਗਿਆ। ਇਸ ਸਬੰਧ ‘ਚ ਬੋਬਿਨੀ ਵਿਖੇ ਰੱਖੇ ਗਏ ਸ੍ਰੀ ਅਖੰਡ ਪਾਠ ਸਾਹਿਬ ਜੀ ਦੇ ਭੋਗ ਮਗਰੋਂ ਬੀਤੇ ਐਤਵਾਰ 19 ਅਪ੍ਰੈਲ ਨੂੰ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਛਤਰ-ਛਾਇਆ ਹੇਠ ਪੰਜ ਪਿਆਰਿਆਂ ਦੀ ਅਗਵਾਈ ‘ਚ ਵਿਸ਼ਾਲ ਨਗਰ ਕੀਰਤਨ ਸਜਾਏ ਗਏ।
ਇਸ ਮੌਕੇ ਬੋਬਿਨੀ ਦੇ ਮੇਅਰ ਸਟੀਫਨ-ਦਿ-ਪੋਲੀ ਤੇ ਜੌਨ ਮੇਅਰ ਨੇ ਸੰਗਤਾਂ ਨੂੰ ਸੰਬੋਧਨ ਕੀਤਾ ਤੇ ਖਾਲਸੇ ਦੇ ਜਨਮ ਦਿਹਾੜੇ ਦੀ ਵਧਾਈ ਦਿੱਤੀ। ਪੂਰੇ ਖਾਲਸਾਈ ਜਾਹੋ-ਜਲਾਲ ‘ਚ ਸਜੇ ਨਗਰ ਕੀਰਤਨ ‘ਚ ਸਭ ਤੋਂ ਅੱਗੇ ਮੀਰੀ-ਪੀਰੀ ਗਤਕਾ ਅਖਾੜਾ ਗਤਕੇ ਦੇ ਜੌਹਰ ਪੇਸ਼ ਕਰ ਰਿਹਾ ਸੀ, ਪਿੱਛੇ ਬੀਬੀਆਂ ਵੱਲੋਂ ਸ਼ਰਧਾ ਪੂਰਵਕ ਰਸਤਾ ਸਾਫ਼ ਕੀਤਾ ਜਾ ਰਿਹਾ ਸੀ ਤੇ ਪਾਣੀ ਵਾਲੀ ਗੱਡੀ ਨੂੰ ਅੱਗੇ-ਅੱਗੇ ਸੜਕ ਧੋਂਦੀ ਜਾ ਰਹੀ ਸੀ।
ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਪਾਵਨ ਸਵਾਰੀ ਸੁੰਦਰ ਪਾਲਕੀ ਵਿਚ ਸੁਸ਼ੋਭਿਤ ਸੀ। ਪੰਜ ਪਿਆਰਿਆਂ ਦੀ ਅਗਵਾਈ ਹੇਠ ਖਾਲਸਾਈ ਰੰਗਣ ਬਖੇਰਦਾ ਹੋਇਆ ਨੀਲੀਆਂ-ਪੀਲੀਆਂ ਦਸਤਾਰਾਂ, ਦੁਪੱਟਿਆਂ ਦਾ ਇਹ ਕਾਫ਼ਲਾ ਬੋਬਿਨੀ, ਡਰੰਸੀ ਵਿਚੋਂ ਦੀ ਹੁੰਦਾ ਹੋਇਆ ਅਦਭੁੱਤ ਨਜ਼ਾਰਾ ਪੇਸ਼ ਕਰ ਰਿਹਾ ਸੀ।
ਥਾਂ-ਥਾਂ ਸੰਗਤ ਵੱਲੋਂ ਚਾਹ, ਪਕੌੜੇ, ਜਲੇਬੀਆਂ, ਦੁੱਧ ਤੇ ਜੂਸ ਆਦਿ ਦੇ ਲੰਗਰ ਲਾਏ ਹੋਏ ਸਨ। ਸੰਗਤ ਦੇ ਠਾਠਾਂ ਮਾਰਦੇ ਇਕੱਠ ‘ਚ ਇਕ ਸਿਰੇ ਤੋਂ ਦੂਜਾ ਸਿਰਾ ਨਜ਼ਰ ਨਹੀਂ ਸੀ ਆ ਰਿਹਾ। ‘ਬੋਲੇ ਸੋ ਨਿਹਾਲ, ਸਤਿ ਸ੍ਰੀ ਅਕਾਲ ਦੇ ਜੈਕਾਰਿਆਂ ਨਾਲ ਅਕਾਸ਼ ਗੂੰਜ ਉੱਠਿਆ।
ਫਰਾਂਸੀਸੀ ਲੋਕ ਬਾਹਰ ਨਿਕਲ ਕੇ ਇਹ ਅਲੌਕਿਕ ਨਜ਼ਾਰਾ ਤੱਕ ਰਹੇ ਸਨ। ਇਸ ਮੌਕੇ ਫਰੈਂਚ ਭਾਸ਼ਾ ਵਿਚ ਸਿੱਖ ਇਤਿਹਾਸ ਤੇ ਵਿਸਾਖੀ ਬਾਰੇ ਪੈਂਫਲਿਟ ਵੰਡੇ ਗਏ।
ਭਾਈ ਗੁਰਦੇਵ ਸਿੰਘ ਡਰੰਸੀ ਵੱਲੋਂ ਤੇ ਨਿਰਮਲ ਸਿੰਘ ਵੱਲੋਂ ਸੁੰਦਰ ਪਾਲਕੀ ਦੀ ਸੇਵਾ ਕੀਤੀ ਗਈ। ਅਕਾਲ ਚੈਨਲ, ਸੰਗਤ ਟੀ. ਵੀ., ਦੀਪ ਟੀ. ਵੀ. ਤੇ ਮੀਡੀਆ ਪੰਜਾਬ ਵੱਲੋਂ ਸਾਰੇ ਦ੍ਰਿਸ਼ਾਂ ਨੂੰ ਕੈਮਰੇ ਵਿਚ ਕੈਦ ਕੀਤਾ ਗਿਆ।
