ਨਵੀਂ ਦਿੱਲੀ: ਦਿੱਲੀ ਵਿੱਚ ਨਵੰਬਰ-1984 ਦੇ ਸਿੱਖ ਕਤਲੇਆਮ ਬਾਰੇ ਕੇਂਦਰ ਸਰਕਾਰ ਵੱਲੋਂ ਬਣਾਈ ਗਈ ਵਿਸ਼ੇਸ਼ ਜਾਂਚ ਟੀਮ (ਐਸਆਈਟੀ) ਵੱਲੋਂ ਮੁੜ ਜਾਂਚ ਲਈ ਖੋਲ੍ਹੇ ਜਾਣ ਵਾਲੇ 49 ਮਾਮਲਿਆਂ ਦੀ ਪਛਾਣ ਕੀਤੀ ਗਈ ਹੈ। ਰਾਜ ਸਭਾ ਵਿੱਚ ਗ੍ਰਹਿ ਰਾਜ ਮੰਤਰੀ ਹੰਸਰਾਜ ਗੰਗਾਰਾਮ ਅਹੀਰ ਨੇ ਦੱਸਿਆ ਕਿ ਕੇਂਦਰ ਸਰਕਾਰ ਦੇ ਜਾਰੀ 12 ਫਰਵਰੀ 2015 ਦੇ ਹੁਕਮ ਤਹਿਤ ਵਿਸ਼ੇਸ਼ ਜਾਂਚ ਟੀਮ (ਐਸਆਈਟੀ) ਬਣਾਈ ਗਈ ਸੀ, ਜਿਸ ਨੇ ਨਵੰਬਰ-1984 ਦੇ ਬੰਦ ਕੀਤੇ ਗਏ ਮਾਮਲਿਆਂ ਦੀ ਜਾਂਚ ਕਰਨੀ ਸ਼ੁਰੂ ਕੀਤੀ ਸੀ।
ਦਰਜ ਕੀਤੇ ਗਏ 650 ਮਾਮਲਿਆਂ ਵਿੱਚੋਂ 29 ਜੁਲਾਈ-2016 ਤੱਕ 49 ਮੁੜ ਜਾਂਚ ਲਈ ਖੋਲ੍ਹੇ ਜਾਣ ਲਈ ਪਛਾਣੇ ਗਏ। ਇਹ ਐਸਆਈਟੀ ਦਿੱਲੀ ਵਿੱਚ ਕੇਜਰੀਵਾਲ ਸਰਕਾਰ ਦੇ ਬਣਨ ਤੋਂ ਇੱਕ ਦਿਨ ਪਹਿਲਾਂ ਕੇਂਦਰ ਸਰਕਾਰ ਵੱਲੋਂ ਬਣਾਈ ਗਈ ਸੀ, ਜਿਸ ਨੇ ਪਹਿਲਾਂ ਛੇ ਮਹੀਨੇ ਤੱਕ ਆਪਣੀ ਰਿਪੋਰਟ ਦੇਣੀ ਸੀ ਪਰ ਇਸ ਐਸਆਈਟੀ ਨੂੰ ਛੇ-ਛੇ ਮਹੀਨੇ ਦਾ ਦੋ ਵਾਰ ਹੋਰ ਸਮਾਂ ਦਿੱਤਾ ਗਿਆ ਤੇ ਸਿਆਸੀ ਦਬਾਅ ਪੈਣ ਮਗਰੋਂ ਜਾਂਚ ਟੀਮ ਸਰਗਰਮ ਹੋਈ।
